بەختیار شاخی
ڕووداوەکانی ئێستای ناو پارلەمانی عێراق، نیشانەی گەڕێکی دیکەی شەڕی مەزهەبی و تێکچوونی زیاتری پەیوەندیی لایەنەکانی بەشداری دەستەڵاتی بەغدان. ئەو یەکهەڵوێستییەی فراکسیۆنە کوردستانییەکان لە بەغدا پێشانیان دا، بۆ خەڵکی کوردستان مایەی دڵخۆشی بوو، بۆ هەندێ لایەنیی عێراقییش مایەی دڵتەنگی و توڕەیی. بۆیە دوور نییە جارێکی دیکە بکەونەوە وێزەی سەرکردایەتیی کوردستان و بەوە تۆمەتباری بکەن کە دژی چاکسازیین لە بەغدا و نەچوونەتە ڕیزی مانگرتووانه‌وه. فشاری گرووپە زاڵەکانی عێراقیش کە بە ناوی شەقامەوە پێشان دەدرێت، ئاماژەیە بۆ ئەوەی کە لانیکەم ئێستا بردنەوەی بەرەی مانگرتووان ئەگەرێکی بەهێزە. بەڵام ئایا سەرەڕای دژایەتیی ئەمه‌ریکا، ئەو بردنەوەیە بەردەوام دەبێت؟
لەو نێوەدا کورد نابێ ببێتە سووتەمەنیی ئەو شەڕە. سەرەڕای شەڕی سەپاوی تیرۆریستان و قەیرانی دارایی و بڕینی بودجەی کوردستان لە لایەن بەغدا و هاتنی نزیکەی دووملیۆن ئاوارە و پەناخواز، کوردستان بە خۆڕاگریی مایەوە و هەنگاوی زیاتریش چووە پێش. پێشمەرگە بووە سیمبولی ئازایاتی و دوژمنێکی تێکشکاند، کە هەموو جیهان لێی دەترسێ. لە ڕووی دیپلۆماسییەوە پێگەی کوردستان باڵاتر بووە، پشتیوانیی فراوان لە خواست و مافە ڕەواکانی گەلی کوردستان دەکرێت و، دەرفەتی زێڕین بۆ دابینکردنی داهاتوویەکی گەشتر بۆ خەڵکی کوردستان هاتووه‌تە ئارا. بەڵام بە داخەوە پێدەچێ تەنانەت ئەو پێشکەوتن و دەرفەتە زێڕینەش، بیری هەندێ سیاسەتکاری کورتبینی وڵاتەکەمانی نەگۆڕیبێت و، لە بازنەی داخراوی کۆنەقین ڕزگاری نەکردبن.
هەواڵەکان باس لە هاتنە ئارای پڕۆژەیەکی نوێ دەکەن، پڕۆژەی (بەرەی سلێمانی). بیرۆکە و پلانی ئەو پڕۆژەیە لە نامەیەکی بەڕێز نەوشیروان مستەفا بۆ باڵەکانی یەکێتی، بەرجەستە بووە. بە گوێرەی پڕۆژەکە، داوا لە کاک کۆسرەت و هێرۆخان کراوە هەرچی ناکۆکیی نێوانیان هەیە وەلای بنێن و لە دەوری نەوشیروان مستەفا کۆ ببنەوە و، دواتر لەگەڵ کۆمەڵی ئیسلامی و "گرووپی سلێمانییەکان"ـی ناو یەکگرتووی ئیسلامییش ڕێک بکەون، بۆ ئەوەی (بەرەی سلێمانی) لە دژی ئەوەی لە بیری خاوەنی پڕۆژەکەدا بە "هەژموونی بارزانی و پارتی لەسەر سیاسەتی ئێستا و داهاتووی کوردستان" ناسراوە، پێک بهێنن.
بیرۆکەی ئەو پڕۆژەیە لە پاشخانێکی کورتبین و شکستخواردووەوە سەرچاوە دەگرێت. سەربەخۆییی کوردستان پڕۆژەیەکە لە خزمەتی تاک تاکی گەلی کوردستاندایە و "دەوڵەتی بارزانی" نییە وەک ئەوان بانگەشەی بۆ دەکەن و، وزەیان بۆ دژایەتییەکەی تەرخان دەکەن. بۆیە بە دڵنیاییەوە بەرەی لۆکاڵی و بیری ناوچەگەرایی لەلای خەڵکی کوردستانیش ڕەت دەکرێتەوە، چونکە ئەو هەوڵە کاتێک هاتووه‌تە ئارا کە گەلەکەمان چاوەڕێی ئەوەیە یەکهەڵوێستیی فراکسیۆنەکانی کوردستان لە بەغدا زیاتر قووڵ بێتەوە و، ببێتە یەکهەڵوێستی لە دەوری پڕۆژەی سەربەخۆیی. دڵخۆشیی خەڵک بە ڕاگەیەندراوی هاوبەشی هەردوو مەکتەبی سیاسیی پارتی دیموکراتی کوردستان و یەکێتیی نیشتیمانیی کوردستان لە 16ـی4ـی2016 و پشتیوانییکردنی هەردوولا لە ڕیفراندۆم، ئاماژەیەکی ڕوونە کە گەلی کوردستان لەگەڵ سەربەخۆیی و پێشکەوتندان و هیچ هەوڵێکی ناوخۆیی و دەرەکی ناتوانێ ڕێ لەو ئامانجە بگرێت. ئیدی تەنانەت ئەگەر دەوڵەتانی دراوسێ بە خۆیان و سێبەرەکانیانەوە هەموو توانایان بۆ دروستکردنی ئاستەنگ لەبەردەم سەربەخۆیی و پێشکەوتنی کوردستان بخەنەگەڕ، هەوڵەکان نەزۆک دەبن. خەڵکی کوردستان لە دووبەرەکی و ژیان لەناو دەوڵەتی فاشیلدا ماندوو بووە و دەیەوێ ئازاد بێت، بۆیە کاروانی سەربەخۆیی دەگاتە مەنزڵ.