هەولێر-KDP.info-   سەرۆک بارزانی بەبۆنەی ٤٢هەمین ساڵیادی دامەزراندنی حزبی سۆسیالیستی دیموكراتی كوردستان پەیامێکی پیرۆزبایی ئاراستەی محەمەد حاجی مەحموود و مەکتەبی سیاسی حزبەکەی کرد کە ئەمە دەقەکەیەتی:

برای بەڕێزمان كاك محەمەد حاجی مەحموود
بەڕێز مەكتەبی سیاسی حزبی سۆسیالیستی دیموكراتی كوردستان

بەبۆنەی ٤٢هەمین ساڵیادی دامەزراندنی حزبە تێكۆشەرەكەتانەوە گەرمترین‌ و جوانترین پیرۆزبایتان ئاراستە دەکەم، لە رێگەی ئێوەی بەڕێزیشەوە سڵاو و پیرۆزبایی بۆ سەرجەم ئەندام ‌و لایەنگرانی حزبە تێكۆشەرەكەتان دەنێرم.

حزبی سۆسیالیستی دیموكراتی كوردستان لە ڕۆژی دامەزراندنییەوە تا ئەمڕۆ ڕۆڵێکی گرینگ و کاریگەری لە خەباتی ڕزگاریخوازی گەلەکەماندا گێڕاوە و بەشێکی گرینگی بزاڤی کواردایەتییە و لەو پێناوەدا ژمارەیەکی زۆر شەهیدی پێشکەش بە خاک و گەلی کوردستان کردووە. ڕۆڵی جوامێرانە و ئازایانەی بەڕێز سکرتێری حزب و سەرکردایەتی و پێشمەرگەکانی سۆسیالیست لە شەڕی تێکشکاندنی ئەفسانەی داعشدا، وێنەیەکی ڕوونی دڵسۆزی و نیشتیمانپەروەریی ئێوەیە و هەرگیز لەبیر ناکرێت.

یادی دامەزراندنی حزبە تێکۆشەرەکەتان پیرۆز بێت و هیوادارم كاروانی خەباتی ئایندەتان، شانبەشانی سەرجەم هێزە رزگاریخوازەكانی گەلی كوردستان بەردەوام بێت و سەرکەتوو بن.
لەگەڵ ڕێزمدا

مەسعوود بارزانی
٨ـی٨ـی٢٠١٨