هەولێر-KDP.info- نێچیرڤان بارزانى و هادى ئه‌لعامرى، پرۆسه‌ى سیاسیى عێراقیان تاوتوو كرد و هاوكارى و پشتگیرییان بۆ عادل عه‌بدولمه‌هدى دووپات كرده‌وه كه بۆ پێكهێنانى كابینه‌ى داهاتووى حكوومه‌تى عێراق ڕاسپێردراوه و هیواى سه‌ركه‌وتنیان بۆ خواست.
ئه‌مڕۆ پێنجشه‌ممه 4/10/2018 نێچیرڤان بارزانى سه‌رۆكوه‌زیرانى هه‌رێمى كوردستان، پێشوازى له هادى ئه‌لعامرى، سه‌رۆكى هاوپه‌یمانیى ئه‌لفه‌تح كرد.
له كۆبوونه‌وه‌یه‌كدا پرۆسه‌ى سیاسیى عێراق و قۆناغى داهاتووى پرۆسه‌كه‌یان تاوتوێ كرد و جه‌ختیان له پرۆسه‌یه‌كى سیاسیى ته‌ندروست بۆ ئێستا و قۆناغى داهاتووى عێراق كرده‌وه به شێوه‌یه‌ك وه‌ڵامده‌ره‌وه‌ى خواست و هیواكانى پێكهاته‌كانى عێراق بێت و هه‌موو پێكهاته‌كان خۆیان له پرۆسه‌ى سیاسیى و به‌ڕێوه‌بردنى وڵاتدا ببینه‌وه و له‌پێناو سه‌قامگیرى و سه‌ركه‌وتنى پرۆسه‌ى سیاسیدا، پارێزگارى له بنه‌ماكانى سازان و هاوسه‌نگى و هاوبه‌شى بكرێت.
له كۆبوونه‌وه‌كه‌دا ئه‌لعامرى جه‌ختى له گرنگیى هاوبه‌شییه‌كى كاراى هه‌رێمى كوردستان له پرۆسه‌ى سیاسیى عیراقدا و چاره‌سه‌ركردنى كێشه‌كانى هه‌ولێر ـ به‌غدا به‌پێى ده‌ستوور كرده‌وه، هه‌روه‌ها هاوبه‌شیى هه‌رێمى كوردستانى له پرۆسه‌ى سیاسیى عێراقدا به بنه‌مایه‌كى سه‌ره‌كیى سه‌ركه‌وتنى پرۆسه‌كه و له به‌رژه‌وه‌ندیى ته‌واوى عێراقدا له قه‌ڵه‌م دا، بۆ ئه‌م مه‌به‌سته‌ش به‌رده‌وامیى گفتوگۆ و دیدار و كۆبوونه‌وه‌كانى نێوان هه‌ردوو حكوومه‌تى هه‌رێمى كوردستان و حكوومه‌تى فیدرالى عێراقى به پێویست زانى.
هه‌ردوولا پرسى دامه‌زراندنى كابینه‌ى داهاتووى حكوومه‌تى فیدراڵى عێراقییان خسته به‌ر باس و هاوكارى و پشتگیرییان عادل عه‌بدولمه‌هدى دووپات كرده‌وه كه بۆ پێكهێنانى كابینه‌ى داهاتووى حكوومه‌تى عێراق ڕاسپێردراوه و هیواى سه‌ركه‌وتنیان بۆ خواست.