Bi navê xwedayê mezin û dilovan

Îro şeş sal bi ser karesata tawana komkujiya Şingalê de derbas dibe. Karesatek ku tê de terorîstên DAIŞê bi awayeke hovane tawan li beranber xûşk û birayên me yên Êzdî kirin. Ew tawan birîneke kûr e li ser laşê gelê Kurdistanê û tu demekê nayê jibîrkirin. Li vê karesatê de Êzdî ji ber Kurdbûnê û ji ber ol û bîr û baweriyên xwe ketine ber lehiya rik û hov û bêwîcdaniya terorîstan. Ew tawanbarên DAIŞê yên li dijî xûşk û birayên me yên Êzdî encam dane berdewamiya wan zincîre karesat û tawanan bû ku bi dirêjahiya dîrokê de li ser gelê Kurdistanê hatiye kirin.

Di vê salvegera diltezîn de bi bilindî bîranîna şehîdan û qurbaniyên Şingalê dikin. Di heman demê de wan Pêşmergeyên qehremanan jî bibîr tînîn ku bi xwîna xwe Şingal û çiyayê Şingalê ji destê terorîstan azad kirin û merdane tola wê karesata diltezîn ji terorîstan kirin.

Bi pêwîstî dizanim li vir careke din tekeziyê li wê yekê bikim ku bi hemû şiyanek ve piştevaniya daxwaziyên xûşk û birayên Êzdiyan dikim bo ku ew bi serbilindî vegerin ser mal û warên xwe û jiyaneke bextewer û aram û dûrî li sîtemkarî û çewsandina wan hebe û bikarin karubarên xwe li navçeyên xwe birêve bibin.

Cihê daxeke zêde ye ku devera Şingalê jî piştî rûdanên 16 Cotmeha 2017 ketiye bin bandora plana nehezên xelkê Kurdistanê. Wê demê ji bo ku rê li pêşiya karesatên din û xwînrijandina di navbera Êzdiyan de were girtin û wiha rêkeftin hat kirin ku kontrola Şingalê bidin Êzdiyan û Êzdî her bi xwe îdareya Şingalê û navçeyên xwe bikin, lê belê heta niha jî Hikûmeta Iraqê pabendî wê rêkeftinê nebûye û Şingal ketiye destê xelkeke din. Her ji bo wê yekê jî heta niha Êzdiyên devera Şingalê ji jiyan û paşeroja xwe piştrast nînin û venegeriyane navçeyên xwe û her li rewşa koçberî û jiyana kampan de mane ku di rastiyê de ev zulmeke mezin e.

Ji bo wê yekê pêwîst e dawî bi vê rewşa nexwezayî ya Şingalê were û Şingal vegere dest xwediyê xwe yên resen û pêwîste rêkarên wiha bêne girtin ku êdî karesat û zulm û tawan li dijî Êzdiyan û pêkhatên din dûbare nebin.

Di salvegera karesata komkujiya Şingalê de dilê min berdewam li gel xûşk û birayên Êzdiyane û hevxemê kesukarên qurbaniyên wê karesata diltezînim. Hezaran silav li giyanê pakê şehîdên Şingalê û hemû şehîdên rêya azadiya Kurdistanê.

Mesûd Barzanî

03.08.2020”