دیالە-KDP.info- لە ھەموو ناوچەکانی سنووری پارێزگای دیالەدا بنکەکانی دەنگدان کراونەتەوە و ھەموو پێکھاتەکان بەبێ جیاوازی بەشداری لە پرۆسەکەدا دەکەن، تا ناوچەکانیان بگەڕێندرێنەوە سەر ھەرێمی کوردستان.

 

(حاکم حەسەن)، کارگێڕی لقی پارتی دیموکراتی کوردستان لە خانەقین، بە ماڵپەڕی فەرمیی پارتی دیموکراتی کوردستانی ڕاگەیاند: ''لە سنووری پارێزگای دیالە لە ھەموو قەزا و ناحیەکاندا لە بەیانییەوە بنکەکانی دەنگدان کراونەتەوە، خەڵکیش پۆل پۆل بەشداری لە پرۆسەکەدا دەکەن، نەک تەنیا کورد، بەڵکو ھەموو پێکھاتەکانی کورد و عەرەبی سوننە و شیعە و پێکھاتەکانی دیکەش چوونەتە سەر سندووقەکانی دەنگدان.''

 

لەبارەی دەنگدانی ئاوارەکانیشەوە ناوبراو گوتی: ''بنکەی دەنگدان بۆ ئاوارەکانیش کراونەتەوە و ئاوارەکان لەو بنکانەی بۆیان کراونەتەوە، دەنگی خۆیان دەدەن.''

هاوکات ئاماژەی بە بوونی پلانێکی ئەمنیی تۆکمەش کرد، کە بنکەکانی دەنگدان و دەنگدەرانیش دەپارێزرێن.

 

 (عامر ڕەفعەت)یش، بەرپرسی لیژنەی ناوچەی پارتی دیموکراتی کوردستان لە سەعدییە، بە ماڵپەڕی فەرمیی پارتی دیموکراتی کوردستانی ڕاگەیاند: ''لە سنووری ئێمە ٢ بنکەی دەنگدان کراونەتەوە و خەڵکیش بە ئاھەنگەوە بەشداری لەو پرۆسەیەدا دەکەن و دەنگی خۆیان دەدەن.''

 

ناوبراو باسی لەوەش کرد: ''ھەموو پێکھاتەکان بەبێ جیاوازی بەشداری لە پرۆسەکەدا دەکەن و خۆیان بە (بەڵێ) دەنگ دەدەن، ئەویش بۆ ئەوەی ئەو ناوچانە بگەڕێنەوە سەر ھەرێمی کوردستان.''

 

بڵند ئیبراهیم