هەولێر-KDP.info- بڕیارده‌ری لیژنه‌ی دارایی له په‌رله‌مانی كوردستان دەڵێ، هه‌رێمی كوردستان تووشی قه‌یرانی ئابووری نه‌بووه‌و ته‌نیا به‌هۆی نه‌خۆشی كۆڕۆنا و دابه‌زینی نرخی نه‌وت به‌شێوه‌یه‌كی كاتی داهاتی كه‌مبووه و حكوومه‌ت ده‌ستی به‌یاسای چاكسازی كردووه و به‌مه‌ش كێشه‌ی كه‌مبوونه‌وه‌ی داهات چاره‌سه‌ر دبێت.
محه‌مه دئیلخانی، بڕیارده‌ری لیژنه‌ی دارایی له په‌رله‌مانی كوردستان، بۆ ماڵپه‌ڕی فه‌رمیی پارتی دیموكراتی كوردستان گوتی، هه‌رێمی كوردستان بۆ ئه‌وه‌ی بتوانی قه‌ره‌بووی قه‌یرانی ئابووری بكاته‌وه چه‌ندین رێگای له‌پێشه له‌وانه گرنگترینیان جێبه‌جێ كردنی یاسای چاكسازی و كه‌مكردنه‌وه‌ی پڕۆژه وخه‌رجییه‌كان و یاسای چاكسازییش ته‌نها بۆزیاد كردنی داهات نییه و ده‌ستكاری مووچه‌ش ناكرێت، به‌ڵكو رێكخستنه‌وه‌ی مووچه ده‌كرێت و ئه‌وانه‌ی شایسته نین مووچه‌یان ده‌بڕدرێت و ئه‌وانه‌ی شایسته‌ن مووچه‌یان پێده‌درێت، بۆیه دادپه‌روه‌ری بۆ مووچه ده‌گه‌ڕێته‌وه و ده‌بێته هۆی ئه‌وه‌ش حكوومه‌ت بتوانی مووچه بدات ئه‌گه‌ر قه‌یرانی ئابووریش دروست بێت.
محه‌مه‌د ئیلخانی گوتیشی، بڕیاره تا مانگی چوار حكوومه‌ت په‌یره‌وی یاسای چاكسازی ئاماده بكات وهیچ په‌یوه‌ندی به نه‌خۆشی كۆڕۆنا ودابه‌زینی نه‌وت نییه، به‌ڵكو په‌رله‌مان حكوومه‌تی پابه‌ند كردووه له‌ماوه‌ی سێ مانگ یاساكه جێبه‌جێ بكات، بۆیه ئه‌گه‌ر ئه‌و قه‌یرانانه‌ش دروست نه‌بووایە حكوومه‌ت ئه‌و رێكارانه‌ی ده‌گرته به‌ر.
وتیشی، به‌جێ به‌جێكردنی یاساكه دوو كاری گرنگ ئه‌نجامده‌درێت، یه‌كه‌م رێكخستنه‌وه بە مووچه ده‌كرێت و دادپەروەری دروست دبێت، دووه‌م پاره بۆ حكوومه‌ت زیاد ده‌كات ئه‌مه‌ش وا ده‌كات قه‌ره‌بووی كه‌مبوونه‌وه‌ی داهات ده‌كات و ئه‌وه‌ی حكوومه‌ت باسیكردووه كه داهات كه‌مبووه ئێستایه و، ته‌نها بۆ قۆناغێكی كورته و هه‌ركاتێك نه‌خۆشیه‌كه نه‌ما ئه‌وكات داهاتی ناوخۆ زیاد ده‌بێت و نرخی نه‌وتیش زیاد ده‌بێت، بۆیه ئێمه قه‌یرانی ئابوریمان نییه، چونكه جموجۆڵی بازرگانی به‌رده‌وامه و ژێرخانی ئابووریشمان هه‌یه كه نه‌وته.
بڵند ئیبراهیم