دهۆک-KDP.info- کادرێن پارتى دیموکراتێ کوردستان ل دهۆکێ دبێژن، پارتى هەر دەم ل پێشیا خەبات و شۆرەشان بوویە ژبۆ وێ ئێکێ هوشیاریا نەتەوەیى و نیشتمانى دناڤ مللەتێ کوردان دا بەربەلاڤە بکەت، جونکى پلانەکا مەزن ددرهەقێ خەلکێ کوردستانێ دا هاتەکرن وەک مللەت ژناڤ بجیت، لێ پارتى دیموکراتى کوردستان شیا مللەتێ کورد ژبن دەستیێ رزگار بکەت.

ل 16 تەباخا 1946ێ، پارتى دیموکراتى کورد ب سەرکردایەتیا (مستەفا بارزانى) یێ نەمر، ل باشۆرێ کوردستانێ هاتە دامەزراندن، دووڤدا ل کونگرێ سیێ ل سالا 1953ێ، ناڤێ وێ هاتە گهورین بۆ (پارتى دیموکراتى کوردستان)، ئەڤرۆ د 71مین سالیادا وێدا (خالد ئەحمەد)، کارگێرێ لقى ئێک یا پارتى دیموکراتى کوردستان، بۆ مالپەرێ فەرمیێ پارتى دیموکراتى کوردستان راگەهاند:" پلانەکا مەزن ددرهەقێ خەلکێ کوردستانێ دا هاتە کرن وەک مللەت ژناڤ بجیت، لێ پارتى دیموکراتى کوردستان وەک رێبازەک نەتەوەیى شیا سەرارایى وێ سیاسەتا هوڤانە مللەتێ کورد ژبن دەستیێ رزگار بکەت و بەردەوامیێ ب خەباتا خۆ بدەت".

(خالد ئەحمەد)، گۆتژى:" پارتى دیموکراتى کوردستان پارچەیەکە ژ هێزا مللەتى، دەربرین ژ ئیرادا خەلک و جەماوەرێ خو کریە، ب پێشکەفتنا خەلکى پارتى ژى پێشکەفتیە و ب مانا وان ژى پارتى مایە، بەرۆڤاژى ژى پارتى دگەل خەلکێ خۆ دەربەدەر و ئاوارە بوویە".

کارگێرێ لقى ئێک زەلالکر ژى:" ئەڤرۆکە پارتى دیموکراتى کوردستان ب سەرکێشیا کاروانێ هزرا نەتەوەیى برێکەفیتیە، دبنیاتدا پارتى دگەل هزرا شەرى و توندەرویێ نەبوویە دگەل لایەنێن دیتر یێن سیاسى، کۆ نوکە ژ هەر دەمەکێ دیتر مللەتێ کورد نیزیکتر ژ وێ ئارمانجا پارتى کار بوو کرى، ئەو ژى سەربەخۆییا کوردستانێ یە".

(دوسکى) پتر بەحسکر و ئاخفت:" لژێر درۆشمێ (یان کوردستان یان نەمان) پارتى دیموکراتى کوردستان خەباتکریە، کۆ ئەڤ قۆناغە ژى هەمان رامان بخوڤە دگریتە ڤە، ئارمانجا مە گەلەک یا مەزنە و ب ئیرادا مللەتێ کورد دێ کوردستانێ سەربەخۆ کەین و هەمى پلانێن دۆژمنان ژناڤبەینە ڤە، جونکى خەلکێ مە ژى دئاستەکێ هوشیاریێ باش دایە، ئەز باوەرم دێ پشکداریى ددەنگدانا ریفراندۆمێ دا کەن و ب بەلێ دەنگێ خۆ دەن، جونکى مللەتێ مە بەرهەفبوویە و خوراگر بوویە بەرامبەر مەزنترین رێکخراوا تیرۆرى و پێشمەرگەیى ب قەهرەمانانە و  ب خوینا شەهیدان بەرگرى ژ ئاخا کوردستانێ کریە و ئەم د پشتراستین خەلکێ مە لوى ئاستى دایە بزانیت سەربەخۆیا کوردستانێ، واتە رزگاربوون ژبن دەستیێ یە".

(کاوار حەمید باڤى)، پارێزەر و کادرێ پارتى دیموکراتى کوردستان، بۆ مالپەرێ فەرمیێ پارتى دیموکراتى کوردستان گۆت:" ئارمانجا دامەزراندانا پارتى دیموکراتى کوردستان بخۆ ئەو بوویە، دەولەتا کوردى بدامەزرینیت و خەبات ب هەمى رەنگان یا جەکدارى و مەدەنى کریە بۆ سەربەخۆیا مللەتێ کورد".

(کاوار باڤى)، خویاکر:" پارتى هەر دەم ل پێشیا خەبات و شۆرەشان بوویە، ژبۆ وێ ئێکێ هوشیاریا نەتەوەیى و نیشتمانى دناڤ مللەتێ کوردا بەربەلاڤ ببیت، نوکە ژى دقوناغەکا هەستیار داینە و ب تایبەت پشتى پێشمەرگەیێ کوردستانێ سەرکەفتن د شەرەکێ دژواردا دژى تیرۆرێ تومارکرى، ژبەر ڤێ ئێکى باوەرى بۆ کوردان دروست بوویە ئێدى دەولەتبوون و سەربەخۆیى دێ مللەتێ مە ژ هەمى مەترسیان لادەت".

(جیان مەهدى)، بەرپرسا ئێکەتیا ئافرەتێن کوردستانێ ئەنجوومەنێ قەزا دگۆت:" پارتى دیموکراتى کوردستان هەر دەم پێشخەر بوویە بۆ دەستکەفتێن نەتەوەیى و شیایە لسەر ئاستێ جیهانى دەنگێ کوردان بلند بکەت و ب تایبەت پشتى پێشمەرگەیى کوردستانێ بەرەڤانى ژ ئاخا کوردستانێ و هەمى دونیایێ کرى و شەر دژى تیرۆرستێن داعشێ کرى و سەرکەفتن تومار کرین ب سەرکێشیا سەرۆکێ هەرێما کوردستانێ (مەسعود بارزانى)، کۆ دبیتە سەرۆکێ حزبا پارتى دیموکراتى کوردستان".

هەلز عەلى سەلیم