رۆژئاوایی کوردستان -KDP.info-  نۆ ساڵ لە دەستپێکردنی شۆڕشی سووریا تێپەڕی. سەرەتا دروشمیان ئازادی و ژیانێکی بەکەرامەت بوو، بەڵام هەستیان پێ نەکردبوو وڵاتەکەیان سەد دەست و هەزار گرووپی تێ دەکەوێت.

لە ١٥ی ٣ی ٢٠١١دا سوورییەکان هاتنە سەر شەقام بۆ گۆرینی دەسەڵاتێکی خراپ بە دەسەڵاتێکی باش، بەڵام ئەوان نەیانزانی بە ئاگر ڕووبەڕوویان دەبنەوە و شۆڕشەکەیان پێ دەنێتە ساڵی دەیەمەوە.

لە دروشمێکەوە بۆ شەڕی ناوخۆیی و نێودەوڵەتی

هەزاران کوژراو و هەزارن بریندار و سەدان ونبوو و ملیۆنێک ئاوارە، دوای ئەوە هات کە لە ناوچەی درعا کۆمەڵێک گەنج دروشمێکیان لەسەر دیوارەکان نووسیوو؛ ''با بەشار بڕوات''. ئەوان داوای ئازادییان کردبوو و دواتر خەڵک ڕژانە سەر جاددەکان و وڵات لە دەستی هەموویان دەرچوو.

بەپێێ ڕوانگەی مافی مرۆڤی سووری، ٥٨٦ هەزار کەس کوژراون، لەوانەش ١١٦ هەزار کەسیان سڤیلن، ئەمە جگە لەوەی کە ئەو شەڕە زیانی گەورەی ماددیشی لێ کەوتووەتەوە.

وڵاتانی جیهان بە هەموو سەنگی سیاسی و سەربازی و دیپلۆماسیی خۆیانەوە چوونە نێو سووریا، خەڵکی سووریاش بەسەر دوو بەرەدا دابەش بوون، بەشیكیان لە پشت ڕژێـمی ئەسەد مانەوە و بەشێکیشیان بوونە ئۆپۆزسیۆن و لەگەڵ ئەوە بوون کە ئەو ڕژێمە نەمێنێت.

دەسەڵات بۆ کامە؟

لە هەر پارچەیەیەکی سووریا کەسێک باڵادەستە، هێشتا دیار نییە کێ دەبێتە براوەی گەمەکە، چونکە ئەوەی لە سووریا دەگوزەرێ شەڕی زلهێزانە، ئەو ناوچانەی کە بە نفووزی وڵاتان دادەنران، ئێستا گۆڕانی جیۆسیاسییان بەسەر دێت.

عەبدلرەحمان ئاپۆ، سەرکردەی ئەنەکەسە، دەڵێ: "دوای ساڵێک شۆڕشەکە چووە قاڵبێکی چەکداری و شەڕی ناوخۆیی و گرووپە ئیسلامییەکان دەستیان خستە نێو شۆڕشەکە و بووەتە شەڕی نێوخۆیی، ئەمەش بووەتە هۆی ئەوەی دەستی وڵاتانی زلهێز بێتە نێو سووریا و بڕیارەکان بوونەتە نێودەوڵەتی."

ئاپۆ، بە ماڵپەڕی فەرمیی پارتی دیموکراتی کوردستانی گوت: "دواتر گفتوگۆکان دەستیان پێ کرد، گفتوگۆکانی ئەستانا و جنێڤ و دانانی لیژنەی دەستووری، بەڵام ئەمانە هیچ سوودیا نییە و هەموو گفتوگۆکان وەستێندران، چونکە تا ئێستا وڵاتان نەگەیشتوونەتە دابەشکردنی سووریا."

زیانی کورد

سیامەند حاجۆ، سیاسەتمەداری دیاری کورد لە ڕۆژئاوای کوردستان، دەڵێ: "بەوەی لە ڕۆژئاوای کوردستان و سووریا ڕووی دا زیانی گەورە بەر کورد کەوت، چونکە کورد هیچ دەستکەوتێکی نەبوو، شەڕی داعش بە کوردەکان کرا، کەچی دواتر کوردەکان باجیان دا و ناوچەکەیان لە دەست دا."

سیامەند دەڵێت: ''کۆبانێ بە خراپی مایەوە، عەفرین لەدەست چوو، ڕەوشی ئابووری خراپ بوو، بە هەزاران گەنجی کورد شەهید بوون، کەچی تەنیا پەکەکە سوودمەند بوو و زیانی بە کورد گەیاند.''

سیامەند لێدوانێکی بەشار ئەسەد بەبیر دەهێنێتەوە، کە گوتبووی، بەپێی ڕێککەوتن ''باکووری سووریا''ی ڕادەستی پەکەکە کردووە و، دوای تەواوبوونی ڕیککەوتنەکە ئەو ناوچانە لە دەست پەیەدە دەردەهێننەوە.

کــاروان بـــاعەدری