Hewlêr-KDPinfo- Serok Mesûd Barzanî bi boneya salvegera Şoreşa Eylûlê peyamek belav kir û tê di dibêje, ev destkeft û azadiya niha li Başûrê Kurdistanî heye ji berhem û berdewamiya qûrbanîdan û têkoşîna zarok û gedeyên gelê me ye di şoreşa Eylûlê de.
Ev jî tekesta wê peyamê ye:
“Bi navê xwedayê mezin û dilovan
Şoreşa Mezin a Eylûlê bi rêberayetiya cenabê Barzaniyê Nemir şoreşeke siyasî û civakî û çekdarî û seranserî ya gelê Kurdistanê bû ku bingeheke bihêz ji bo xebata rizgarîxwaz a gelê Kurdistanê li dijî zilm û dagîrkeriyê danî.
Di Şoreşa Eylûlê de Pêşmerge, kadir, mamoste, xwendekar, jin û hemû çînên civaka Kurdistanê ji netewe û olên cûda, li hemû navçeyên Kurdistanê pêkve û ji bo yek armanca pîroz a neteweyî û niştimanî xebat kirin û dîrok û serwerî tomar kirin.
Ev destkeft û azadiya niha heye ji berhem û berdewamiya qûrbanîdan û têkoşîna zarok û gedeyên gelê me ye di şoreşa Eylûlê de.
Her di vê şoreşê de bû ku îrade û xweragirî û evîna niştiman di nava gelê me de ewqasî bihêz bû ku herdem dijminê pirçek li hember de dişikiya û cara dawî jî wê îradeyê dijmin anî ser masaya danustandinê.
Şoreşa Mezin a Eylûlê hem li dijî sîtemkariyê bû, hem jî pêgihandina mirovên Kurdistanê, ji bo wê yekê ku gelê Kurdistanê mafên xwe nas bike û bihaya bilind a mirovane û Kurdperwerane li nav xelk û kadir û Pêşmerge de dirust bibe. Bi awayekî ku li beranber dijmin de jî bi tenê ji bo carekê jî, şoreş dest ji bo kirdareke nebir ku nakok be ligel biha û yasayên şer.
Wane û bihayên wê şoreşa mezin divê ji bo me hemûyan bi bilindî bimînê û bibin çira û rênîşandera paşaroja me û nifşên paşarojê.
Di salvegera 58 saliya hilpêkirina şoreşa Eylûlê de, pêzanînên min ji bo wan hemû Pêşmergeyên qehreman û wan têkoşeran heye ku li şoreşa Eylûlê da rola xwe hebûye û ked û xebatê kirine qurbaniyê dane, çi ewên li nav me da nemane û çi jî ewên ku hê jî li jiyanê da mane. Hezaran silav li giyanê pakê şehîdên şoreşa Eylûl û hemû şehîdên rêya azadiyê.
Mesûd Barzanî
10 ê Eylûla 2019”