ھەولێر-KDP.info- بەڕێوەبەری جێبەجێکردنی شەقامی ١٥٠ مەتریی شاری ھەولێر گوتی، قۆناغی یەکەمی دروستکردنی شەقامی ١٥٠ مەتری دەستی پێ کردووە و شەقامەکە بە پێنج قۆناغ دروست دەکرێت و ماوەی دروستکردنەکەیشی ھەزار و٢٥٠ ڕۆژە و پڕۆژەکەش بەقەرز دروست دەکرێت تاوەکو تەواو نەکرێت و حکوومەت پارەی بۆ خەرج ناکات.
بەڕێوەبەری جێبەجێکردنی شەقامی ١٥٠ مەتری شاری ھەولێر، سەرتیپ قادر، بە ماڵپەڕی فەرمیی پارتی دیموکراتی کوردستانی ڕاگەیاند: "پڕۆژەی شەقامی ١٥٠ مەتری کۆمپانیای ھێمن گرووپ دروستی دەکەن بەقەرز تاوەکو حکوومەت پارەی ھەبێت بیانداتەوە و ئێستا پڕۆژەکە دەستی پێ کردووە و بە پێنج قۆناغ پڕۆژەکە تەواو دەکرێت."
سەرتیپ قادر گوتیشی: "ئەو پڕۆژەیە ھاوشێوەی جادەی ١٢٠ مەتری دەبێت و بە تەواوکردنی جادەکە قەڵەباڵغیی ناوشار نامینێت و ڕێگاکانیش زۆر نزیک دەبنەوە، بۆیە سوودی زۆری بۆ خەڵکی ھەولێر دەبێت و گرنگییەکی زۆریشی ھەیە."
قادر باسی لەوەش کرد: "بڕیارە دروستکردنی ئەو شەقامە لەوەی ھەزارو٢٥٠ ڕۆژ دروست بکرێت."
گوتیشی: "ھەرکاتێک کۆمپانیا پڕۆژەکەی تەواو کرد ئەوکات حکوومەتی ھەرێمی کوردستان پارەیان بۆ خەرج دەکات."
سەرپەرشتیاری پڕۆژەکە ئەوەیشی خستە ڕوو: "جادەکە بە شێوەیەکی ستانداری جیھانی دروست دەکرێت و درێژییەکەیشی ٧٠ کم دەبێت و بە ھەمان شێوەی جادەی ١٢٠ مەتریی شاری ھەولێر دەبێت و شەقامێکی خێرایە و ھیچ پێچی نییە و ھەمووی لە شێوەی بەرزە پرد دەبێت."
بڵند ئیبراھیم