دھۆک-KDP.info- رۆژا ٢٧ ئیلۆنێ یا ھەموو سالان وەکو رۆژا جیھانی یا گەشت و گۆزارێ ھاتیە دەستنیشانکرن، ب ڤێ ھەلکەفتێ رێڤەبەریا گشتی یا گەشت و گۆزارێ ل پارێزگەھا دھۆکێ دێ ڤێ رۆژێ ب ئەنجامدانا چەندین چالاکیان ل رۆژا ئێکشەمبی ٢٧/٩/٢٠٢٠ ساخ کەت.

عوبەیدوللا داود عەلی، رێڤەبەرێ گشتی یێ گەشت و گۆزارێ ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو رێڤەبەریا گشتی یا گەشت و گۆزارێ ل پارێزگەھا دھۆکێ ھەموو سالان ساخکرنا رۆژا جیھانی یا گەشت و گۆزارێ ب ئەرکەکێ خوە دزانیت بۆ ئەڤ سالە ژی رێڤەبەریا وان ب ڤێ ھەلکەفتێ دێ چەندین چالاکیان ل دووڤ بەرنامەکێ تایبەت ئەنجام دەت ژ وان ژی ب مەرەما پاراستنا گیانێ گەشتیار و وەلاتیان دێ کەرەستێن تافیلکرنێ و کەمامە و دەستگۆرکان ل زالگەھێن سەرەکی ب تایبەت ل زالگەھا بەدریکێ ل سەر وان گەشتیاران بەلاڤ کەن یێن کو ژ باژێرێ مووسل و پارێزگەھێن ناڤەڕاست و ژێریا عیراقێ دھێنە د ناڤ پارێزگەھا دھۆکێ، ھەروەسا بۆ پیرۆز ڕاگرتنا ھەمان رۆژ دێ بەیاننامەکێ دەرکەن، سەرەرایی ڤێ چەندێ دێ پرێس کۆنفرانسەکی ژی ل دۆر گرنگیا رۆژا جیھانی یا گەشت و گۆزارێ ئەنجام دەن.

ناڤھاتی ئاماژە دا وێ چەندێ کو د ھەیڤێن بۆری دا رەوشا کەرتێ گەشت و گۆزارێ ل پارێزگەھا دھۆکێ ژ بەر گرتنەبەرا رێکارێن ساخلەمیێ بۆ خوە پاراستن ژ ڤایرۆسێ کۆرۆنایێ گەلەک د ئاستەکێ لاواز دابوو، بەلێ پشتی ل رۆژێن بۆری ژوورا بەرھەنگاربوونا ڤایرۆسێ کۆرۆنایێ ل پارێزگەھا دھۆکێ بڕیار دایی رێک ل ھەمبەر ھاتنا وان گەشتیارێن ب ترۆمبێلێن خوە یێن تایبەت ژ باژێرێ مووسل و پارێزگەھێن ناڤەراست و ژێریا عیراقێ دھێنە پارێزگەھا دھۆکێ بھێتە ڤەکرن، نوکە جارەکا دی ھەتا رادەکی ڤەلڤینەکا کەفتیە کەرتێ گەشت و گۆزارێ ل پارێزگەھا دھۆکێ و گۆت: "پتری ٧٠% ژ وان گەشتیارێن سەرەدانا پارێزگەھا دھۆکێ دکەن ئەون یێن کو ژ باژێرێ مووسل و پارێزگەھێن ناڤەراست و ژێریا عیراقێ دھێن".

ل دووماھیێ عوبەیدوللای گۆت: "بزاڤێن مە دگەل جھێن پەیوەندیدار د بەردەوامن بۆ وێ چەندێ رێکا پارێزگەھا دھۆکێ وەکو یا پارێزگەھێن ھەولێر و سلێمانیێ ل ھەمبەر گرۆپێن گەشتیاری ژی بھێتە ڤەکرن".

رێوار محەمەد رەشید