دهۆك-KDP.info- سكرتێرا ئێكه‌تیا ئافره‌تێن كوردستانێ ئاشكرا كر كو ل ژێر درووشمێ (هزر و نه‌ریتێن شاش ڤه‌مرینه‌ نه‌ك ژیانێ) رۆژا جیهانیا به‌رهه‌نگاربوونا توندوتیژیا دژى ئافره‌تان دێ ل رۆژا 25/11/2020 ب ئه‌نجامدانا چه‌ندین چالاكیان ل چه‌ندین باژێر و باژارۆكێن هه‌رێما كوردستانێ هێته‌ ساخكرن.

د.ڤیان سلێمان، سكرتێرا ئێكه‌تیا ئافره‌تێن كوردستانێ بۆ مالپه‌رێ فه‌رمیێ پارتى دیموكراتى كوردستان ئاشكرا كر كو ب هه‌لكه‌فتا رۆژا جیهانیا به‌رهه‌نگاربوونا توندوتیژیا دژى ئافره‌تان دێ چه‌ندین چالاكیێن جوراوجور ل چه‌ندین باژێر و باژارۆكێن هه‌رێما كوردستانێ هێنه‌ ئه‌نجامدان، به‌لێ ژ به‌ر خوه‌پاراستنێ ژ ڤایرۆسێ كۆرۆنایێ چ خۆل ناهێنه‌ ڤه‌كرن و سمینار ب شێوێ لێك كۆمڤه‌بوون ناهێنه‌ پێشكێشكرن، به‌لكو ئه‌ڤ ساله‌ چه‌ندین سمینار و كۆنفرانس ل دۆر توندوتیژیا دژى ئافره‌تان دێ ب شێوه‌یێ ئۆنلاین هێنه‌ پێشكێشكرن و د سوشیال میدیایێ دا دێ چه‌ندین پۆست ب شێوه‌یه‌كێ به‌رفره‌ه هێنه‌ به‌لاڤكرن كو ده‌ربڕینێ ژ ڤێ رۆژێ بكه‌ن، هه‌روه‌سا چه‌ندین پێشانگه‌ه ژى دێ هێنه‌ ڤه‌كرن و به‌رهه‌م و كارێن هونه‌رى یێن ئافره‌تان دێ تێدا هێنه‌ نیشادان، ئانكو وان هه‌موو بزاڤ كرینه‌ ئه‌ڤ ساله‌ پێگیریێ ب مه‌رج و رێنمایێن ساخله‌میێ بكه‌ن و لێك كۆمڤه‌بوون په‌یدانه‌بن.

ناڤهاتیێ خویا كر كو ب هه‌مان هه‌لكه‌فت سكرتاریه‌تا ئێكه‌تیا ئافره‌تێن كوردستانێ دێ به‌یاننامه‌كێ ژى ده‌ركه‌ت كو ناڤه‌رۆكا ڤێ به‌یاننامێ دێ ل دۆر توندوتیژیا دژى ئافره‌تان و ستراتیژیه‌تا ئێكه‌تیا ئافره‌تێن كوردستانێ بیت كا ب چو شێوه‌ د بوارێ توندوتیژیا دژى ئافره‌تان دا كار دكه‌ت و هه‌مان به‌یاننامه‌ دا دێ په‌یامه‌كێ پێشكێشى ئافره‌تان كه‌ن كو ئه‌و وه‌كو ئێكه‌تیا ئافره‌تێن كوردستانێ دێ ل سه‌ر كار و خه‌باتا خوه‌ د به‌رده‌وام بن، ژ به‌ر كو ئه‌و خوه‌ ل مافێن هه‌موو ئافره‌تان دكه‌نه‌ خودان.

رێوار محه‌مه‌د ره‌شید