دهۆک-KDP.info- کارگیریا پارێزگەها دهۆکێ بەرهەڤى بۆ وەرزێ زڤستانێ کرینە ژبۆ پارستنا ئاواران،تا نوکە چ پلان نینن ئاوارە ڤەگەرن  و ب تایبەت دڤێ قۆناغێدا، ژبەر خەلکێ سڤێل ئارامى و تەناهى لدەڤەرێن خۆ دڤێت و پێدڤى ب خزمەتگوزاریانە و بجهئینانا یاسایانە دژى وان کەسێن ئەڤ تاوانێن نەمرۆڤایەتى ئەنجامداین.

ل 3 هەیڤا 8ى سالا 2014ێ، رێژەکا گەلەک مەزن ژ خەلکێ دەڤەرا شنگال و چەندین دەڤەرێن عیراقێ ژ بەر تیرۆرستێن داعشێ بەرەڤ هەرێما کوردستانێ ڤە هاتن و بەهرا پتریا وان ل دهۆکێ ئاکنجى بوون، ژبۆ ڤێ ئێکێ ئیسماعیل محەمەد، هاریکارێ پارێزگەرێ دهۆکێ بۆ کارۆبارێن ئاواران و پەنابەران بۆ مالپەرێ فەرمیێ پارتى دیموکراتى کوردستان گۆت:" ل سالا 2014ێ تا ئەڤ سالە گەلەک هاریکارى ژلایێ رێکخراوێن دەولى و نافخویى ڤە ل ئاوارا و پەرنابەرێ ل پارێزگەها دهۆکێ دهاتەکرن، بەلێ ئەڤ سالە ئەو هارێکارى کێم بووینە و رەنگە ئەو ئاوارەیێن زڤرینە دەڤەرێن خۆ جارەکا دیتر ڤەگەرنە دهۆکێ ڤە".

ئیسماعیل محەمەد خویاکر:" نیزیکى 117 رێکخراوێن بیانى پێشتەڤانیا ئاواران و پەنابەران دکر، کۆ پلان و کارکرنا رێکخراوان لسەر دو خالان بوویە ئەو ژى (ڤەگەریانا خەلکى بۆ لسەر ئەردێ خۆ، دوبارە پەیداکرنا ئارامیێ و ئاڤادانیێ لوان دەڤەران)".

هاریکارێ پارێزگەرێ دهۆکێ بۆ کارۆبارێن ئاواران و پەنابەران ئاشکەرا کر:" رێژا 90% ئاوارەیێن پارێزگەها دهۆکێ، کوردێن ئیزیدى نە و بتنێ 2% خواستیە ڤەگەرنە دەڤەرێن خۆ و رێژا 98% ناڤەگەرن و پێدڤى ب خزمەتگوزاریانە و هەمى لبن خیفەتان و ئاڤاهیێن نیڤەروو دا دژین".

دەربارەیى ڤەگەریانا ئاواران بۆ سەر جهێن وان ئیسماعیل محەمەد زەلالکر:" تا نوکە چ پلان نینن ئاوارە ڤەگەرن  و ب تایبەت دڤێ قۆناغێدا، ژبەر خەلکێ سڤێل ئارامى و تەناهى لدەڤەرێن خۆ دڤێت و پێدڤى ب خزمەتگوزاریانە و بجهئینانا یاسایانە دژى وان کەسێن ئەڤ تاوانێن نەمرۆڤایەتى ئەنجامداین".

هاریکارێ پارێزگەرى خویاکر:" هەر شاندەکێ سەرەدانا مە بکەت ژێ دخوازین هاریکاری و پێشتەڤانیا خەلکێ ئاوارە بکەن و رێکخراوێن نوکە ل دهۆکێ ب رێژا 50% هاریکاریێن خۆ کێم کرینە، هەر چەند کارگیریا پارێزگەها دهۆکێ بەرهەڤى بۆ وەرزێ زڤستانێ کرینە ژبۆ پارستنا ئاواران و چاڤەریێ وەزیرێ کوچ و کوچبەرانین یێ عیراقێ بهێت هاریکاریا خەلکێ ئاوارە بکەت".

هەلز عەلى سەلیم