Hewlêr-KDP.info- Ciwan Yûnis Rojbeyanî Seroka Komîteya Navçeyên Kurdistanî yên Dervey Îdareya Herêma Kurdistanê di Parlemantoya Kurdistanê de, dibêje, Parlemantoya Kurdistanê rapora xwe li ser rewşa navçeyên Kurdistanî yên benda 140 daye destê Neteweyên Yekbûyî û konsulxaneyên welatan li Herêma Kurdistanê, ku tê de amaje bi erebkirina Kerkûkê û serhildana DAIŞê li wan navçeyan tê kirin.

Ciwan Yûnis Rojbeyanî ji malpera KDP.info re ragihand: “Di rapora xwe de, jibilî ku me behsa proseya bi erebkirin û dagîrkirina zevî û erdê Kurdan li Kerkûkê û navçeyên din ên Kurdistanî kiriye, herwiha me behsa serhildana DAIŞê û metirsiyên wê li ser navçeyê jî kiriye. Di raporê de tê daxwazkirin ku Hêzên Pêşmerge vegerin wan navçeyên Kurdistanî, ji ber ku hêzên Iraqê nikarin navçeyê biparêzin, lewma jî DAIŞ li wan navçeyan derdikeve.”

Rojbeyanî wiha got: “Me rapora xwe da destê Neteweyên Yekbûyî û konsulxaneyên welatan li Hewlêrê û niha em li hêviya bersiva wan e. Ji ber xerabiya rewşa Iraqê, niha gotûbêjên me bi Bexdayê re rawestane û em li hêviya avakirina hikûmeta nû ya Iraqê ne, da ku em dîsa dest bi danûstandinan bikin û em daxwaz bikin ku rewşa Kerkûkê baş bibe.”