ئحسان ئامێدی
ژ كهڤندا ژیارا كوردهواری یا سهخت و دژوار و ب زهحمهت بوو، لێ یا پری چیرۆك و سهربۆر و سهرهاتی و سهرفرازی بوو، گهلهك پهند و گۆتن ژێ چێبووینه، بووینه رێنیشادهر و رێسایێن ژیانێ، وهكه مرۆڤ هزرا خوه تێدا بكهت و ل سهر بچیت دێ رهوشا وی باشتر بیت و ژیانهكا سهرفرازتر بدهستڤهئینیت، لێ دیاره ژیوارێ پاشكهفتنێ و نهزانینێ و نهخویندهواریێ و ژیكڤهقهتیانێ یێ زالبوویه ل سهر جڤاكێ كوردستانێ ئێدی تێكههلی پێشكهفتن و شارستانیهتا سهردهمیانه نهبوویه و هۆكارێن هێزێ پهیدانهكرینه و بكارنهئیناینه كو بشێن ببنه كیانهكێ مادی (دهولهت).
سیارێ خهلكێ ههر یێ پهیایه پهندهكا رهسهنا پێشینانه، ب وان كهسان دهێت گۆتن یێن ههژار و بێ دهستههلات، ئهوێن ب نهچاریا خوه، خوه پێدڤی پێچێبوویان دكهن داكو هاریكاریهكێ بۆ بكهن و پێدڤیهكا وی بۆ بقهتینن، ههروهكو بۆ وان كهسان ژی دهێته گۆتن یێن بێ دهوار و ل گهل كاروانهكی بچیت، خودان دهوار ههمی دسیارن و دكهیفخۆشن و یێ بێ دهوار ژی ژ خهمێن خوهدا ل هیڤیا خودان دهوارهكی یه رهحمهكێ پێبهت و ل دهمهكی ل دهوارێ خوه سیاركهت، و ئهگهر خودان وژدانهك لێ دهركهفت و بۆ دهمهكی ل دهوارێ خوه سیاركر و بێهنڤهدانهك دایێ، گهلهك ڤهناكێشیت دێ بێژیتێ وهره خارێ، ئهو ژی ب وان سهرودلا ڤه دێ پهیا ببیت و دێ مینیته ب هیڤیا پێن خوه كا دێ چهند هاریكهن دا بگههیت قوناغێ.
دڤێت مرۆڤ ڤێ باش بزانیت كو مرۆڤ بخۆ وهكو تاك پاشی وهكو كۆم بهرپرسه ژ خوه، خوه بخودانكهت و خوه بریڤهببهت و پێدڤیێن ژیانا خوه دابینكهت، و ململانا خوه یا هزری و دهروونی و جڤاكی و سیاسی و ئابووری بكهت پێناڤی ژیانهك باشتر و سهرفرازتر، لهوان ژی گۆتیه رهشۆ ب دهستێن خوه ههكه ئاڤێ تو بری، رهشۆ ئاراستهكرنا تاكیه كو ب بهرپسیاریا خوه رابیت و ئهرك و كارێ خوه ئهو بخوه بجهبینیت و نههێلیته ب هیڤیا یێ دیڤه، ئهو دشێت یێ دی وهكو توخمهكێ هاریكار بكاربینیت، لێ پشتبهستنێ پێ نهكهت، دهمێ تو وهكو تاك ههبی و یێ ب هێز و كارا بی دێ هاریكار ژی زۆربن و بهروڤاژی وهكو تو یێ لاواز بی دێ ل ئاستێ لاوازیێ سهرهدهری ل گهل ته هێته كرن، ئهڤه د ناڤ ژیارا مه یا جڤاكی دا گهلهكا دیار و ئاشكهرایه، وهكو ئێكێ ههژار خواستنێ دكهت هاریكاریێن بچووك بۆ دهێنهكرن و كێم ب دهست دكهڤیت، لێ ههكه ئێكێ پێچێبووی داخوازهكێ بكهت دێ هاریكاریێن مهزن بۆ هێنه كرن و دێ گهلهك بدهستكهڤیت!، و ئهڤه رهوشا مه یا سیاسیه ژی، چونكی كوردستان دهولهت نینه و وهلاتهكێ داگیركری و پارچهپارچهكری و لێكڤهكریه، نه شیایه ببیته هێزهك مهزن و كاریگهر سهرهرای هندێ ژی ل ههمی قۆناغان دا ئیرادهكا باش ههبوویه و خهبات و بهرخودان كریه و گۆری و قوربانی داینه و شیایه ههبوونا خوه وهكو مللهت بپارێزیت و ل هندهك سهردهمان دا كیانێن تایبهت بخوهڤه چێكهت و پێشڤهببهت. بهلێ نهشیایه ببیته دهولهت، چونكی دامهزراندنا دهولهتێ ل ڤی سهردهمی هۆكارێن ناڤخوهیی و هۆكارێن دهرهكی یێن هاریكار و ههڤگونجای دڤێن، گهلهك جاران كوردستان شیایه شۆرهش و سهرهلدانان بكهت و دهڤهرێن مهزنێن كوردستانێ رزگاركهت و كاودانهكێ ناڤخوهیێ هاریكار دروست كهت بۆ دهولهتهك سهربخوه، لێ هۆكارێ دهرهكی رێگربوویه و ئهو دهرفهت ژ دهست بریه، ههروهكو تنێ ل سهدێ بیستێ دهرفهتا شۆرهشا شێخ مهحموودی كو ئنگلیزان نه هێلای ب ئارمانجا خوه رابگههیت و شۆرهشێن سمكۆیێ شكاك و ئاگری و شێخ سهعید پیران و سهید رزا دێرسیمی و قازی محهمهدی و یا بارزان و یا ئیلۆنێ و سهرهلدانێ كو حوكمهتێن توركیا و ئیرانێ و عیراقێ و ههڤپهیمانێن وان نههێلان كوردستان ب ئارمانجا خوه بگههیت.
بوویه دهولهتێن مهزن ب ههمی هێز و شیانێن خوه پشتهڤانیا مللهتهكی كر بیت و دهولهتهك بۆ چێكربیت، ئسرائیل و دهولهتێن كهنداڤی نموونێن پێشچاڤن، لێ ئهو شانس بهر كوردستانێ نه كهفتیه، و نهبوویه دهولهتهكا زلهێز پشتهڤانیا كوردستانێ كربیت ل سهر بنهمایێ باوهریێ بۆ گههشتن ب مافێن خوه یێن چارهنڤیسی، لێ خهباتا گهلان پێناڤی مافێن خوهیێن چارهنڤیسی خواستا گهلان بخوهیه ئهو بخوه بیر ل رهوشا خوه دكهن و ئارمانجێن خوه دهستنیشان دكهن و پێدڤیێن خهباتێ پهیدادكهن و بزاڤ و خهباتێ دكهن و رژدیێ و داكۆكیێ ل سهر دكهن و بهردهوامیێ و درێژیێ پێدهن، و ل وی دهمی ئهگهر پشتهڤانیا دهرهكی ژی پهیدا بوو، ئهڤه دهرفهتا سهركهفتنێ و گههشتن ب ئارمانجێ ب ساناهیتر و نێزیكتر بوو.
دبێژن ئیرادا مللهتان ههر دێ سهركهڤیت، و ئهڤه باوهریهك نهگۆڕه ل دهف كوردستانیان ژی، لێ ئهڤ ئیراده ل كوردستانێ سهرنهكهفتیه ژ بهركو ئهڤ ئیراده نهبوویه ئیرادهك تهڤایی و ههڤگرتی، ئیرادا كۆمێن ژێكڤهقهتیای و ژێكدابڕی و ههڤڕك و ههڤناكۆكه!، دههمان دهمدا كو ئهڤ ئیراده ههیه خهبات و بزاڤ ژی ههیه داكو ئهڤ ئیراده ببیته یا ب ههڤرا و تهڤایی داكو بشێت ببیته هێزا كارا یا كو بشێت ئارمانجێن خوه بجهبینیت، ئێدی ل بیرا خوه بینه ڤه دهمێ زانایێن مه گۆتی ل هیڤیا دهرا خولیا سهرا!، چدی زێدهتر نهمینه ب هیڤیا خهلكی ڤه مه هاندهن و مه گهرمكهن و پاشی مه پاشڤهببهن ڤه، و پهرێ وهكو بهرێ تنێ گۆری و قوربانی و زهحمهت و وێرانی بمه بمینیت!.
پشتی چارسالێن شهرێن ههرێما كوردستانێ دژی داعش و رزگاركرنا تهڤایا ههرێما كوردستانێ د گاڤهكێ دا ب كۆمڤهبوونا پیلانهكا عیراقی و ههرێمایهتی و نێڤدهولهتی و گرۆپهكێ خیانهتكاری ل 16/10/2017 جارهكا دی ههمی ئهو دهڤهرێن رزگاركری هاتن داگیركرن ڤه، خوه ئهگهر ههرێما كوردستانێ خۆراگرتبا و بهرهڤانی ژ خوه كربا و شهرێ پاراستنا دهستكهفتیێن خوه كربا و گرۆپهك ژوان نه چووبا د خهندهكا خیانهتێ دا، دا هێزێن عیراقی تووشی شكهستنێ بن چونكی رهوشا لهشكریا عیراقێ یا لاواز بوو و شیانێن شهرهكێ مهزن نهبوون، وی دهمی دا رهوش بهر ب ئاقارهكێ دیتر چیت و دا دهستكهفتیێن ههرێمێ مینن. نها ژی ل رۆژئاڤا یا دكهڤیته بهر ههمان لێمشت لهشكرێ توركیا یا هێرشهكا مهزن دكهته سهر و پشتهڤانیا نێڤدهولهتی یا لاواز ب وی تنێ ئیرادا گرۆپێ شهركرنێ و شیانێن وان مانه و ئهگهر بشێن خۆراگرن دێ سهرفرازیهك بۆ مینیت و ئهگهر تووشی شكهستنێ بوون ئهڤه ئهو دهستكهفتیێ ب گۆری و قوربانیا هاتیه ب دهستڤه ئینان هاتنه ژ دهستدان!.
وهكو دیار دڤان شهران دا هۆكارێ دهرهكی یێ كارا و كارتێكهر بوو لهوا وهكو ئهو هۆكار نهمای ههر زی پاشڤهچوونهك ب رهوشا كوردستانێ كهفت ژ بهر هندێ ئهم پێدڤی پێداچوونهكێ ینه. پێداچوون بۆ خواندنهڤهیا رهوشا كوردستانێ سهر ژنوی و هۆكارێن هێزێ و یێن لاوازیێ یێن وێ دهستنیشانكهین و ستراتیژیهكا دیتر دانین بۆ خهباتا رزگاریخوازا كوردستانێ یا پشتبهست ب هیز و شیانێن ناڤخوهیی و سوود دیتن ل هۆكارێن دهرهكی ل سهر بنهمایێن باوهریێ و بهرژهوهندێن ههڤپشك.
بهر ب ئیرادهكا تهڤایى یا ههڤگرتی و كۆمبوونا ههمی شیان و پێچێبوونا د چارچووڤێ بهرنامهكێ ههڤپشكێ ئێكگرتی دا پێناڤی سهركهفتنا كوردستانێ.