Hewlêr-KDP.info- Encumena Bilind a Referandumê piştî civîna xwe ya îro di daxuyanyekê de aşkere kir, ku sibe “roja duşemî 25-09-2017ê referandum li Heêrma Kurdistanê û tevahiya deverên Kurdistanî yên li derveyî îdareya Herêmê birêve diçe.”

Encumena Bilind a Referandumê ya Herêma Kurdistanê îro Yekşemî 24ê Îlona 2017ê bi serpireştiya Serokê Herêma Kurdistanê Mesûd Barzanî û amadebûna tevahiya partî û aliyên endam li bajarokê Pîrmam a ser bi Hewlêrê ve civiya.

Piştî civînê daxuyaniyeke nivîskî hat weşandin û têde tekezî li ser encamdana referanduma serxwebûnê di dema xwe ya diyarkirî de hat kirin.

Li gorî daxuyaniyê, “di destpêka civînê de behsa pêşhatên herî dawîn ên herêmî û navdewletî yên têkildarî referanduma serxwebûna Kurdistanê hat kirin û birêz Mesûd Barzanî behsa wan civîn û pêwendiyan kir, ku di çend rojên bihorî de li gel aliyên navdewletî hebûye.”

Di daxuyaniyê de hatiye gotin, ku di civîna îro derbarê referanduma serxwebûna Herêma Kurdistanê de 4 biryar hatin dan, ku yek ji wan biryaran ev e, ku “Yekem: Roja Duşema 25-09-2017ê referandum li Herêma Kurdistanê û tevahiya deverên Kurdistanî yên li derveyî îdareya Herêmê birêve diçe. Duyem: Di civînê de, belgenameya siyasî ya garentîkirina mafê pêkhateyên neteweyî û olî hat pesendkirin û destxweşî jî hat kirin li komîteya ku belgename made kiriye. Sêyem: Piştî encamdana referandumê dê dergehê gotûbêj ligel Iraqê vekirî bin, ew jî ji bo ku em bibin 2 cîranên baş. Çarem: Encumena Bilind a Referandumê destxweşî li hemû aliyên siyasî yên Kurdistanê kir li ser biryara referandumê û li ser rijdbûna wan û li ser helwesta wan bo lidarxistina referandumê.”