Kurdistan Democratic Party

Renewal  .  Justice  .  Coexistence


 

بەرەو بنیاتنانی‮ ‬كوردستانێكی‮ ‬بەهێز

سەلام عەبدوڵڵا
ئەمڕۆ یەكەمین رۆژی دەستپێكردنی بانگەشەی هەڵبژاردنە بۆ خولی پێنجەمی پەرلەمانی كوردستان و هەموو حزبە مۆڵەت پێدراوەكانی هەرێم دەتوانن لەم ڕۆژەوە دروشم و پڕۆگرامەكان و بەرنامەیان بۆ ئایندەی هەرێم بەدەنگدەران ئاشنا بكەن و بەوپێیەش داوای پشتگیری و دەنگیان لێبكەن.
پارتی دیموكراتی كوردستان بە سلۆگانی بنیاتنانی كوردستانێكی بەهێز بەشداری كارا لەم هەڵبژاردنەدا دەكات و داوای متمانە و پشتیوانی لە دانیشتوانی هەرێم دەكات، بۆ بەدیهێنانی كوردستانێكی بەهێز كە لە ماوەی (5) ساڵی پێشوودا بەهۆی هێرشی دڕندانەی چەتەكانی داعش و ئابڵۆقەی ئابووریی بەغدا كە لە بڕینی بودجەی هەرێمدا خۆی دەنواند، هەرێمی كوردستانی بە ئاقارێكی ترسناكدا برد و گوشارێكی یەكجار گەورەی خستبووە سەر هەرێم كە خۆشبەختانە بەهۆی خەباتی قارەمانانەی پێشمەرگە گیان لەسەر دەستەكانی كوردستان و خۆڕاگری و دانبەخۆداگرتنی دانیشتوانی هەرێم و سیاسەتی حەكیمانەی سەرۆك بارزانی و پارتی دیموكراتی كوردستان، توانی سەربەرزانە ئەو قۆناغە ترسناكە تێپەڕێنێت و هێزی رەشی داعش تێكبشكێنێ و هەرێم و قەوارەكەی لە پیلانی نەیار و ناحەز و دوژمنان بپارێزێت.
ئێستا ئیدی كاتی ئەوە هاتووە كە جارێكی تر بە گوڕوتینێكی نیشتمانپەروەرانەوە كاری جیددی بكەین بۆ بنیاتنانی كوردستانێكی بەهێز، پاش نەمانی داعش و سوككردنی ئابڵۆقە داراییەكانی بەغدا لەسەر هەرێم؛ ئەو ئەركەش بە یارمەتیی هاووڵاتییانی هەرێمی كوردستان دەخاتە ئەستۆی خۆی و كاری بنیاتنەرانەی بۆ دەكات، چ لە رووی بەهێزكردنی هێزی پێشمەرگەی كوردستان و یەكخستنەوەی سەرجەم یەكەكانی پێشمەرگە لە سوپایەكی مۆدێرن و بەهێزدا كە ئەركی پاراستنی هەرێم بكاتە كاری سەرەكیی خۆی و ئامادەكاریی هەمیشەیی بۆ داكۆكیكردن لەسەروەری هەرێم و دانیشتوانی دەستەبەر بكات.
هەروەك لە رووی ئابوورییەوە هەوڵ دەدات بۆ پێشخستنەوەی سێكتەری نەوت و گازو بایەخێكی زۆریش دەدات بە كەرتی كشتوكاڵ لەسەر بنەمای ئەو ڕاستییەی كە ژینگەی هەرێم گەلێك لەبارە بۆ بەرەو پێشەوەچوونی ئەو بوارە.
هەروەك پارتیمان كە مێژوویەكی دوورودرێژی كاری دیپلۆماسیی هەیە لەو بوارەشدا دەیەوێت پەیوەندییە دیپلۆماسییەكانی پەرە پێبدا و كۆنسووڵخانە و نوێنەرایەتیی وڵاتان لە هەرێم زیاد بكات، بۆ ئەم مەبەستە و بۆ بەدیهێنانی ئەم ئەركە پیرۆزانە، داوا لە خەڵكی هەرێمی كوردستان دەكات كە لە رۆژی 9/30 دا دەنگ بە لیستی (183)ی پارتی دیموكراتی كوردستان بدەن و بەشدار بن لە بنیاتنانی كوردستانێكی بەهێزدا.