دھۆک-KDP.info- د رێورەسمەکی دا رێیا د ناڤبەرا باتێل – زاخۆ دا ب درێژاھیا ١٥ کیلۆمەتران ئەڤرۆ رۆژا ١٨/١٠/٢٠٢٠ ێ ب ئامادەبوونا (د.عەلی تەتەر) پارێزگارێ دھۆکێ و چەندین رێڤەبەرێن دامودەزگەھێن میری ھاتە ڤەکرن.
(د.عەلی تەتەر) پارێزگارێ دھۆکێ د رێورەسمێن ڤەکرنا رێیا باتێل – زاخۆ دا ئاشکرا کر کو ژ بلی ڤەکرنا ڤێ رێیێ د ڤێ حەفتیێ دا رێیا دناڤبەرا رۆڤیا بۆ چەمەیی دا ب درێژاھیا ٢٢ کیلۆمەتران دێ ھێتە ڤەکرن ، ھەروەسا رێیا سحێلا بۆ گرشین ھەر د چارچۆڤێ پرۆژێ رێیا دھۆک – زاخۆ دێ پشتی دو ھەیڤێن دی ھێتە ڤەکرن کو نوکە کار یێ تێدا دھێتەکرن و گۆت: "پشتی سەرەدانا سەرۆکی حکومەتا ھەرێما کوردستانێ بۆ قەزا زاخۆ جادا ئیبراھیم خەلیل ئەڤرۆ تەندەرێ وێ دێ ھێتە دیارکرن کا دێ بۆ کیشک کۆمپانیێ کەڤیت داکو دەست ب کاری بھێتەکرن".
خەجیجا محەمەد ئەحمەد، رێڤەبەرا رێک و پرا ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو رێیا ستراتیژیا دھۆک – زاخۆ گرنگیا خوە نەبتنێ بۆ پارێزگەھا دھۆکێ ھەیە بەلکو گرنگیا خوە بۆ ھەرێما کوردستانێ و ھەمی پارێزگەھێن عیراقێ ھەیە کو ل سالا ٢٠١٢ دەست ب چێکرنا ڤی پرۆژەیی ھاتیەکرن و قۆناغ بۆ قۆناغێ ھاتیە ڤەکرن، ئەڤرۆ ژی د رێورەسمەکی دا ھەر د چارچۆڤێ ڤی پرۆژەیی دا رێیا دناڤبەرا باتێل – زاخۆ دا ب درێژاھیا ١٥ کیلۆمەتران ھاتە ڤەکرن و گۆت: "ل حەفتیا بھێت ئەو قۆناغێن مای ژی یێن ڤی پرۆژەیی دێ ب دووماھی ھێن و رێیا دناڤبەرا دھۆک – زاخۆ دا دێ ب تمامی ھێتە ڤەکرن کو ئەڤ پرۆژە ب کۆژمێ ٣٥ ملیار دیناران ژ لایێ کۆمپانیەکا ناڤخۆیی ڤە دھێتە بجھئینان".
رێوار محەمەد رەشید