كەركووك -KDP.info- بەڕێوەبەری كشتوكاڵی كەركووك گوتی، پڕۆسەی تەعریب لە شاری كەركووك بەردەوامە و لە ئێستادا جگە لە دەوروبەر، پڕۆسەكە لەناو شاری كەركووك بە شێوەیەكی چڕ دەستی پێكردووە، هەروەها توركمانیش لە تەلەعفەرەوە توركمانەكان بۆ ناحیەی تازە لە سنووری كەركووك دەگوازنەوە.
مەھدی موبارەك، بە ماڵپەڕی فەرمیی پارتی دیموكراتی كوردستانی ڕاگەیاند: "پڕۆسەی تەعریب لە سنووری پارێزگای كەركووك بەردەوامی ھەیە و ئێستا جگە لە دەرەوەی شار، لە ناوسەنتەری شاری كەركووكیش بە شێوەیەكی چڕ دەستی پێكردووە و عەرەب بۆ سەر زەویی زیادەڕۆ ھاوردە دەكرێت و ئیدارەش ھەموو ئاسانكارییەكیان بۆ دەكات لە گواستنەوەی ناسنامە و پسوولەی خۆراك".
موبارەك گوتیشی، تا ئێستا ئامارێكی ورد نییە، بەڵام ژمارەیەكی یەكجار زۆری عەرەب ھاوردە كراون و پڕۆسەكە بە ھەموو شێوەیەك بەردەوامە و رانەگیراوە، چونكە مەبەستیانە زۆرترین عەرەب ھاوردە بكەن، بۆ ئەوەی رێژەی عەرەب لە كەركووك زیاتر بێت.
ناوبراو باسی لەوەش كرد، جگە لە ھاوردەكردنی عەرەب، توركمانیش بە ھەمان شێوە توركمانەكانی تەلەعفەر بۆ ناحیەی تازەی سەر بە پارێزگای كەركووك دەگوازنەوە و لەوێ نیشتەجێیان دەكەن، چونكە دانیشتووانی ئەو ناحیەیە زۆرینەی توركماننشینن.
بڵندئیبراھیم