Hewlêr-KDP.info- Serokê Herêma Kurdistanê di peyamekê de dûpat kir, Herêma Kurdistanê li ser hewlên xwe yên ji bo dabînkirin û vegerandina aramî û avadankirina Şingalê û kirina bi parêzgeh berdewam dibe û got jî, Şingal kirine warê çekdarên neyasayî ku bi bêxemiyê ve li ser birîn û xema Êzdiyan mijulî birêvebirina ajanda û bernameyên xwe yên siyasî ne.”
Ev jî tekesta peyama Nêçîrvan Barzanî ye:
“Îro bi êşeke kûr ve bîranîna şeş saliya Jenosayda Êzdiyan û karesata Şingalê dikin. Bi rêz û rûmetê ve wan hemû xwîşk û birayên me yên Êzidî bi bîr tînîn ku bûne qurbaniya tawankariyeke bêhevtaya terorîstên DAIŞê. Ti kesekî bawer nedikir di sedsala bîst û yekê da mirovayetî careke din mergesateke wiha dibîne ku hemû cîhanê şok dike. Silav û dirûd ji bo giyanê pakê qurbaniyên karesata Şingalê û tevahiya xwîşk birayên Êzdî.
Di demekê de vê bîranîna bi êş dikin, mixabin hê jî ji birîna xwîşk û birayên me yên Êzdî xwîn jê diçe û bi hezarên wan li wargehên koçberiyê dijîn. Şingal û navçeyên din ên Êzidiyan hê jî nehatine avedankirin û bingeheke baş ya vegerana aramiyê û vegerana jiyana wan tê de nîne. Şingal kirine warê çekdarên neyasayî ku bi bêxemiyê ve li ser birîn û xema Êzdiyan de mijulî birêvebirina ajanda û bernameyên xwe yên siyasî ne.
Herêma Kurdistanê li ser hewlên xwe yên ji bo dabînkirina aramî û vegerandina aramî û avedankirina Şingalê û kirina bi parêzgehê de berdewam dibe. Ji bo vê mebestê li gel Hikûmeta Federaliya Iraqê û îdareya parêzgeha Mûsilê hemû hevkarî û hemahengiyekê dike. Her wiha li ser asta navdewletî jî kar dike heta ku bi hevkariya Neteweyên Yekgirtî û Unitad vê tawanê bi jenosayd binasênin û tawankaran jî didin dadgehê û qurbaniyan qerebû dikin.
Xwîşk û birayên Êzdî bi hezaran salan li ser warê xwe bawerî û ola xwe parastine û herdem sedemeke girîng û çalak ya çanda pêkvejiyanê û lêborînê bûne û herdem jî her wiha dimînin. Em di vê salvegerê de tekeziyê li ser kûrkirina wê çandê dikin û hemû pêkhatên olî û neteweyî piştrast dikin ku Kurdistan bi landika aram û parastiya me hemûyan dimîne. Her wiha soza ji bo kesukarên revandiyan jî dûpat dikin li lêgerîn û rizgarkirina wan û hewldana ji bo zanîna çarenûsa wan de berdewam dibin.
Silav li giyanê pak ê wan Pêşmergeyên qehreman ku bi serpereştiya raste rast ya cenabê Serok Mesûd Barzanî, Şingal rizgar kirin û bo wê navê da giyanê xwe bexşîn. Spas û pêzanîn ji bo wan hemû kesên li navxwe û derve hevkariyê pêşkêşê Êzdiyan kirin. Xwîşk û birayên Êzdî piştrast dikin ji bo dabînkirina dadperwerî û paşerojeke baştir herdem li gel wan da dibîn.
Nêçîrvan Barzanî
Serokê Herêma Kurdistanê"