دھۆک-KDP.info- سەرۆکێ کۆمەلا ئۆتێل و خارنگەھان ل پارێزگەھا دھۆکێ دیار کر کو رێکا د ناڤبەرا پارێزگەھا دھۆکێ بۆ باژێرێ مووسل دا ئەڤرۆ رۆژا ١٥/٩/٢٠٢٠ ب بڕیارا ژوورا بەرھەنگاربوونا کۆرۆنایێ ل پارێزگەھا دھۆکێ بۆ گەشتیاران ھاتە ڤەکرن.
ئیحسان شێح عیسا، سەرۆکێ کۆمەلا ئۆتێل و خارنگەھان ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو پشتی بۆ دەمێ پتری شەش ھەیڤان بۆ خوەپاراستن ژ ڤایرۆسێ کۆرۆنایێ رێکا پارێزگەھا دھۆکێ ل ھەمبەر ھاتنا گەشتیارێن ژ باژێرێ مووسل و پارێزگەھێن ژێری و ناڤەڕاستا عیراقێ ھاتیە گرتن مە ل رۆژێن بۆری چەندین بزاڤ کرن و کۆمبوون دگەل پارێزگەرێ دھۆکێ ئەنجام دان کو دووبارە ئەڤ رێکە بھێتە ڤەکرن، ئەڤرۆ رۆژا ١٥/٩/٢٠٢٠ ب بڕیارا ژوورا بەرھەنگاربوونا کۆرۆنایێ ل پارێزگەھا دھۆکێ رێکا دناڤبەرا دھۆک – مووسل دا بۆ ھاتنا گەشتیاران ھاتە ڤەکرن، بەلێ دڤێت گەشتیار ب ترۆمبێلێن خوە یێن تایبەت بھێن، ئانکو نوکە رێک ب گرۆپێن گەشتیاری ناھێتەدان ب ترۆمبێلێن (پاس) بھێنە د ناڤ پارێزگەھا دھۆکێ دا.
ناڤھاتی ئاماژە دا وێ چەندێ کو ھەمی زالگەە ل دۆر ڤێ چەندێ ھاتینە ئاگەھدارکرن و دەمێ گەشتیار دھێن پشکنینا کۆرۆنایێ بۆ ناھێتەکرن و چ و پارە ژی بۆ چێکرنا ئیقامێ ل زالگەھان ژێ ناھێنە وەرگرتن و گۆت: "بزاڤێن مە دگەل جھێن پەیوەندیدار د بەردەوامن بۆ وێ چەندێ گرۆپێن گەشتیاری ب پاسێن مەزن ژی بھێنە د ناڤ پارێزگەھا دھۆکێ دا، ژ بەر کو د ڤی دەمێ بۆری دا کەرتێ گەشت و گۆزارێ ل پارێزگەھا دھۆکێ گەلەک زەرەرمەند بوویە و بەھرا پتریا وان گەنجێن ل بنگەھێن گەشتیاری کار دکر بێ کار ماینە، بەلێ نوکە ب ھاتنا ڤان گەشتیاران دێ ڤەلڤینەکا دی کەڤیتە کەرتێ گەشت و گۆزارێ ل پارێزگەھا دھۆکێ".
رێوار محەمەد رەشید