Hewlêr-KDP.info- Parlamentoya Kurdistanê îro civiya û di civînê de berbijêra Fraksyona YNKê Rêwaz Fayiq weke seroka nû ya Parlamentoya Kurdistanê hate hilbijartin.

Dr. Rêwaz Fayiq ji Fraksyona Yekîtiya Niştimaniya Kurdistanê (YNK) ye.

Cîgirê Serokê Parlamentoya Kurdistanê Hêmin Hewramî ragihand: “Di civîna îro ya parlamentoyê de dengdan ji bo hilbijartina seroka nû ya parlamentoyê bi veşartî hat kirin û Rêwaz Fayiq bi dengê 72 parlamenteran weke Seroka Parlamentoya Kurdistanê hate hilbijartin.”

Hevrika wê Şadiye Newzad ji Fraksyona Nivşê Nû jî 16 deng bi dest xist û 9 deng jî betal bûn.

Li gorî rêkeftina di navbera Partiya Demokrata Kurdistanê (PDK) û Yekîtiya Niştîmaniya Kurdistanê (YNK) de, serokatiya parlementoyê para YNKê ye, lê heya niya YNK ew kursî wernegirtibû û ji ber wê yekê jî PDK Dr. Vala Ferîd bi şêweyekî demkî kiribû seroka parlamentoyê.

Dr. Vala Ferîd niha di hikûmeta nû de bûye Wezîra Herêmê û duhî wek wezîr sûnda yasayî xwar.