Kurdî  ■  كوردی  ■  عربي
FRI, 20 SEP 2019 13:31 Erbil, GMT +3
Partiya Demokrat a Kurdistanê
Nûbûn  .  Dadperwerî  .  Bihevrejiyan
 

Partiyên Bakurê Kurdistanê “Tifaqa Hilbijartina Kurdistanî” ragihandin
| KDP.info


Amed-KDP.info- Heşt partiyên Kurdî yên Bakurê Kurdistanê îro li bajarê Amedê hevpeymaniya xwe ji bo hilbijartinên şaredariyan bi fermî ragihandin.

Derbarê pêngavê de, Serokê Partiya Demokrata Kurdistanê- Tirkiye (PDK-T) Mehmet Emîn Kardaş ji malpera KDP.info re ragihand: “Me ev tifaqa hilbijartinan ava kiriye ji bo ku rêxistina gelê Kurd hebe û giraniya me li Bakurê Kurdistanê bihêz be.”

Wan her heşt partiyan îro li bajarê Amedê yê Bakurê Kurdistanê kongreyeke rojnamevanî hevbeş lidar xistin û tê de tifaqa xwe ragihandin.

Di destpêka kongreyê de, Sertaç Bocak axivî û daxuyanî bi Kurdî pêşkêş kir.

Daxuyanîiya ku ji aliyê Sertaç Bocak ve hatin xwendin, bi vî awayî ye:


“Ji ber ku hilbijartinên heremî, ji bona desthilatdariya heremî û bicîhbûna demokrasiyê giring in, ji xwe ji me Kurdan re ev hîna giringtir in. Hilbijartina 31ê Adarê ji ber hinek sedemên ku emê li jêr bînin ziman hîna giringtir bûne.

1-Piştî pergala serokatiyê li Tirkiyê eşkere xuya dike ku parlamento ji derb de ketiye û pê re ji giringiya îdareyên heremî hîna zêdetir bûye.

2 -Desthiladar, mixalefet û partiyên sîstema Tirkiyê, bi plan û programan berê xwe dane doza gelê me û dixwazin ku di mêjiyê gel de hinek têgihiştinên çewt bicîh bikin. Ew dixwazin ku gelê me ev fikir bi wana re çebibe; “ em herin ser sindoqan jî, em neçin jî wê tu cudabûn çênebe, çawa be jî ew dê li şaredariyan qeyûm werin tayinkirin.” Bi vê têgihiştina çewt dixwazin gelê me ji siyasetê sar bikin, da ku bi van dîtinên çewt gelê me ji xwe re dikin hedef.

3- Serokê MHPê Dewlet Bahçelî di derbarê Kurdan û hilbijartina heremî li Kurdistanê de dibêje; “heke Kurd careke din desthilatdariya heremî ji destê qayûman derxînin, wê hinek daxwazên wana hîna kûrtir bibin. Ev jî wê Tirkiyê bibe devereke din. Ji bona ku em bikevin pêşberî vê yekê divê em eşîran têxin dewrê” anku Bahçelî dibêje, bila Kurd hilbijartinan winda bikin, bila MHP jî hilbijartinê winda bike lê bila dewletaTirk winda neke.

4-Piştî ku pergala serokatiyê bicîh bû desthilatdariya AKP û rejîma Tirkiyê têne bûye ya zilamekî. Ji bona ku em bikaribin bi hilbijartinên meşrû û îrada gel vê pêvajoyê derbas bikin, divê em karibin tifaqên gelek berfireh li Kurdistanê pêk bînin.


Ji ber vê yekê em tifaqa xwe li Kurdistanê, li Tirkiyê û li dinyayê, ji raya giştî re radighînin;

a) Em tevger û partiyên Kurdistanî ku îmzeyên me li jêr hene, di bin sîwana HDPê de, di hilbijartinên heremî de tifaqa xwe îlan dikin.

b) Tifaqa Cumhur ku dixwaze îrada gelê me careke din desteser bike û bi formula ku dibêje “ Bila Kurd winda bikin” siyasetê dike. Li himberî vê dîtinê em jî dibêjin.“Bila Tifaqa Hilbijartina Kurdistanî û gelê me biserbikeve, bila partîyên me biserbikevin. Bi wan helwestan em dixwazin ku derfet û destkevtinên xurt bi dest bixînin.

c) Bi Tifaqa Hilbijartin aHeremiya Kurdistanê em dixwazin siyaseta sivîl- demokratîk xurt bikin, ji bona vê yekê em bi bawerî têdikoşin. Û ya herî giring jî em nirxên gelê me yên netewî diparêzin û êrişên ku li ser gelê me hene di bingeheke sivîl-demokratîk de em li himberî van êrişan derdikevin.

d) Di tifaqa hilbijartina heremî de tevger û partiyên me amaje pê dikin ku di nava gelê me de kultura hevkariya netewî-demokratîk pêş de bibin. Dîtinên şaş ku di nava Kurdan de heta niha belav bûne, weke ku tê gotin “Kurd nikarin tifaqa bi hevdû re ava bikin”, Em dixwazin vê dîtina şaş di hilbijartinên heremî de bişkînin, vala derxînin û li gora daxwaza gelê xwe tevgerê bikin.

e) Di Tifaqa Cumhur de (AKP-MHP) dibêje; ji bona pêşeroja dewleta xwe em tifaqê ava dikin, lûksa me ku em ji hevdû bixeyidin tune ye, ji ber van sedeman em tifaqê çêdikin û li hev dikin. Em tevger û partiyên Kurdan jî nakokî û cudabûnên xwe paş de vêdikişînin û li ser nirxên hevbeş ên Kurdan em tifaqa xwe di hilbijartinên heremî de radighînin.

f) Ya herî giring jî ev e, daxwaza Kurdan ku îro hemû gelê me dike yek, ango perwerde û fêrbûna bi zimanê dayikê di serî de û têkoşîna ji bona mafê çarenûsa netewa xwe ku me Kurdan hevbeş dike, bi vê hişmendiyê emê di şaredariyan de helwesteke netewî - demokratîk pêş de bibin. Di warê heremî de emê bixwazin ji gelê xwe re xizmetê bikin.

g) Kurdên ku di hilbijartinên heremî de li derveyî tifaqa me tevgerê dikin, em rûmeta nişanî îrada wana didin û helwesta wan a weke mafeke demokratîk dinirxînin. Lê belê di van şert û mercên ku me bi kurtasî li jor anîne ziman, em dixwazin di hilbijartina 31ê Adarê de Kurd bi yek tifaqê bi hevdû re tevgerê bikin. Beşdarbûna Kurdan bi tifaq û bi hev re, giringiyeke dîrokî ye û di berjewendiya gelê me de ye. Emê heta dema dawî ji bona hilbijartina heremî yekrêzî û tifaqa Kurdan biparêzin, banga xwe dubare bikin û bangî van hevalan bikin ku beşdarî tifaqa me bibin.

h) Em dîsan giring dibînin ku HDP di hilbijartinên heremî de bi hêzên demokrasiyê li Tirkiyeyê re tifaqên berfireh ava bike.

Em ji raya giştî a birêz re radighînin: Em bawer dikin û emê serkevin, dê gelê me / gelên me biserkevin, dê tifaqa me biser bikeve, emê biserbikevin.


Hereketa Îslamiya Kurdistanê (Azadî)

Partiya Herêmên Demokratîk (DBP)

Komeleya Kurdên Şoreşgêr ên Demokrat (DDKD)

Partiya Demokratîk a Gelan (HDP)

Partiya Mirov û Azadiyê (PIA)

Partîya Komunîsta Kurdistanê (KKP)

Platforma Demokratên Kurdistan (PDK)

Partiya Demokrata Kurdistanê- Tirkiye (PDK-T)”




Nûçeyên din

Mesrûr Barzanî bo xwendekarên Kurdistanê: beşdar bin di avakirina Kurdistaneke bihêz de

THURSDAY, 19 SEPTEMBER 2019 23:09:05

Hewlêr-KDP.info- Serokwezîrê Hikûmeta Herêma Kurdistanê, perwerde û fêrkirin, weke ji girîngritîn karên kabîneyê binav kirin û ragihand ku di heyama vê kabîneyê de ew dê girîngiyeke taybet bi xwendina bilind bidin.

 
Nêçîrvan Barzanî û Helbûsî rewşa Iraqê guftûgo kirin

THURSDAY, 19 SEPTEMBER 2019 15:09:25

Birêz Nêçîrvan Barzanî Serokê Herêma Kurdistanê û birêz Mihemed El Helbûsî Serokê Encumena Nûnerên Iraqê rewşa siyasî û emnî ya Iraqê guftûgo kirin û tekez li ser parastina aramiya siyasî û aramiya emnî ya Iraqê û girîngiya berdewamiya diyaloga Hewlêr û Bexda ya ji bo çareserkirina kêşeyan li çarçêweya destûra Iraqê da kirin.

 
Serok Barzanî û Serokê Parlamentoya Iraqê rewşa Iraqê û ya navçeyê gotûbêj kirin

THURSDAY, 19 SEPTEMBER 2019 15:09:26

Hewlêr-KDP.info- Serok Mesûd Barzanî pêşwaziya Serokê Encûmena Nûnerên Iraqê (Parlamentoya Iraqê) kir û di wê hevîdtinê de herdû aliyan rewşa Iraqê û ya navçeyê û pêwesndiyên di navbera Hewlêr û Bexdayê de gotûbêj kirin.

Serok Barzanî û Berhem Salih li ser rewşa navçeyên Kurdistanî yên madeya 140 axivîn

WEDNESDAY, 18 SEPTEMBER 2019 22:09:38

Hewlêr-KDP.info- Serok Mesûd Barzanî pêşwaziya Serokomarê Iraqê Berhem Salih kir û di wê hevdîtinê de herdû aliyan rewşa navçeyên Kurdistanî yên madeya 140 gotûbêj kirin.

 
Mesrûr Barzanî û Berhem Salih: Niha derfeteke baş ji bo çareseriyê heye

WEDNESDAY, 18 SEPTEMBER 2019 22:09:49

Hewlêr-KDP.info- Serokwezîrê Herêma Kurdistanê Mesrûr Barzanî û Serokomarê Iraqê Berhem Salih civiyan û di wê hevdîtinê de herdû aliyan tekez kir ku pêwîst e pirsgirêkên Hewlêr û Bexdayê çareseriyeke bingehîn ji wan re bê dîtin û Destûrê Iraqê bi temamî were cîbicîkirin.

 


 
© 2018 Kurdistan Democratic Party, KDP