هەولێر-KDP.info-  پسپۆڕانی ئابووری باوەڕیان وایە کە ریفراندۆم کاریگەری لەسەر پاشەڕۆژی ئابووری هەرێمی کوردستان دەبێ. دەشڵێن، دوای ریفراندۆم پێگەی ئابووری هەرێمی کوردستان بەهێزتر دەبێ.

ئەمساڵ کە لە ٢٥-٩-٢٠١٧ ریفراندۆم دەکرێ، لە ئێستاوە چاودێرانی ئابووری دەڵێن کە ریفراندۆم هۆکاردەبێ لە بەهێزبوونی پێگەی ئابووری هەرێمی کوردستان، پێوەست بەم پرسە (کاوە دۆسکی) کە شارەزایی ئابوورییە بۆ ماڵپەڕی فەرمیی پارتی دەڵێ، دوای ئەوەی ریفراندۆم دەنگی بەڵێی هێنا ئەوا دەرگایەکی دیکەی هەرێم بەڕووی جیهاندا دەکرێتەوە بۆ ئەوەی لە کەرتی نەوت و بازرگانییدا دانوستانی زیاتر لەگەڵ وڵاتان بکات و ئەو یاسایانەی کە نەوت ئێستا لە بواری و بارزگانی هەن کە گرێدراون بە بەغداوە ئەوکات هەولێر سەربەستتر و بەگوێرەی پێوەری هەرێمی کوردستانەوە مامەڵە لەگەڵ کەرتی نەوت و بازرگانی و باج و گومرگ و بانکی ناوەندی دەکات.

دەشڵێ، بابەتێکی دیکەیش دێتە پێشێ ئەویش بوونی هەرێمی کوردستانە بە ئەندام لەو رێکخراوە نێودەوڵەتییانەی کە هەن وەک بانکی نێودەوڵەتی و سندوقی دراوی نێودەوڵەتی و بانکی گەشەپێدانی نێودەوڵەتی، ئەمەیش بە سوودی هەرێمی کوردستان دەشکێتەوە و سەربەخۆیی لەو مافەمان دەگەیەنێ، هەروەها لەزۆر روویی دیکەوە دوای ریفراندۆم بنەمایی دیکەی دەوڵەتبوونمان بۆ جێگیردەبێ وەک هەوڵدان بۆ بوونمان بە ئەندام لە رێکخراوی ئۆپیک، چونکە نزیکەی ٣٢%ی نەوتی یەدەگی عێراق لە هەرێمی کوردستانە و هەولێر مافی ئەوەی دەبێ راستەوخۆ نەوتی خۆی لە بۆرسەی جیهاندا بفرۆشێ.
(دۆسکی) روونیشی کردەوە کە هەرێمی کوردستان خاوەنی ٤٥ ملیار بەرمیل نەوتی یەدەگە و لە ڕووی گازی سرووشتییەوە خاوەنی ٥ تا ٦ ترلیۆن مەتر سێجایە، بوونی گرێبەستە نەوتییەکانیش لەگەڵ کۆمپانیاکانی ئیکسون مۆبیل، تۆتاڵ، شیفرۆن، گازپرۆم و رۆسنەفت، دڵنیایی ئەوەن کە پاشەڕۆژی ئابووری هەرێمی کوردستان لە ناوچەکەدا بە بەهێزی دەدرەوشێتەوە.

(د. بەختیار سابیر)، پسپۆڕی ئابووری بە ماڵپەڕی فەرمیی پارتی دیموکراتی کوردستانی ڕاگەیاند، هەرێمی کوردستان هەموو بنەمایەکی ئابووری تێدایە بۆ ئەوەی ببێ بە دەوڵەت، هەڵبەت  ئاو و خاک، سامانی سرووشتی، گەشتوگوزار و پیشەسازی، بۆ هەردەوڵەتێک بنەمای سەرەکییە و هەرێمی کوردستانیش هەموو ئەو بنەمایەی هەیە، تەنیا ماوە هەرێم ئیدارەیەکی تەواوی هەموو ئەو سێکتەرانە بدات و ئەمەیش دەبێتە هۆی ئەوەی کە ببین بە دەوڵەتێکی بەهێز.

لەبارەی کاریگەری ئابووری هەرێمی کوردستان دوای ئەوەی ببێ بە دەوڵەت، (د.بەختیار سابیر) باوەڕی وایە، ئەوکات دراوی تایبەتی و بانکی ناوەندی دادەمەزرێ و کاریگەرییەکی تەواوی دەبێ لەڕووی بنیاتی ئابوورییەوە.

قائید میرۆ