Kurdî  ■  كوردی  ■  عربي
TUE, 26 MAR 2019 06:07 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ئێمینکی: ئێمە و یەکێتی خۆمان چاك كردووە، کەچی گۆڕان لاساییمان دەكاتەوە
| KDP.info


هەولێر-KDP.info-  (جەعفەر ئیبراهیم ئێمینکی) گوتەبێژی فەرمیی مەكتەبی سیاسیی گەورەترین حیزبی باشووری كوردستانە، بەرپرسی رێكخستنی پارتییە و لەهەمانكاتدا کە جێگری سەرۆكی پەرلەمانی كوردستانیشە، دەڵێ "گۆڕان لە ئیدارەكردندا شارەزا نین و لەنێو پەرلەمانیش حیزبایەتی دەكەن."

(جەعفەر ئێمینکی) دەربارەی ئەوەی کە سەرۆك و سكرتێری پەرلەمان لەگەڵ سەرۆكی فراكسیۆنی یەكێتی، گۆڕان، كۆمەڵ و یەكگرتوو ویستیان كۆبوونەوەیەك بكەن لەسەر یاسای سەرۆكایەتیی هەرێمی كوردستان، بەڵام لەلایەن ئەو و سەرۆكی فراكسیۆنی پارتی ڕێگەی لێ گیرا، دەڵێ، "ئەم گرفتە شكڵی بوو، هیچ پەیوەندی بەوەوە نەبوو كە یاسای سەرۆكایەتیی هەرێمی كوردستان هەموار بكرێتەوە یان نا، بەڵكو پەیوەندی بەوەوە هەبوو من وەكو جێگری سەرۆكی پەرلەمان ئاگادار نەكرابوومەوە. گومانێك بۆ ئێمە دروست بوو كە بە شێوەیەك لە شێوەكان بەبێ ئێمە (پارتی) ئەو بابەتە گفتوگۆی لەسەر دەكرێ. لەهەمان رۆژدا سەرۆكی حكوومەتی هەرێمی كوردستان لە پەرلەمان بوو، ئێمە وەكو دەستەی سەرۆكایەتیی پەرلەمان پێكەوە بووین. كە پێكەوە بووین بۆ بە منیان نەگوت لە سەعات 1:00ـی دوانیوەڕۆ كۆبوونەوەیەكی لەو شێوەیە هەیە، ئەگەر پێشوەختە منیان ئاگادار كردبایە، ئەوكات من ئامادەبوومایە یان نا، پێویستی بە روونكردنەوە نەدەكرد، بەڵام كە كۆبوونەوەكەیان كرد و دواتر وا بڵاویان كردەوە كە جێگری سەرۆكی پەرلەمان ئامادە نەبوو، ناچار بووم روونكردنەوە بدەم.

(ئێمینکی) دەیشڵێت: "گومانمان هەبوو كە لە پشت سەری ئێمەوە هەندێ را دروست بكرێن."

پێشتریش بەبێ پارتی هەر چوار فراكسیۆن بەیاننامە و هەندێ بڕیاریان لە پەرلەمانی كوردستان پەسەند كردووە، هەر كاتێك ویستیان دەتوانن بەبێ پارتی هەر كارێك بكەن و دەڵێن ئەمە دیموكراسیەتە، (جەعفەر ئێمینکی) لەم بارەیەوە گوتی: "راستە ئەمە دیموكراسیەتە. ئێمە هیچ گرفتێكمان لەوەدا نییە كە چوار لایەن ببنە یەك و رێز لە رای ئێمە بگرن، بەڵام ناكرێ پارتی پەراوێز بخرێ، دەبێ رای بەرامبەریان بە هەند وەربگرن و، لە سیستەمی تەوافوقیدا پەراوێزخستن نییە. لە سیستەمی پەرلەمانیشدا دروستكردنی بەرەیەكی سیاسی نییە. بۆیە هەر بەرەیەك لە دژی پارتی دروست بكرێ بە مەترسی دەزانین و  رێگەش نادەین سەربگرێ، ئینجا بۆ هەر پرسێك بێ، چ پەیوەندی بە سەرۆكایەتیی پەرلەمانەوە هەبێ، یان لە دەرەوەی پەرلەمان بێ. رێگەش نادەین جارێكی دیكە دوو ئیدارەیی لە هەرێمی كوردستان دروست ببێتەوە."


جەختیشی کردەوە کە، پارتی بە تەنیاش بێ، سەنگ و پێگەی خۆی هەیە و كەس ناتوانێ پارتی نەخوێنێتەوە. هەڵبەت لە پرۆسەی سیاسی و دیموكراسیدا پارتی پەراوێز ناخرێ.

لە وەڵامی پرسیارێکی دیکەی چاوپێکەتنێکەی لەگەڵ هەفتەنامەی ڕووداودا کە گوایە سەرۆكی پەرلەمانی كوردستان لە جێگرەکەی ناڕازی بوو كە بەیاننامەی دەركرد لەسەر ئەو كۆبوونەوەیە، (جەعفەر ئیبراهیم) دەڵێ، "من پرس بە سەرۆكی پەرلەمان ناكەم بەیاننامە بنووسم یان نا. هەندێ شت پەیوەستە بەمنەوە وەكو جێگری سەرۆكی پەرلەمان. هەر كاتێ بزانم هەندێ شت دەكرێن تەجاوزن لەسەر دەستەڵاتی من وەكو جێگری سەرۆكی پەرلەمان، پرس بە كەس ناكەم و كاری خۆم دەكەم و رای گشتی ئاگادار دەكەمەوە، چونكە ئەوەی كرا كارێكی باش نەبوو، ئەوە بۆ من وەكو زەنگێك بوو ئەگەر ئەو هەنگاوەم نەگرتبایە بەر، دەبووە عادەت و بەردەوام دەبوو. بۆیە ئەوەی روویدا ئێمە بە خراپ لە قەڵەمی دەدەین".

زیاتر گوتی، "ئەوەی تێگەیشتووم دەتوانین پێكەوە لەگەڵ سەرۆكی پەرلەمان و سكرتێری پەرلەمان ئەو كارانە دووبارە نەبنەوە."

دەربارەی رای پارتییش لەسەر ئەم هەڵوێستەی (ئێمینکی) دەڵێ: "پارتی هەموو دەسەڵاتێكی بەمن داوە. منیش توند نیم و گلەییش لەمن دەكرێ كە لە سیاسەتدا نەرمم. نەرمی نواندنیش نیشانەی هێزە. حیزبەكەی من هەموو دەسەڵاتێكی پێداوم، بەڵام ئێمە خاوەنی حكومەت و پەرلەمانین، بۆیە هەنگاوی خراپ نانێین."

لە وەڵامی ئەوەیشدا کە دەکرێ بگوترێ ئەوەی سەرۆكی پەرلەمان كردی لە نەزانینی بوو؟ گوتی: "هەر شتێك هەبێ دەیخەمە چوارچێوەی ئەوەی كە گۆڕان ئەزموونی كەمە لە ئیدارەدا، نەوەیەكیان هێناوەتە پێش ئەزموونیان زۆر نییە، لەبەر ئەوەی ئێستا دۆخەكە ناهەموارە و قەرەباڵغی هەیە، دەرفەتیش نییە زوو فێری كاری ئیداری ببن."

جێگری سەرۆکی پەرلەمان ئاشکرایشی کرد: "سوود لە راوێژكار وەرنەگیراوە، نە پێشتر و نە ئێستایش. دەمەوێ راستییەكیش بڵێم، راوێژكار هەموویان بۆ كاركردن دانەمەزراون، بەڵكو لەبەر موحاسەسەی حیزبییە و لەنێو پەرلەمانیش رەنگی دایەوە و بەردەوامە. ئۆپۆزیسیۆنی پێشوو دەیانگوت چاكسازی لە ئیدارەدا دەكەین، بەڵام ئەوەی ئێستا دەیكەن هیچ پەیوەندی بە چاكسازیی ئیدارییەوە نییە، بەڵكو رێك پێچەوانەی ئەوەیە. ئەگەر چاكسازی بكەی ناكرێ باری حكوومەت قورس بكەی و خەڵكی زیاتر دابمەزرێنێ. ئەگەر بەرنامەت هەبێ بەرنامەكەت جێبەجێ بكە. ئەو پاكێجانەی پێشتریش بە ئێمەیان دابوو كە لە ئۆپۆزیسیۆندا بوون، لە بواری كرداریدا نەیانتوانیوە 20%ـیشی جێبەجێ بكەن.

دەربارەی یاسای سەرۆكایەتیی هەرێمی كوردستانیش ڕایگەیاند، "ئەگەر ئامادەكاری بكرێ، ئەوا دەستوور لە ماوەی مانگێكدا یەكلایی دەبێتەوە. دەستوور هەمووی یەك بەندە كە ئەو هەموو گفتوگۆیەی لەسەر دەكرێ، ئەویش مەسەلەی هەڵبژاردنی سەرۆكی هەرێمی كوردستانە كە لە پەرلەمانەوە بێ یان لەلایەن خەڵكەوە بێ. راستە هەندێ بابەتی دیكە هەن، بەڵام جەوهەری نین و شایەنی ئەوە نین كێشەیان لەسەر دروست بكرێ‌.
لەسەر مەسەلەی هەڵبژاردنی سەرۆكی هەرێمی كوردستانیش دوو بۆچوون هەن، رای پارتی ئەوەیە سیستەم پەرلەمانی بێ و سەرۆكی هەرێمی كوردستان لەلایەن خەڵكەوە هەڵبژێردرێ و ناكرێ ئەو مافە لە خەڵك بسەندرێتەوە. لایەنی دیكەش دەڵێن نەخێر با لەلایەن پەرلەمانەوە بێ و بكرێ بە حیزبی و خەڵك مافی ئەوەی نەبێ سەرۆكی خۆی هەڵبژێرێ و دەسەڵاتەكانی سەرۆكی هەرێمی كوردستانیش كەم بكرێنەوە".

دەیشلێت، ئەگەر حیزبەكان قورسایی خۆیانی بخەنە سەر، پێش مانگی هەشت تەواو دەبێ، ئەگەرنا مەسەلەی یاسای سەرۆكایەتیی هەرێمی كوردستان هەموار دەكرێتەوە. ئەگەر هەمواریش نەكرا ئەوا دەبێ سەرۆكی هەرێمی كوردستان لەلایەن خەڵكەوە هەڵبژێردرێ، ئەوكات كێ كاندید دەبێ، جەنابی (سەرۆك بارزانی) جاری دیكە تەنیا كاندید نەبووە، بەڵكو چوار كاندید هەبوون.

دەربارەی ئەوەیش کە ئێستا چۆن دەبێ راستەوخۆ یان لە نێو پەرلەمان دەبێ؟ (جەعفەر ئیبراهیم) لە وەڵامدا دەڵێ، "ئەمە مەسەلەیەكی قانوونییە و پێمان باشە كۆمیسیۆنێكی یاساناسان دروست بكرێ، یان دادگای تەمیز یان تێكەڵ بێ لەهەردوو لایەن، پێمانوایە ئەوە هەنگاوێكی باش دەبێ بۆ یەكلاكردنەوەی ئەو بابەتە. پارتیش ئێستا لەگەڵ لایەنەكان لە راوێژدایە بۆ ئەوەی چارەسەرێكی سیاسی بۆ ئەو بابەتە بدۆزێتەوە."

گوتیشی، "لەوانەیە و دەتوانم بڵێم 50% چانسی هەیە راستەوخۆ بێ، 50%ـی دیكەش لەگەڵ ئەوەن لە پەرلەمانەوە هەڵبژێرن. رای كاك (مەسعوود) و پارتییش ئەوەیە راستەوخۆ بێ، ئەگەر كرا بە پەرلەمانی ئەوا دەمێنێتەوە بۆ خودی كاك (مەسعوود) و بەرژەوەندیی میللەت و هێزە سیاسییەكان. لەسەر ئەو پرسەش رای گۆڕان وەكو رای یەكێتییە كە سەرۆكی هەرێمی كوردستان لەلایەن پەرلەمانەوە هەڵبژێردرێ و رای كۆمەڵ و یەكگرتوویش هەمان رایە."

ئاماژەیشی دا، "لە 2005 من یەكێك بووە لەوانە و بە نووسین ئەوەم نووسیبوو كە (سەرۆک ابرزانی) ببێ بە مەرجەعی سیاسی لە هەرێمی كوردستان، بەڵام ئێستا كاتەكە جیاوازە، جەنابی كاك (مەسعوود) دوور بكەوێتەوە زیانێكی گەورەیە بۆ كوردستان."

گلەییەك هەیە كە گۆڕان دەست لەكاری پەرلەمانی وەردەدات، وایە؟ (جەعفەر ئێمینکی) لە وەڵامدا گوتی: "گۆڕانیش لاسایی پارتی و یەكێتی دەكاتەوە، ئێستا ئێمە خۆمان چاك كردووە، بەڵام گۆڕان تەدەخول دەكات. من باسی پەرلەمان دەكەم، گۆڕان حیزبایەتی لەنێو پەرلەمان دەكات، هیوادارم ئەوە رای بزووتنەوەی گۆڕان نەبێ، چونكە هەندێ كەس لێرەن بەناوی گۆڕانەوە كار دەكەن و ئەزموونیان كەمە و یەكەمجار زیان بە گۆڕان دەگەیەنن پاشان بە پەرلەمان. چاوەڕوانیی من لە سەرۆكی پەرلەمان ئەوەبوو كە ئەم هەوڵانە كەم بكاتەوە یان نەهێڵێ، بەڵام بەداخەوە ئەویش بێدەنگیی نواندووە. خۆم لە كاك (نەوشیروان)ـم بیستووە و ئەوەندەی من لێی تێگەیشتووم زۆر لەوە نیگەران بوو كە حیزبایەتی لەنێو پەرلەمان بكرێ و موزایەدە بكرێ، ئەم رایەی بەڕێز كاك (نەوشیروان) زۆر راست و دروست بوو."




دوایین هەواڵەکان

بەڕێوەبەرایەتییەکی کاتی بۆ مووسڵ دانرا

MONDAY, 25 MARCH 2019 18:03:45

مووسڵ-KDP.info- ئەندامێکی ئەنجومەنی پاریزگای مووسڵ ڕایگەیاند، بە بڕیاری سەرۆکوەزیرانی عێراقی فیدراڵ، بەڕێوەبەرایەتییەکی کاتی و هاوبەش بۆ مووسڵ دانرا.

 
ئەنجومەنی پارێزگای ھەولێر جارێکی دیکە پڕۆژەی دانەوەی پاشکەوتی مووچەی فەرمانبەران ئاراستەی حکوومەت دەکاتەوە

MONDAY, 25 MARCH 2019 16:03:43

ھەولێر -KDP.info- جێگری سەرۆکی لیژنەی داراییی ئەنجومەنی پارێزگای ھەولێر گوتی، دوای ئەوەی لە ماوەی  ڕابردوودا بەھۆی قەیرانی داراییەوە پڕۆژەی دانەوەی پاشکەوتی مووچەی فەرمانبەران لە لایەن حکوومەت ڕەت کرایەوە، ئێستا دۆخی ئابووریی ھەرێمی کوردستان باشتر بووە، بۆیە سبەی دووبارە پڕۆژەکە بەکۆمەڵێک گۆڕانکارییەوە ئاراستەی حکوومەت دەکەنەوە.

 
شاندێكی پەیمانگەی دیپلۆماسی و ئەكادیمیی ڤیەننا سەردانی پەرلەمان دەكات

MONDAY, 25 MARCH 2019 16:03:27

هەولێر-KDP.info-  پاشنیوەڕۆی ئەمڕۆ ٢٠١٩/٣/٢٥، د. ڤالا فەرید ئیبراهیم، سەرۆكی پەرلەمانی كوردستان، بە ئامادەبوونی هێمن هەورامی، جێگرى سەرۆكی پەرلەمان و مونا نەبی قەهوەچی، سكرتێری پەرلەمان، لە تەلاری پەرلەمان پێشوازیی كرد لە شاندێكی پەیمانگەی دیپلۆماسی و ئەكادیمیی ڤیەننا، بە سەرۆكایەتیی تۆماس ڕۆ، پرۆفیسۆر و سەرۆكی بەشی مێژوو لە پەیمانگەكە و شاندی یاوەرى.

 
جێگری پێشووی پارێزگاری مووسڵ: لادانی من سیاسی بوو

MONDAY, 25 MARCH 2019 16:03:54

مووسڵ -KDP.info- دوێنێ پەرلەمانی عێراق دەنگی لەسەر لادانی پارێزگاری نەینەوا و ھەردوو جێگرەکەی دا. جێگری یەکەمی پارێزگاری نەینەوا کە کوردە پشتڕاستی کردەوە، بابەتی لادانەکەی لەوەوە ھاتووە ئەگەر متمانە لە پارێزگار وەرگیرابایەوە ئەوە بەپێی یاسا دەبووە پارێزگار و دەشڵێ: "تەحەدای ھەموو عێراق دەکەم یەک بەڵگەی گەندەڵی لەسەر من ھەبێت."

 
ھاوتاکردنی مووچەی کەسوکاری شەھیدان ئاراستەی ئەنجوومەنی وەزیران کراوە

MONDAY, 25 MARCH 2019 15:03:37

ھەولێر-KDP.info- گوتەبێژی وەزاەرتی شەھیدان و ئەنفالکراوانی حکوومەتی ھەرێمی کوردستان گوتی، ڕێکارەکانی ھاوتاکردنی مووچەی کەسوکاری شەھیدان و ئەنفالکراوانی حکوومەتی ھەرێمی کوردستان تەواو بووە و ئاراستەی ئەنجومەنی وەزیران کراوە و ھەرکاتێک بڕیاری لێ درا دەست بە جێبەجێکردنی دەکریت.

 


 
© 2018 Kurdistan Democratic Party, KDP