دهۆک-KDP.info- بەرپرسێ پشکا پیشەسازى ل ژۆرا بازرگانیا دهۆکێ راگەهاند، فەرە حکومەتا هەرێما کوردستانێ گرنگیێ بدەتە کەرتێ پیشەسازى، جونکى ئەڤ کەرتە ستووینا پێشکەفتنا هەمى مللەتایە، دیسان ئەڤ کارگەهێن ل هەرێما کوردستانێ کار دکەن ب کوالیتەکا باش و بلند بەرهەمێ خومالى دروست دکەن.
حەمید روبەتکى، بەرپرسێ پشکا پیشەسازى ل ژورا بازرگانیا دهۆکێ بۆ مالپەرێ فەرمیێ پارتى دیموکراتى کوردستان ئاخڤت:" بەهرا پتریا خەلکى ل هەرێما کوردستانێ پشتبەستنێ لسەر کارگەهێن شیرەمەنیا دکەن وەک (ماست و پەنیر و شیر)، کۆ بەرهەمئینانا وان ب کوالیتەکا باش و بلند دئێتە دروستکرن، کۆ ئەڤ بەرهەمە دگەهیتە پارێزگەهێن عیراقێ ژى (مووسل، بەغدا، بەسرا و ئەنبار) و خەلکێ هەرێما کوردستانێ ژى مفایەکێ باش ژڤى بەرهەمێ خومالى دبینیت".
روبەتکى بەحسکر، حکومەتا هەرێما کوردستانێ هەردەم هەولدایە ئەردى بۆ دروستکرنا کارگەهان دابین بکەت و مولەتێ ب خەلکى بدەت داکۆ کەرتێ پیشەسازى ل هەرێما کوردستانێ گەشە ببیت، بەلێ ژئەگەر پەیدابوونا قەیرانا دارایى هندەک ئەڤ کەرتى لاواز ببوو و نوکە هەولدان دئێنەکرن جارەکا دیتر گرنگى بڤى کەرتى بدەنەڤە.
بەرپرسێ پشکا پیشەسازى ل ژۆرا بازرگانیا دهۆکێ زەلالکر:" ئەڤ کارگەهە بەهرا پتر ل زاخۆ و دهۆک دداناینە، حکومەتا هەرێما کوردستانێ دڤى وەرزیدا تا رادەکێ کومرک لسەر خەلک و دەڤەرێن نە سەر ب هەرێمێ ڤە گران کرینە، داکۆ بەرهەمێ خومالى یێ کوردستانێ بهێتە ڤرۆتن و خودانێن کارگەها ژى مفادار بن ژبۆ پتر بەرهەمئینانا شیرەمەنیا".
حەمید روبەتکى پشنیارکر و گۆت:" فەر حکومەتا هەرێما کوردستانێ گرنگیێ بدەتە کەرتێ پیشەسازى، جونکى ئەڤ کەرتە ستووینا پێشکەفتنا هەمى مللەتایە، کۆ هندى پیشەسازى لاواز بیت دێ خەلکێ بیانى مفادار بیت، ژبەر هندێ گرنگە حکومەت سلفا و مولەتا بدەتە خودانێن کارگەهان و ئەردى ل گۆندا بۆ خەلکەکى دابین بکەت داکۆ کارگەهان لسەر ئاڤا بکەن و دوور بن ژ جهێ نیشتەجێبوونا خەلکێ داکۆ کارتێکرن لسەر ژینگەها خەلکى ژى نەبیت، بۆ نموونە، ل هەرێمێ چەندین گۆندێن بەرهەمدارێن فیقى هەنە، حکومەت دشێت کارگەهەکێ بۆ مورەبێ و شەرەبەتا لوان گۆندان دروست بکەت ژبۆ جوتیار و خەلک ژى مفادارێ بەرهەمێ خومالى یى پاقژ ببیت".
ل سنۆرێ پارێزگەها دهۆکێ نیزیکى 450 کارگەهێن جورە و جور سەر ب رێڤەبەریا وەبەرهێنانێ نە و 1200 کارگەهێن بچویک ل ژۆرا پشەسازى و بازرگانیا دهۆکێ هەنە.
هەلز عەلى سەلیم