هەولێر-KDP.Info-  (یڤگینی ئەرچنتسییڤ) كۆنسووڵی گشتیی رووسیا لە هەولێر، لە دیمانەیەكیدا لەگەڵ ماڵپەڕی فەرمیی پارتی دیموكراتی كوردستان، باس لە دۆخی ئێستای كوردستان و بەرەكانی جەنگ و هەوڵەكانی هاوپەیمانان دەكات بۆ ڕووبەڕووبوونەوەی داعش و، ڕایشیدەگەیێنێ، "بێگومان لەگەڵ ئەو چارەنووسە و ئەو بڕیارە دەبین، كە خەڵكی كوردستان هەڵیدەبژێرێت."

داعش سیاسەتی لە پشتەوە هەیە
لەو دیمانەیەی ماڵپەڕی فەرمیی پارتی دیموكراتی كوردستاندا، لەبارەی بۆچوونی ڕووسیا لەسەر داعش، (یڤگینی ئەرچنتسییڤ) دەڵێت: "داعش هیچ روونكردنەوەیەكی تری نییە جگە لەوەی رێكخراوێكی مەترسیداری تیرۆریستن، تێڕوانینی رووسیایش بۆ داعش هەمان تێڕوانینە و هیچ جیاوازی نییە، ئەو رێكخراوە رێكخراوێكی تیرۆریستیی مەترسیدارە كە هەڕەشەن بەسەر تەواوی مرۆڤایەتییەوە، هەروەها داعش كۆكراوەیەكی ئەو كەسانەن كە لە ژیانیان دۆڕاون و تووڕەن لە ژیان، من زۆر بە راشكاوانە قسە دەكەم، بەڵێ داعش سیاسەتی لە پشتەوە هەیە، بێگومان كە خەڵكی ئایینی و فكری تووندڕەویان لە پشتەوەیە، هەروەها تێكەڵەیەكی حزبی بەعسیشیان لەگەڵە، بەڵام ئەمانە كەمینەن، وەلێ بەشی زۆری رێكخراوی داعش، ئەو كەسانەن كە لە ژیانی خۆیان سەركەوتوو نەبوون، خوێندەوار نین، دابڕاوییەكی زۆریان لەگەڵ ژیان هەیە، بۆیە ئەوانە بەشێكی زۆریان لە ژیان دابڕاون".

داعش زۆر لەوە ئاڵۆزترە كە دەیبینین
لەبارەی ئەوەی كە ئایا دەركەوتەی داعش لە ئەنجامی هەرەسی دەوڵەتی عێراق و سوریا نەبوو؟ ئایا ئێوە پێتان وانیە مانەوەی عێراق و سووریا بە یەكپارچەیی، مەترسییە؟ (یڤگینی ئەرچنتسییڤ) گوتی: "من لەو باوەڕەدا نیم كە تەنیا هۆكاری دەركەوتنی داعش هەرەسی دەوڵەتی عێراق و سووریا بێت، داعش پێكهاتەیەكی زۆر فراوانترە لەوەی كە ئێمە هەستی پێ دەكەین و بۆی دەچین، هەروەها زۆر لەوە ئاڵۆزترە كە ئێمە بمانەوێت بە سادەیی بۆی بچین، راستە بەشێكیان پەروەردەی قوتابخانەی جیاوازن، بەڵام بەشێكی زۆریان لەو وڵاتانەی ترەوە هاتوون كە لە ژیانی رۆژانەی خۆیاندا زۆر بێزار بوون، لەو ژیانە بێزار بوون كە تێیدان، ئیدیعای داعشیش لەسەر ئەو بنەمایە بووە كە وەرن ئێوە لەگەڵ ئێمە بن بۆ ئەوەی ژیانێكی باشتر دروست بكەین و ژیانێكی خۆشتر بۆ هەمووان فەراهەم بكەین، ئەوانیش هاتوون، بەڵام دەبێت ئەوە لەبیر نەكەین كە ئەوان لە منداڵیی خۆیان لەناو ئەو پەروەردە داعشییەدا نەبوونە، ئەمە لە ئەنجامی شكستی پەروەردەی ئەو كەسانەوە دێت كە لەناو ژیانی خۆیاندا تووسیان بووە و داعشیان بە دەرفەت زانیوە بۆ ژیانێكی تر".

شەڕی کۆبانێ ناخهەژێن بوو
لە وەڵامی ئەو پرسیارەی كە هەست بە جیاوازیی زۆر دەكرێت لە نێوان ئەمەریكا و رووسیادا لە رووبەڕووبوونەوەی داعش و، ئەم جیاوازییەیش چییە لە تێروانینی رووسیا؟ (یڤگینی) پێی وایە: "لە رووبەڕووبوونەوەی داعش رووسیا و هاوپەیمانی نێودەوڵەتی بە سەركردایەتیی ئەمەریكا، هیچ جیاوازییەكیان نییە، چونكە هەردوولامان یەك ئامانجمان هەیە، ئامانجەكەیش كۆتاییهێنانە بە داعش، بەڵام جیاوازیی نێوانمان هەندێك لەو گرووپانەن، كە ئەمەریكا هاوكارییان دەكات لە شەڕی داعش، كە ئێمە وەك رووسیا ئەو گرووپانە بە تیرۆریست دەزانین، بۆیە جیاوازیی ئێمە ئەوەیە نامانەوێت هاوپەیمانی تیرۆریستێك بین دژی تیرۆریستێكی تر. مەبەستت لە گرووپی تیرۆریستی كێیە؟ لەناو ئۆپۆزسیۆنی سووریا بۆ نموونە جەیشی ئیسلام و چەند سوپای تر كە تووندڕەون و ئەمەریكا هاوكارییان دەكات، بە هێزی ناتووندڕەو دەیانبینێت، بەڵام لە بنەڕەتدا وا نییە، ئەوانە گرووپی تیرۆریستین و ئامادەن شەڕ بكەن و شەڕیش دەكەن، بۆیە بە باوەڕی ئێمە ئەوانە گرووپی تیرۆریستین، بۆیە ئێمە پێمان وایە گرووپە نەرمەكان ئەوانەن كە ئامادەن دانوستاندن بكەن، دانوستاندن دەكەن، ئێمە لەگەڵ ئەوەداین كە هەموو رێكخراوەكان هەموو حزبە سیاسییە ئۆپۆزسیۆنەكان، دانوستاندن لەگەڵ رژێمی (بەشار ئەسەد) بكەن، جگە لەمە وەك دیپلۆماتكارێك نا، بەڵكو وەك مرۆڤێك زۆر شت لە سووریا منیان ئازار داوە، بۆ نموونە شەڕی كۆبانی كە لەوكاتەدا من پێم خۆش بوو حكوومەتی سووریا هاوكاریی كۆبانیی بكردبایە، بەڵام نەیكرد، من پێم وایە ئەمە هەڵەیەكی ناخهەژێن بوو، بەڵام ئێمە دەبێت پشگیری لەوە بكەین كە هەموو لایانەكانی ئۆپۆزسیۆن، دانوستاندن بكەن لەگەڵ (بەشار ئەسەد)، بۆ دۆزینەوەی رێگایەكی ئاشتیانە و چارەسەری كێشەكان".

ئێمە رێز لە ئیرادە و رای خەڵكی كوردستان دەگرین
كۆنسووڵی گشتیی ڕووسیا لە كوردستان، لەبارەی هەرێمی كوردستانەوە كە لە كوێی سیاسەتی دەرەوەی رووسیایە؟ ئەوە دەخاتە ڕوو: "سەرەتا پێم خۆشە ئەوە بڵێم ئێمە هاوكاریی سەربازیمان پێشكەشی پێشمەرگە كردووە و بەردەوامیش دەبین لە پێشكەشكردنی هاوكاریی سەربازی بۆ پێشمەرگە، لەبەر ئەوەی ئێمە دوژمنێكی هاوبەشمان هەیە، پێشمەرگەیش ئەو هێزەیە كە ئێستا ئەو شەڕە دەكات، دەربارەی ئەوەی كە سیاسەتی رووسیا بەرامبەر هەرێمی كوردستان چۆنە؟ ئێمە تا ئەو ساتەوەختەیش هەرێمی كوردستان بە بەشێك لە عێراق دەبینین، لە واقیعشدا ئەوە راستە، بۆیە ئێمە وا مامەڵە دەكەین، بەڵام هەروەكو لەماوەی رابردوودا گۆێتان لێ بوو، جێگری وەزری دەرەوەی رووسیای فیدراڵ (میخائیل بەگدانۆڤ) رایگەیاندبوو، ئێمە رێز لە ئیرادە و رای خەڵكی كوردستان دەگرین، هەر كاتێك وەك هەرێمی كوردستان بریار لە چارەنووسی خۆیان بدەن، ئێمە بێگومان لەگەڵ ئەو چارەنووسە و ئەو بڕیارە دەبین، كە خەڵكی كوردستان هەڵیدەبژێرێت".

دەبێت یەكتر قبووڵ بكەین
سەبارەت بە پرسی ئەوەی كە رووسیا چۆن سەیری مافی بڕیاردانی كورد دەكات بۆ دەوڵەت؟ (یڤگینی ئەرچنتسییڤ) زیاتر بۆ ماڵپەری فەرمیی پارتی قسە دەكات و روونی دەكاتەوە: "ئەزموونی رووسیا بە قۆناغێكی زۆر دوورودرێژدا تێپەڕیوە، یەكێك لە كۆمارەكانیشی، كۆماری تەتەرستانە، كە زۆربەی دانیشتووانەكەی موسڵمانن، هەروەها یەكێكە لە كۆمارە هەرە گەشەسەندووەكانی رووسیا و چەندین كارگەی كیمیایی و چەندین كێڵگەی بەرهەمهێنانی نەوت و كارگەی دەرمانی هەیە، زۆربەی زۆری كارگە پێشكەوتووەكانی تری رووسیا لە تەتەرستانن، بۆیە ئەمە بەو مانایە كە رووسیا بە ئەزموونێكی دوورودرێژدا تێپەڕیوە، بۆ ئەوەی بگاتە ئێرە و زۆربەی كەسانی تر جێگایان ببێتەوە لەو دەوڵەتەدا، هەروەها هیچ كات هەست بە كەمینە نەكەن، بۆیە ئێمە لە رووسیا قبووڵی واقیعەكەمان كردووە، وایش مامەڵەی لەگەڵ دەكەین، چونكە دەبێت یەكتر قبووڵ بكەین كە ئێمە جیاوازین و بەرەو ئاییندەیەكی باشتر بڕۆین، دەربارەی رۆژهەڵاتی ناوەڕاستیش روونە كە زۆر كەس و زۆر لایەن هەوڵ دەدات كە كاریگەریی ئێمە پاڵ بۆ دواوە بنێت، بەڵام ئێمە هەوڵی خۆمان دەدەین و بەردەوام دەبین، بۆ ئەوەی ژیانی باشتر بنیات بنێین، بۆیە دەبێت هەموومان رێز لە كەمینەكان بگرین و رێزیش لە بڕیارەكانیان بگرین".

كورد و كوردستان براوەی یارییەكان دەبن
لەوەڵامی ئەو پرسیارەی كە كورد دەیەوێت لە چوارچێوەی عێراقدا بڕیار بدات، ئایا ڕووسیا چۆن پشتیوانی لێ دەكات؟ کۆنسووڵی ڕووسیا پێی وایە كە: "بەڵێ كوردستان دەتوانێت جیا ببێتەوە و پشت بە رووسیایش ببەستێت، هەر بڕیارێك كە دەیدات، ئێمە  لەسەر چەند بنەمایەك مامەڵە دەكەین، یەك لەو بنەمایە ئەوەیە، رووسیا باوەڕی تەواوی بە یاسای نێودەوڵەتی هەیە، كارەكانی خۆیشی لەسەر یاسا نێودەوڵەتییەكان جێبەجێ دەكات، لەبەر ئەوەی خۆی ئەندامێكی كاریگەری نێودەوڵەتییە، بۆیە رووسیا سەیری كوردستان دەكات وەك هاوپەیمانێكی زۆر باش، هەروەها بەردەوامین لە بەهێزكردنی هاوپەیمانەتی لەگەڵ كوردستاندا و لەداهاتووی كوردستانیشدا بێگومان ئێمە وا مامەڵەی لەگەڵدا دەكەین، ئێمە نەك بۆ رۆژهەڵاتی ناوەڕاست، بەڵكو بۆ هەموو جیهان سیاسەت بۆ ئارامی و خۆشگوزەرانی دەكەین. ئەم سیاسەتەیش تەنیا لەسەر بنەمای باوەڕبوون نییە، بەڵكو ئەمە شتێكی حەكیمانەشە كە دەبێت بكرێت، لەبەر ئەوەی ئەمڕۆ كورد واقیعێك و فاكتەرێكی سەرەكییە لە رۆژهەڵاتی ناوەڕاست، رۆژانەیش فاكتەرەكەی بەردەوام بەرەو بەهێزی دەڕوات، هەروەها كاریگەری تەواویشی لە رۆژهەڵاتی ناوەڕاست هەیە، بۆیە ئێمە مامەڵە لەگەڵ واقیعەكەدا دەكەین، نەك تەنها لەبەر ئەوەی باوەڕێكی مۆراڵی و ئەخلاقیی هەیە، ئەمەیش بڕیارێكی زۆر عەقڵانەیشە كە ئێمە دەبێت پشگیری هەموو نەتەوەكان بكەین بۆ ئەوەی بە ئارامی بژین، هەروەها دەمەوێت شتێكی تریش بڵێم كە كوردستان بە دۆخێكی زۆر سەختدا تێدەپەڕێت، لە رووی ئابوورییەوە دۆخێكی سەختی هەیە، سەرباری ئەمەیش بووەتە شوێنێك كە پەناهەندەیەكی زۆری لە خۆی گرتووە، ئێستایش كوردستان زۆر بەناووبانگە لە جیهان، كورد زۆر جێگە و پێگەی تایبەت بە خۆی لە جیهاندا دروست كردووە، لە هەموو وڵاتانی جیهاندا خەڵك زۆر بە شانازییەوە باسی پێگەی كورد و كوردستان دەكات و رێزی بۆ كوردستان هەیە، ئەم دۆخە بەرەو گۆڕانكاری دەڕوات، بۆیە هەموو ئاماژەكان لەو یارییەدا بۆ ئەوەن كە كورد و كوردستان براوەی یارییەكان دەبن، بۆیە دەبێت ئەو واقیعە لە بەرچاو بگرین و ئەو سۆز و هاوخەمییەی جیهان بۆ ئێوە هەیەتی، دەبێت بیپارێزن و هەوڵ بدەن بەهێزتری بكەن".

كارزان و سەنگەر هەورامی