بەناوی خودای مەزن و دلۆڤان

خانەوادەی بەڕێزی کاک عەبدولواحید گوانی
بە داخێکی زۆرەوە هەواڵی کۆچی دوایی کاکە عەبدولواحیدمان پێگەیشت. خوالێخۆشبوو لەکاتی تەنگانەدا لە ساڵانی پێش ڕاپەڕین، ڕاستەوخۆ پەیوەندیی بە منەوە هەبوو و لە ڕاپەڕینیشدا بۆ گەیاندنی ڕێنوێنی و تەوجیهات بۆ ڕێکخستنە نهێنییەکانی ناوخۆ ڕۆڵێکی دیار و بەرچاوی هەبوو. لە ساڵانی دوای ڕاپەڕینیش وەک پێشمەرگە و کادیر و دواتریش وەک قایمقامی چۆمان ڕۆڵێکی دیاری هەبوو و وێڕای ئەوانەش وەک دامەزرێنەر و سەرۆکی کۆمەڵەی چاودێریی کەمئەندامانی سۆران و دواتریش لە دامەزراندن و بەڕێوەبردنی ناشناڵ پارکی هەڵگورد – سەکران، خزمەتێکی دڵسۆزانەی پێشکەشی گەل و وڵاتەکەی کرد.
لەم بۆنە خەمناکەدا پرسە و سەرەخۆشی بە خانەوادە تێکۆشەرەکەتان و سەرجەم خزم و كەسوكار و هاوڕێیانی کاک عەبدولواحید و خەڵکی نیشتیمانپەروەری دەڤەری سۆران و باڵەکایەتی ڕادەگەیەنم و بەشداری خەمتانم.
لە خودای گەورە داواكارم گیانی کاک عەبدولواحید بباتە بەر دلۆڤانیی خۆی و دڵنەوایی و ئارامییش بە هەموولایەك ببەخشێت.

انا لله وانا الیه راجعون

مەسعوود بارزانی
26ـی6ـی2017