زاخۆ-KDP.info- سەرپەرشتیاری ئیدارەی سەربەخۆی زاخۆ دەڵێ، ئامادەکاریی تەواو کراوە بۆ چوارەمین فێستیڤاڵی شەڵ و شەپک کە بڕیارە لە ١٠ـی ئەم مانگەدا لە زاخۆ دەست پێ بکات، گوهدار شێخۆ ئاشکراشی دەکات کە ئەمساڵ جیاواز لە ساڵانی ڕابردوو، جگە لە هەر چوار پارچەی کوردستان، چەندین گرووپی بیانی و نێودەوڵەتیش بەشداری تێدا دەکەن، چونکە ئامانجمانە لە ئایندەدا فێستیڤاڵەکە بکەینە کەرنەڤاڵێکی نێودەوڵەتی.

هەولێر-KDP.info- بەڕێوەبەری گشتیی دیوانی وەزارەتی ناوخۆ دەڵێ، بەبۆنەی ڕۆژی جیهانیی ژینگەوە و بە سەرپەرشتیی کوردستان فاوندەیشن، ئەمڕۆ هەڵمەتێکی فراوانی پاککردنەوە و ژینگەپارێزی لە بەنداوی گۆمەسپان بەڕێوە دەچێت، دکتۆر هێمن میرانی ئاماژە بەوە دەکات کە سەرجەم هێز و تیمەکانی وەزارەتی ناوخۆ بە هاوکاریی وەزارەتەکانی شارەوانی و تەندروستی لەم هەڵمەتەدا بەشدارن و ئامانجی سەرەکیش بڵاوکردنەوەی ڕۆشنبیریی پاراستنی شوێنە گەشتیارییەکانە لەلایەن هاووڵاتیانەوە.

هەولێر-KDP.info- مەکتەبی پەیوەندییەکانی دەرەوەی پارتی دیموکراتی کوردستان، لە بروسکەیەکی فەرمیدا بۆ باڵیۆزخانەی سوید و نوێنەری ئەو وڵاتە بۆ کاروباری عێراق، گەرمترین پیرۆزبایی بەبۆنەی ڕۆژی نیشتمانیی شانشینی سویدەوە ئاراستەی حکوومەت و گەلی دۆستی سوید دەکات.

هەولێر-KDP.info- ئەمڕۆ شەممە 2026.6.6، لەژێر چاودێری ئومێد خۆشناو، پارێزگاری هەولێر، فەرمانگەی ژینگەی هەولێر بە هەماهەنگی بەڕێوەبەرایەتی ئەندازەی پارکەکان و کۆمپانیای کۆڕەک تیلیکۆم، بەبۆنەی ڕۆژی ژینگەی جیهانەوە لە ڕێورەسمێکدا لەسەر ڕووبەری (3132 مەتر2) پارکێکی مۆدێرن لە گەڕەکی نووسەرانی شاری هەولێر کرایەوە.

​دهۆک-KDP.info- د. شیرین حوسنی، بەرپرسی بەشی ڕێکخستن لە مەکتەبی ڕێکخستنی پارێزگای دهۆکی پارتی دیموکراتی کوردستان، لە لێدوانێکی تایبەتدا بۆ ماڵپەڕی فەرمی پارتی ڕایگەیاند، "بە نوێنەرایەتی مەکتەبی ڕێکخستنی پارێزگای دهۆک و ئیدارەی سەربەخۆی زاخۆ، بەشدار بووین لە پێشانگای هاوبەشی پەیمانگەكانی ڕەند بۆ پڕۆژە داهێنەرەکانی قوتابییان، کە لەژێر دروشمی بە (زانست و هێزی گەنجان وڵات بنیاد دەنێین) ڕێکخرابوو. ئەم پێشانگایە بە ئامادەبوونی بەرپرسانی حکوومی، حزبی و کارگێڕی پەیمانگەکان کرایەوە، کە تێیدا نزیکەی ٥٠ پڕۆژەی جیاوازی قوتابییان لە بوارە جۆراوجۆرەکاندا نمایش کران."