دهۆک-KDP.info- (حەمدی عەبدولباقی بەرواری) پارێزەر و بەرپرسێ رێکخراوا مافێن مروڤی ل کوردستانێ تایێ دھوک ڕاگەهاند، هیچ مادەیەک یان خالەکا یاسایی دناڤا دەستورێ عیراقێ دا نەھاتیە، بێژیت نابیت ریفراندوم بھێتەکرن و ئەنجامدانا ریفراندۆمێ کارێ دەستھەلاتا یاسادانان و بجەئینانێ یە ل هەرێما کوردستانێ.

(حەمدی عەبدولباقی بەرواری)، بۆ مالپەرێ فەرمیێ پارتى دیموکراتى کوردستان گۆت، ریفراندۆم مافەکێ سرۆشتیێ هەر مللەتەکى یە بڤێت سەربەخۆ بژیت چ بن دەست بیت یان ئازاد ژى بیت، لەوا مللەتێ کورد حەز دکەن ئازاد بژین نەک بن دەست.

ددەسپێکا دەستورێ عیراقێ دا هاتیە دیارکرن، کۆ پێکڤەژیان ل عیراقێ ب رەنگێ ھەلبژارتى یە و مادێ (١١٧) ژ دەستورێ عیراقێ دانپێدان ب ھەرێما کوردستانێ و ھەر سێ دەستھەلاتێن وێ کریە، ئانکو کوردان مافێ دیارکرنا پاشەرۆژ و ژیانا خۆ برەنگەکێ یاسایی هەیە.

(حەمدی بەرواری)، زەلالکر: "هیچ مادەیەک یان خالەکا یاسایی دناڤا دەستورێ عیراقێ دا نەھاتیە بێژیت نابیت ریفراندوم بھێتەکرن یان دڤێت لدووڤ رازیبوونا حکوومەتا عیراقێ بیت".

برگا ئێک و دوو ژ مادێ (١٢١) ژ دەستورێ عیراقێ دووپات دکەت، ھەرێما کوردستانێ مافی بکارئینانا ھەر سێ دەستھەلاتان (یاسادانان و بجەئینان و دادوەری)یێ ھەیە و لسەر ئاستێ یاسایی حکوومەتا ھەرێما کوردستانێ یا دانپێدان کریە ل دووڤ دەستورێ نافخۆیێ عیراقێ یێ سالا 2005ێ.

(بەروارى) ئاماژەدا: "ئەنجامدانا ریفراندۆما گشتی ل هەرێما کوردستانێ، کارێ دەستھەلاتا یاسادانان و بجەئینانێ یە ل ھەرێمێ و ئەنجامێن وێ ل دووڤ دەستھەلاتا دادوەری ل ھەرێمێ دێ ئێتە راگەهاندن، دیسان چەندین بەلگە و یاسایێن نەتەوەیێن ئێکگرتی و بەیاننامە و پەیمانێن نیڤدەولەتی دیار دکەن، کو چارەنڤێس مافێ ھەموو نەتەوەیانە".

ل سالا 1991ێ، رێکخراوا مافێن مروڤی ل کوردستانێ تایێ دھوک هاتیە ڤەکرن، بەردەوام کار بۆ مرۆڤایەتیێ کریە، لڤێ دووماهیێ بەحس ل چارەنڤیس و رەش نڤیسێ دەستورێ ھەرێما کوردستانێ دسمینارەکا تایبەتدا هاتیە کرن ب هەڤکارى دگەل گەنجانی بوێر و گەنجینە ب پشتەڤانیا رێکخراوا NED بو ژمارەکا پارێزەر و نوونەرێن رێکخراوێن جڤاکێ سڤیل و روژنامەڤانان.

هەلز عەلى سەلیم