هەولێر-KDP.info-  نوێنەری كوردانی ئێزدی لە پەرلەمانی كوردستان دەڵێت، لە دوای رزگاركردنەوەی لە چنگ تیرۆریستانی داعش، هەوڵ و پلانی باش بۆ ئاوەدانكردنەوەی شنگال هەیە.

(شێخ شامۆ) نوێنەری كوردانی ئێزدی لە پەرلەمانی كوردستان، بە ‌ماڵپەری فەرمیی پارتیی دیموكراتی كوردستانی ڕاگەیاند: "لە دوای ئازادكردنی شنگال لەلایەن هێزی پێشمەرگەی كوردستانەوە، لەلایەن سەرۆكایەتیی هەرێمی كوردستان و حكوومەتەوە هەوڵ بۆ ئاوەدانكردنەوەی هەیە، هەروەك دەبینین لەسەر ئاستی نێودەوڵەتی و كوردستان و عێراقیش هەوڵەكان بۆ ئەو مەبەستە بەردەوامن، چونكە شنگال وێران بووە ‌و ‌پێویستی بە بوودجەیەكی زۆر هەیە تاوەكو ئاوەدان بكرێتەوە".

(شامۆ) گوتیشی: "‌دەزانین كە حكوومەتی هەرێم ئەوەی لە توانایاندا بێت بۆ شنگال دەیكات، بەڵام بە تەنیا ئاوەدانكردنەوەی شنگال بۆ هەرێم زەحمەتە و بارگرانیەكی گەورە دەبێت، بۆیە پێویستە هاوكاریی نێودەوڵەتی هەبێت، هەروەك (سەرۆك بارزانی)ـیش جەختی كردەوە كە، پێویستە پشتیوانییەكی نێودەوڵەتی بۆ ئاوەدانكردنەوەی شنگال هەبێت".

جێی ئاماژەیە، شارۆچكەی شنگال لە رۆژی هەینی 13ـی ئەم مانگەدا، لەلایەن هێزەكانی پێشمەرگەی كوردستانەوە بە سەرپەرشتیی ڕاستەوخۆی (سەرۆك بارزانی) لە تیرۆریستانی داعش پاك كرایەوە و ئازاد كرا.

نەشوان بەرزنجی