هەولێر-KDP.info- ناتانیاهۆ دەڵێ، "ئەردۆگان دیکتاتۆرە و ئەردۆگانیش، ناتانیاهۆ بە سەرکوتکار و سەرۆکایەتیکردنی دەوڵەتی تیرۆر وەسف دەکات.
سەرکۆماری تورکیا، تەییب ئەردۆگان، لە گوتارێکیدا دەڵێ، "ئیسڕایل فەلەستینی داگیر کردووە و تاوانی دژ بە مرۆڤایەتی و کۆمەڵکوژی ئەنجام دەدات."
سەرۆکوەزیرانی ئیسڕایل، بنیامین ناتانیاهۆیش وەڵام دەداتەوە و دەڵێ، "سەرۆکی تورکیا مافی ئەوەی نییە ئامۆژگاریی ئەخلاقیی ئیسڕایل بکات، لەکاتێکدا ئەو باکووری قوبرسی داگیر کردووە، هاوکات، سوپاکەی لە گوندەکانی کوردان لە ناوخۆ و دەرەوەی تورکیا منداڵ و ژن سەردەبڕێ."
ناتانیاهۆ بەیاننامەیەکی دەرکردووە و تێیدا دەڵێ، "ئێستا ئامانج لە شێتیی ڕۆژانەی ئەرۆگانی دژە یەهود لەئارادایە. ئیسڕایل بووە بە مۆتەکە بۆ ئەو. بەڵام پێشوەچوون هەیە، لە ڕابردوودا ئەردۆگان هەر دوو سەعات جارێک هێرشی دەکردە سەرم، بەڵام ئێستا کردوویەتی بە شەش سەعات جارێک."
پێوەندیی تورکیا و ئیسڕایل ئەمساڵ و تایبەت پاش ئەوەی یاسای نەتەوەی یەهود لە پەرلەمانی ئیسڕایل دەرکرا، ئاڵۆزیی زیاتری تێکەوت.
ئەوکات ئەردۆگان بە توندی ئیسڕایلی خستە بەر ڕەخنە و بە "دەوڵەتی فاشیترین و ڕەگەزپەرست لە جیهاندا وسفی کرد."
زریان زیاد