هەولێر-KDP.info- مه‌سروور بارزانی پێشوازی له سه‌رۆكی ئه‌نجوومه‌نی نوێنه‌رانی عێراق كرد و لە دیدارەکەدا سه‌رۆكی ئه‌نجوومه‌نی نوێنه‌رانی عێراق رایگەیاند كه له‌نزیكه‌وه له‌گه‌ڵ سه‌رجه‌م فراكسیۆنه‌كانی ئه‌نجوومه‌ن كاری هاوبه‌ش ده‌كه‌ن له گه‌ڵاڵه‌كردن و ده‌ركردنی یاساكان به ئامانجی گێرانه‌وه‌ی متمانه‌ی نێوان پێكهاته‌كان و خزمه‌تكردنی باشتری هاووڵاتیانی وڵات بێ جیاوازی.
ئه‌مڕۆ 22/9/2018 مه‌سروور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له محه‌مه‌د حه‌لبووسی سه‌رۆكی نوێی ئه‌نجوومه‌نی نوێنه‌رانی عێراق كرد.
له‌م دیداره‌دا وێڕای گفتوگۆكردن له‌باره‌ی پێشهات و گۆڕانكارییه‌كانی عێراق، تیشكخرایه سه‌ر پێویستی به‌شداری كارای گشت لایه‌ك و پێكهاته‌كانی عێراق له دروستكردنی بڕیاره‌كان و دووپات له پره‌نسیپی هاوبه‌شی و هاوسه‌نگی و ته‌وافوق له به‌ڕێوه‌بردن له‌سه‌رجه‌م ده‌زگا و دامه‌زراوه‌كانی وڵات كرایه‌وه.
له دیداره‌كه‌دا مه‌سروور بارزانی پیرۆزبایی خۆی پێراگه‌یاند به‌بۆنه‌ی ده‌ستنیشانكردنی به سه‌رۆكی نوێی ئه‌نجوومه‌نی نوێنه‌رانی عێراق و هیوای سه‌ركه‌وتنی له‌م ئه‌ركه نوێیه‌ی بۆ خواست و پشتگیری و هاوكاری ته‌واوی خۆشی بۆ ده‌ربڕی.
له‌لای خۆیه‌وه سه‌رۆكی ئه‌نجوومه‌نی نوێنه‌رانی عێراق، وێرای سوپاسكردنی راوێژكاری ئه‌نجوومه‌نی ئاسایشی هه‌رێمی كوردستان بۆ ئه‌م پێشوازییه،جه‌ختی له‌وه‌ش كرده‌وه، كه له‌نزیكه‌وه له‌گه‌ڵ سه‌رجه‌م فراكسیۆنه‌كانی ئه‌نجوومه‌ن كاری هاوبه‌ش ده‌كه‌ن له گه‌ڵاڵه‌كردن و ده‌ركردنی یاساكان به ئامانجی گێرانه‌وه‌ی متمانه‌ی نێوان پێكهاته‌كان و خزمه‌تكردنی باشتری هاووڵاتیانی وڵات بێ جیاوازی.