Kurdî  ■  كوردی  ■  عربي
WED, 17 OCT 2018 13:20 Erbil, GMT +3
Partiya Demokrat a Kurdistanê
Nûbûn  .  Dadperwerî  .  Bihevrejiyan
 

Hikûmeta Kurdistanê bersiva Ebadî da
| KDP.info


 

Hewlêr-KDP.info- Hikûmeta Herêma Kurdistanê bersiva daxuyaniya roja Sêşemiyê ya Serokwezîrê Iraqê Heyder Ebadî da û ragihand, bi piştgirêdana bi biryara Dadgeha Federalî ya Iraqê ya di 20-11-2017ê de, divê hemû ew rêkar û encam û bandorên nerewa yên li dijî Herêma Kurdistanê werin hilweşandin ku tenê di berteka referandum de ji aliyê hikûmeta federal û parlamentoya Iraqê ve li ser Herêma Kurdistanê hatine sepandin.

Berdevkê Hikûmeta Herêma Kurdistanê Sefîn Dizeyî di daxuyaniyekê de amaje bi wan rêkaran dike, ku Bexda weke bertek li hermber referanduma serxwebûnê, li dijî Hewlêrê cîbicî dike û dibêje, divê hemû rêkar û encamên nerewa yên ku ji aliyê hikûmet û parlamentoya Iraqê ve li dijî Herêma Kurdistanê hatine destpêkirin, yên weke “kêmkirina pişka bûdceya Herêma Kurdistanê, cezakirina nûnerên Herêma Kurdistanê yên li parlamentoya Iraqê, daxistina firokexaneyan û hemû ew biryarên din jî ku roja 27-09-2017ê heta berî derketina bryara Dadgeha Federalî jî weke bertek ji aliyê parlamentoya Iraqê ve li dijî xelk û Herêma Kurdistanê ve hatine dan”, werin hilweşandin.
Dizeyî herwiha derbarê Pêşmerge de jî dibêje: “Pêşmerge hêzeke îtîrafpêkirî ya destûrî ye û di têkşikandina DAIŞê û parastina welat de tevî hêzên iraqî di proseya rizgarkirina Mûsilê de roleke sereke dîtiye.”
Dizeyî tekez dike: “Eger pêşmerge nebûya, di şerê li dijî DAIŞê de dê Kerkûk û gelek navçeyên din jî ratsî heman çarenivîsa Mûsilê bibana. Pêşmerge di şerê li dijî DAIŞê de 1,802 şehîd û 10,233 birîndar û 62 windayî daye. Civaka navdeweltî û birêz Ebadî bi xwe jî çend caran pesnê rola Pêşmerge di alîkarî, piştgirî û hemahengiya li gel artêşa Iraqê de dane, ji ber wê jî divê hemû alî her bi vê şêweyê temaşeyî Pêşmerge bikin û mafên destûriyên wê dabîn bikin, ku bi mixabinî ve heta niha hikûmeta federal ti salekê mûçeyên wê nedaye, di demekê de ku li gorî Destûrê, Pêşmerge beşek e ji sîstema berevaniya Iraqê û divê mûçe û heqên wê yên darayî ji aliyê hikûmeta federalî ve were dabînkirin.”
Derbarê şandina mûçe ji karmend û mûçewergirên Herêma Kurdistanê de jî, ku Ebadî çend caran di gotar û daxuyaniyên xwe amaje pê kiriye, Berdevkê Hikûmeta Herêma Kurdistanê dibêje: “Birêz Heyder Ebadî çend caran gotiye, ku dê mûçeyên mûçewergirên Herêma Kurdistanê bişîne, Hikûmeta Herêma Kurdistanê jî herdem tekez kiriye, ku amade ye ji bo wê yekê hemû cure hemahengiyeke pêwîst bike, lê belê di rastî de niha ti pêngaveke kirdarî bo vê mebestê ji aliyê hikûmeta federalî ve nehatiye avêtin. Ew heta amade nînin lîsteya bayometriyê ya mûçewergiran jî ji Herêmê werbigirin, ji ber wê êdî xelkê Kurdistanê gihîştiye wê baweriyê ku mijara şandina mûçe ji aliyê hikûmeta Iraqê ve bi ti awayî ciddî nîne, belku tenê gotin e û ne tişteke din.”
Sefîn Dizeyî di dawiya daxuyaniyê de, derbarê navanîna Herêma Kurdistanê ji aliyê Ebadî ve weke parêzgehên bakurê Iraqê jî destnîşan kir: “Navanîna Herêma Kurdistanê bi her naveke din a çêkirî, bi aşkere nedestûrî ye û em red dikin, gelê Kurdistanê jî bi tev alî û pêkhateyên wê ve hevdeng in li ser parastina statuya destûrî ya Herêma Kurdistanê û qet bazarê li ser wê yekê nakin.”
 




Nûçeyên din

Serok Barzanî pêşwaziya Balyozê Kanada li Iraqê kir

WEDNESDAY, 17 OCTOBER 2018 12:10:59

Hewlêr-KDP.info-  Roja çarşem 17.10.2018 li Selaheddîn Serok Mesûd Barzanî pêşwaziya Paul Gibbard Balyozê nû yê Kanada li Iraqê û xanima Nancy Bergern Konsola Kanada li Hewlêrê kir.

 
Kerkûkî:Em xayinên 16ê Cotmehê efû nakin û divê bên dadgehkirin

TUESDAY, 16 OCTOBER 2018 17:10:56

Hewlêr-KDP.info- Xelk û çalakvanên Kerkûkê dibêjin em xayinên 16ê Cotmehê efû nakin û daxwaza dadgehkirina wan xayinan dikin.

 
Îsmaîl Beşikcî: Karesata Kerkûkê xiyaneteke mezin bû û birîneke mezin e ji Kurdan re

TUESDAY, 16 OCTOBER 2018 16:10:14

Duhok-KDP.info- Dostê gelê Kurd, ronakbîr û dîroknivîsê Tirk Îsmaîl Beşikcî di salvegera xiyaneta 16ê Cotmeha 2017ê de dibêje, xiyaneta Kerkûkê xiyaneteke mezin bû û birîneke mezin bû ji Kurdan re.

 
Serok Barzanî: Me qet texmîn nedikir ku li Kerkûkê destekî Kurdî ji pişt ve xencerê li me bide

TUESDAY, 16 OCTOBER 2018 15:10:11

Hewlêr-KDP.info- Serok Mesûd Barzanî di salvegera bûyerên 16 Cotmeha 2017an de peyamek belav kir û têde ragihand, “16 Cotmehê rojeka tarî ye di dîroka gelê me de û di wê rojê de bû ku xiyaneta necamêrane li hêvî û xewnên gelekî mezlûm hat kirin.”

 
Cîgirê Wezîrê Derve yê Amerîka: Em piştgiriya Kurdistanê dikin

MONDAY, 15 OCTOBER 2018 23:10:33

Hewlêr-KDP.info- Bi serokatiya Cîgirê Wezîrê Derve yê Amerîkayê şandeke payebilind a Amerîkî li gel Serokwezîrê Herêma Kurdistanê Nêçîrvan Barzanî civiya û piştgiriya wî welatî bo Herêma Kurdistanê piştrast kir.

 


 
© 2018 Kurdistan Democratic Party, KDP