هه‌ولێر -KDP.info- چاودێرێكی سیاسی ده‌ڵێ، چوونی شاندی سیاسیی كورد بۆ به‌غدا گرنگه،‌ بۆ ئه‌وه‌ی به‌رچاوڕوونیان هه‌بێت له‌باره‌ی پێكهێنانی حكوومه‌تی نوێ و هیچ حكوومه‌تێك به‌بێ پێكهاته‌كان پێک نایەت و حكوومه‌تیش كاتی ده‌بێت و ته‌نیا بۆ شه‌ش مانگ ده‌بێت، به‌ڵام ناتوانێ به‌ ته‌نها حكوومه‌ت به‌ڕێوه‌ ببات و سه‌ركه‌وتوو نابێت.

چاودێری سیاسی و ماموستای زانكۆ، د. بوخاری عه‌بدوڵڵا، بۆ ماڵپه‌ڕی فه‌رمیی پارتی دیموكراتی كوردستان گوتی: "چوونی شاندی سیاسیی كوردی بۆ به‌غدا گرنگه‌ و مه‌به‌ستی چوونه‌كه‌شیان ئه‌وه‌یه‌ به‌رچاوڕوونییان هه‌بێت له‌باره‌ی كابینه‌ی نوێی حكوومه‌ت و ئەوەی کە سه‌رۆكوه‌زیران به‌ته‌مای چییه‌، چونكه‌ حكوومه‌ت كاتییه‌ و له ‌شه‌ش مانگ تێپه‌ڕ ناكات و ناتوانێ چوار ساڵ حوكم بكات و ته‌نها بۆ ڕزگاركردنی عێراقە كه‌ تێی كه‌وتووه‌.

د. بوخاری عه‌بدوڵڵا گوتیشی: "ڕاسته‌ حكوومه‌ته‌كه‌ كاتییه‌، به‌ڵام پێویسته‌ هه‌موو پێكهاته‌كان تێیدا به‌شدار بن و به‌رنامه‌ی حكوومه‌ت دیار بێت و ئاماده‌كاری بۆ هه‌ڵبژاردن بكات، به‌ڵام ناتوانێ به ‌ته‌نیا هیچ بكات، ئه‌گه‌ر پێكهاته‌كان به‌شدار نه‌بن."

عه‌بدوڵڵا باسی له‌وه‌ش كرد: "سه‌رۆكوه‌زیرانی نوێی عێراق نابێت هیچ كارێك بكات پێچه‌وانه‌ی ده‌ستووری عێراق بێت و به‌رنامه‌كه‌یشی كاتی ده‌بێت و پێویسته‌ كاتیش بۆ جێبه‌جێكردنی به‌رنامه‌كه‌ی دیاری بكات و له ‌ماوه‌ی ئه‌و چه‌ند مانگه‌دا ئه‌و به‌رنامه‌ی هه‌یه‌تی، جێبه‌جێی بكات."

بڵند ئیبراهیم