Kurdî  ■  كوردی  ■  عربي
FRI, 18 AUG 2017 02:04 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

پارتی: هه‌لومه‌رجه‌كه‌ لێمان ده‌خوازێ یه‌كگوتار و یه‌كگرتوو بین؛ جگه‌ لە سەربەخۆیی بژاردەیەکی ترمان بۆ مانەوە لەناو دەوڵەتی عێراقدا نەماوە
| KDP.info


 

هه‌ولێر-KDP.info-  پارتی دیموکراتی کوردستان بە بۆنەی ساڵی نوێی کوردی و هاتنەوەی نەورۆز و ئاماژه‌ به‌و هەلومەرجه‌ ناوچەیی و نێودەوڵەتییه‌ پڕ لە دەرفەت و تەحەدییاته‌دا له‌ هه‌مووان دەخوازێ گوتاری سیاسی و پەیوەندییە ناوخۆیی و ئیقلیمی و عێراقییەکانمان لەبەر رۆشنایی رادەی دوور و نزیکی ئەو ناوەندانە لە سەربەخۆییمان دابڕێژێنەوە و رێک بخەنەوە، رایده‌گه‌یێنێ، جگە لە سەربەخۆیی بژاردەیەکی ترمان بۆ مانەوە لەناو دەوڵەتی عێراقدا نەماوە و پێویستە دەرفەتێک بۆ داخ لە دڵان نەهێڵینەوە کە ئیدیعای ئەوە بکەن حزبەکانی کوردستان دوو قسە و چەند بەرەن و کورد جیابوونەوەی لە بەغدا ناوێ.


ده‌قی پەیامی مەکتەبی سیاسیی پارتی دیموکراتی کوردستان بە بۆنەی ساڵی نوێی کوردی و هاتنەوەی نەورۆز

گەلی سەربەخۆییخوازی كوردستان...
بەبۆنەی ساڵی نوێی کوردی و هاتنەوەی جەژنی نەورۆزەوە پیرۆزبایی خۆمان و سه‌رجه‌م كادیر و ئه‌ندامانی پارتیمانتان لێدەكەین و ئومێدەوارین ئەم دوو یادە نەتەوەییە بکەینە وەرچەرخانی بەدیهێنانی ئاواتی مەزنی گەلەکەمان لە سەربەخۆیی نیشتمان و پتەوکردنی هەموو ئەو بنەمایانەی پێکەوەژیان و پێشکەوتنیان لەسەر دامەزراوە و ستوونەکانی ژیانی سیاسی دیموکراتانە و هاوچەرخانە پایەدار دەکەن.

گەلی کوردستانی قارەمان قۆناغی زۆری لەم رێگە بڕیوە و بەخشش و قوربانی زۆروزەوەندی لەپێناو گەیشتن بەو ئامانجانە پێشکەش کردووە. ئێستا پێویستی بەوەیە کە حزبە سیاسییەکان و سەرجەم ناوەندەکانی چالاکی سیاسی و مەدەنی و مێدیایی لە دەوری ئیرادەی سەربەخۆییخوازی کۆ ببنەوە و، لەو پێناوەدا خۆ ساز دەن و ریزەکانیان لە سەنگەری سەربەخۆییدا رێک بخەنەوە.

پەیامی سەرۆک بارزانی و نەخشەڕێیە پێشنیارکراوەکەی بۆ چارەسەرکردنی کێشە ناوخۆییەکان بۆ ئەم مەبەستە بوون، تا ببێتە سەرەتا بۆ دەستپێکی قۆناغی راگەیاندنی سەربەخۆیی و کارکردنی هەمەلایەنە لەسەر ئاستی عێراق و ناوچەکە و کۆمەڵگای نێودەوڵەتی بۆ دروستکردنی باشترین پردی پەیوەندی، کە لەسەر پایەکانی دۆستایەتی و بەرژەوەندیی هاوبەش و ئاشتی و هاوکاری لەپێناوی گەشەکردن دامەزرابێ.

نەورۆز هێمای بەرخودان و شۆڕشی کوردە لە دژی ستەم و چەوسانەوە و بەرجەستەبوونی ئیرادەی ئازادیخوازانەیە لە 2717 ساڵ لەمەوبەرەوە تا هەنووکە، بۆیە لەم هەلومەرجە رەخساوەدا کە قارەمانێتی و قوربانیدانی پێشمەرگەی کوردستان لە شەڕی دژی تیرۆر و توانا و بەخشندەیی گەلەکەمان لە حەواندنەوە و پاراستنی نزیکەی دوو ملیۆن ئاوارەی جەنگی تایفیی نەگریس هێناویانەتە ئاراوە و، پشتیوانیی کۆمەڵگای نێودەوڵەتی و دەنگی ئازادیخوازانی جیهانیان مسۆگەر کردووە، کاتی ئەوەیە ناوماڵی کوردستانی لە هەرێمی کوردستان رێک بخەینەوە و ئازادیخوازانی نەتەوەی کوردیش لە پارچەکانی دیکەی نیشتمانی دابەشکراومان ببنە پشتیوان و هاوکارمان لە تێپەڕاندنی دواقۆناغی سەختی بەر لە سەربەخۆیی، چونکە سەربەخۆیی ئەم پارچەیەی کوردستان دەبێتە چەقی قورسی رەوایەتیی دۆزی کورد لە ناوچەکەدا و، سەلمێنەری ئەو راستییەی کە گەلی کوردستان ئاشتیخواز و جەمسەری بە یەکترگەیشتن و پارێزەری بەرژەوەندییەکانە لە ناوچەکەدا. بۆیه‌ به‌ پێویستی ده‌زانین حزب و لایه‌نه‌ سیاسییه‌كانی پارچه‌كانی دیكه‌ی كوردستان رێز له‌ سه‌روه‌ریی هه‌رێمی كوردستان و یاسا و رێساكانی بگرن و نه‌بنه‌ مایه‌ی كێشه‌ دروستكردن له‌ ناوخۆمان و ناوچه‌كه‌شدا.

پێشوازیکردنمان لە ساڵی نوێ و یادکردنەوەی جەژنی نەورۆز لە کاتێکدایە کە گەلی کوردستان و دۆزی نەتەوەییمان بە هەلومەرجێکی ناوچەیی و نێودەوڵەتی پڕ لە دەرفەت و تەحەدییاتدا تێدەپەڕێ و، دووڕێیانی ستراتیژی و چارەنووس لە رێیدایە. ئەمەش لە هەموومان دەخوازێ گوتاری سیاسی و پەیوەندییە ناوخۆیی و ئیقلیمی و عێراقییەکانمان لەبەر رۆشنایی رادەی دوور و نزیکی ئەو ناوەندانە لە سەربەخۆییمان دابڕێژینەوە و رێک بخەینەوە.

دۆخی بەردەوام گۆڕاوی ناوچەکە لێمان دەخوازێ، گوتاری هاوبەش و ئامانجی هاوبەش و هەنگاوی کردەنی هاوبەشمان هەبێ بۆ ئەوەی دەرفەتەکان بچەسپێنین و بەهێزیان بکەین، مەترسی و تەحەدییەکانیش دوور بخەینەوە.

گەلی دلێری کوردستان…
پێشمەرگە قارەمانەکان…
خانەوادەی سەربەرزی شەهیدان…
گەرچی داعشمان تێکشکاند و خاکی نیشتمانە ئازیزەکەمان ئازاد کرد، بەڵام تا ئەو کاتەی مەیلی دیکتاتۆری و قۆرخکردنی دەسەڵات و سامان و توندڕۆیی مەزهەبی و تائیفی و هەوڵی پاوانخوازی و هەژموونگەرایی لە ناوچەکە بە گشتی و لەسەر سنوورەکانی کوردستان بەتایبەتی بمێنن، مەترسیی سەرهەڵدانەوەی تیرۆر لە رەنگ و بەرگی تردا دەمێنێ. بۆیە پێویستە هەمیشە لە ئامادەباشیی سیاسی و پێشمەرگایەتیدا بین بۆ رووبەڕووبوونەوە و پاراستنی خاک و گەل و دەستکەوت و سەقامگیری و بەهاکانمان. ئەمەش تەنیا لە قەوارەی سەربەخۆماندا دێتە دی.

سەرەڕای هەنگاوی ئەرێنیمان بۆ چارەسەرکردنی کێشەکانمان لەگەڵ بەغدا بەتایبەتیش بۆ رەوانەکردنی بودجەی چەند ساڵەی هەرێم و، ناردنەوەی مووچەی فەرمانبەران و شایستە دارایی و سەربازییەکانی هێزی پێشمەرگە و پابەندبوون بە دەستوور و جێبەجێکردنی ماددەی 140 و رێککەوتنەکانی نێوانمان سەبارەت بە نەوت و گاز، بەڵام تاکو ئێستا هیچی ئەوتۆمان لە بەغداوە نەبینیوە کە کەمترین تروسکاییان تێدا بێ . بۆیە جگە لە سەربەخۆیی بژاردەیەکی ترمان بۆ مانەوە لەناو دەوڵەتی عێراقدا نەماوە و هەنگاوی داهاتوومان ئەوەیە کە بە دیالۆگ و وتووێژی دۆستانە بنەماکانی دوو دراوسێی باش دابڕێژین. لەمەیشدا پێویستە دەرفەتێک بۆ داخ لە دڵان نەهێڵینەوە کە ئیدیعای ئەوە بکەن حزبەکانی کوردستان دوو قسە و چەند بەرەن و کورد جیابوونەوەی لە بەغدا ناوێ.

پێویستە بەرژەوەندیی گەلی کوردستان و وەفامان بۆ شەهیدان و قوربانیانی ئەنفال و کیمیابارانکردن و رێبوارانی رێی ئازادی و رۆڵە نەبەردەکانمان لە شۆڕش و بزووتنەوەی نیشتیمانیماندا، بخەینە سەرووی عەقلییەتی تەسکی حزبایەتی و دەستکەوتی کاتی و کۆنەقین و، هەموومان لە دەوری ئیرادەی راستەقینەی گەلەکەمان کۆ بینەوە کە لە 2717 ساڵی رابردوودا ئازادیخواز بووە و ئێستایش هەر ئەوەیە ئیرادەی راستەقینەمان.

جارێكی دیكه‌ ساڵی نوێ و نەورۆزتان لێ پیرۆز دەکەین و سەری رێز و نەوازش بۆ شەهیدانی گەلەکەمان دادەنەوێنین و لە ئاستی قوربانی ئەوان و خۆڕاگری خانەوادەکانیان، خۆمان بە قەرزار دەزانین و تەنیا سەربەخۆییی کوردستان دیاری و پادداشتی شایستەی ئەوانە.

هەر لەم بۆنەیەدا پیرۆزبایی گەرم و تایبەتمان بۆ جەماوەری خۆڕاگر و نیشتیمانپەروەری دڵی کوردستان، کەرکووکی سەربەرز دەنێرین، کە سەرکەوتنی راپەڕین و ئازادی ئه‌و شاره‌ گرینگ و مێژووییه‌ی كوردستان لە(21ی ئاداری 1991)دا هاوکات بوو لەگەڵ سەری ساڵی نوێی کوردی و جەژنی نەورۆزمان. دووپاتیشی دەکەینەوە کە کەرکووک کوردستانییە و سەربەخۆییی کوردستانیش بە سەربەخۆییی کەرکووکەوە گەشاوە و بەهادارە و، خەباتیشمان لەو پێناوەدا درێژەپێدەری ستراتیژی بارزانیی نەمرە و هەرگیزاو هەرگیز کوردستانێتیی کەرکووک بابەتی سازش و دەستلێهەڵگرتن نییە.

ئیرادەی ئازادیخوازانەی گەلەكەمان سەرکەوتووە..
ئاڵای كوردستان هەر شەکاوەیە...

مەكتەبی سیاسیی
پارتی دیموکراتی کوردستان
20ی ئاداری 2017




دوایین هەواڵەکان

سەرۆک بارزانی: پڕۆسەی ڕیفراندۆم بە هیچ شێوەیەك كاریگەری لەسەر شەڕی داعش نابێت

THURSDAY, 17 AUGUST 2017 16:08:29

هەولێر-KDP.info-  سەرۆكی هەرێمی كوردستان پێشوازی لە فەرماندەی فەرماندەیی ناوەندی هێزەكانی ئەمەریكا کرد و رایگەیاند، ڕووبەڕووبوونەوەی تیرۆر یەكێكە لە ئەولەویاتی هەرێمی كوردستان و پڕۆسەی ڕیفراندۆمیش بە هیچ شێوەیەك كاریگەری لەسەر شەڕی داعش نابێت.

ئەنجوومەنی پارێزگای کەرکووک: بەغدا هەر بڕیارێک بدات ئاڵای کوردستان داناگرین

THURSDAY, 17 AUGUST 2017 16:08:04

کەرکووک-KDP.info- بە پێی ھەواڵێکی میدیاکان، دادگای ئیداریی عێراق بڕیاری ھەڵوەشاندنەوەی ھەڵکردنی ئاڵای کوردستانی لە کەرکووک داوە، لە بەرامبەردا ئەنجومەنی پارێزگای کەرکووک دەڵێت، ھەر بڕیارێک بدرێت ئەوان پێیەوە پابەند نابن و ئاڵای کوردستان داناگرن.

یوئێن له‌باره‌ی ریفراندۆمی هه‌رێمی كوردستانه‌وه‌، ئاژانسێكی ئێرانی به‌درۆ ده‌خاته‌وه‌

THURSDAY, 17 AUGUST 2017 15:08:00

هه‌ولێر-KDP.info-  (یان كۆبیش) نوێنه‌ری سكرتێری گشتیی نه‌ته‌وه‌ یه‌كگرتووه‌كان له‌ عێراق، ئه‌و قسانه‌ی ره‌ت كردووه‌ته‌وه‌ كه‌ ئاژانسی هه‌واڵی "ئیرنا"ـی ئێرانی به‌ ناوی ئه‌وه‌وه‌ بڵاویانكردووه‌ته‌وه‌، كه‌ ده‌رباره‌ی ریفراندۆمی سه‌ربه‌خۆییی كوردستانه‌ كه‌ بڕیاره‌ مانگی دابێ به‌رێوه‌ بچێت.

 
بەرکەوتەیەکی چەکی کیمیایی ئەو کارەی لە پێناو ڕیفراندۆم کرد

THURSDAY, 17 AUGUST 2017 15:08:47

هەولێر-KDP.info- دوای ڕاگەیاندنی وادەی ئەنجامدانی پرۆسەی ڕیفراندۆم لە ھەرێمی کوردستان، لە ناوخۆ و دەرەوەی ھەرێمی کوردستان ھاووڵاتیانی کورد بە شێوەی جیاجیا پشتگیریی بۆ پرۆسەی ڕیفراندۆم دەردەبرن، ئەمجارەیان بریندارێکی چەکی کیمیایی، کە بە ھۆی کیمیارانکردنی ھەڵەبجەوە ھەردوو قاچی لەدەست داوە و نیشتەجێی بەریتانیایە، ئێستا گەڕاوەتەوە بۆ ھەرێمی کوردستان بۆ پشتگیریکردن لە پرۆسەی ڕیفراندۆم و ماوەی شەش ڕۆژەش لە ھەڵەبجەوە بە پیادە و بە عارەبانەکەی خۆی ھاتووە بۆ پەرلەمانی کوردستان و ئەمڕۆ گەیشتە پەرلەمانی کوردستان.

سه‌رۆك بارزانی: پاشه‌ڕۆژێكی گه‌ش چاوه‌ڕوانی خه‌ڵكی كوردستان ده‌كات

THURSDAY, 17 AUGUST 2017 13:08:58

هه‌ولێر-KDP.info-  له‌ دیداریدا له‌گه‌ڵ رابه‌ری گشتیی بزووتنه‌وه‌ی ئیسلامیی كوردستان، (سه‌رۆك بارزانی) ڕایگه‌یاند، له‌ دوای ریفراندۆم و سه‌ربه‌خۆییش، كوردستان ده‌بێته‌ فاكته‌رێكی به‌هێز بۆ پاراستنی سه‌قامگیری له‌ ناوچه‌كه‌دا. جه‌ختیشی كرده‌وه‌، پاشه‌ڕۆژێكی گه‌ش چاوه‌ڕوانی خه‌ڵكی كوردستان ده‌كات.

 


 
© 2017 Kurdistan Democratic Party, KDP