Kurdî  ■  كوردی  ■  عربي
WED, 1 MAR 2017 22:52 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

راگەیێندراوی هاوبەش: پارتی و یەکێتی بۆ چارەکردنی کۆی کێشەکان لە کۆبوونەوەکاندا بەردەوام دەبن
| KDP.info


هەولێر-KDP.info-  هەردوو مەکتەبی سیاسی پارتی دیموکراتی کوردستان و یەکێتیی نیشتمانی کوردستان لە راگەیاندراوێکی هاوبەشدا ناوەڕۆکی کۆبوونەوەی ئەمڕۆیان خستە ڕوو کە تێیدا لەسەر شەش خاڵدا گفتوگیان کردووە و جەخیتان کردووەتەوە کە لە کۆبوونەوەی نێوانیاندا بەردەوام دەبن بۆ ئەوەی بە زووی پێوەست بە کۆی کێشەکان چارەی گونجاو بدۆزنەوە.

دەقی ڕاگه‌یه‌نراوى كۆبوونه‌وه‌ى هه‌ردوو مه‌كته‌بى سیاسیى پارتى دیموكراتى كوردستان و یه‌كێتیى نیشتمانیى كوردستان:



له‌ ڕوانگه‌ى هه‌ستكردن به‌ ئه‌ركه‌ مێژووییه‌كانى هه‌ردوو حیزب له‌م قۆناغه‌ هه‌ستیاره‌ى كه‌ هه‌رێمى كوردستان و ناوچه‌كه‌ پێیدا تێده‌په‌ڕێت و پاراستنى به‌رژوه‌ندییه‌ باڵاكانى نه‌ته‌وه‌كه‌مان و ده‌ستكه‌وته‌كانى دواى ڕاپه‌رین كه‌ به‌ خوێن و خه‌بات به‌ ده‌ست هاتوون و له‌ ئاكامى كارى هاوبه‌ش و ته‌بایى و یه‌كڕیزیى نێوماڵى كوردستانى بووه‌، ئه‌مڕۆ شاندى مه‌كته‌بى سیاسیى هه‌ردوولا له‌ شارى هه‌ولێرى پایته‌خت كۆبوونه‌وه‌ و ئه‌م بابه‌تانه‌یان خسته‌ به‌ر باس و گفتوگۆ:

یه‌كه‌م: پێوه‌ندیى نێوان هه‌روولا: بۆ زیاتر پته‌وكردن و په‌ره‌پێدان و گونجاندنى پێوه‌ندییه‌كان به‌پێى ئه‌ركه‌كان و هه‌لومه‌رجى نوێ، به‌تایبه‌تى له‌ بوارى حوكمڕانى و په‌یوه‌ندییه‌ كوردستانییه‌كان و په‌یوه‌ندیى هه‌رێم له‌گه‌ڵ حكوومه‌تى فیدرال و وڵاتانى ناوچه‌كه‌ و جیهاندا، كه‌ له‌ ئاست گۆڕانكارییه‌ خێرا و زۆره‌كانى ئه‌م قۆناغه‌دا بێت و له‌ به‌رژوه‌ندیى گه‌لى كوردستاندا بێت.

دووه‌م: هه‌وڵدان بۆ چاره‌سه‌ریى كێشه‌ و گرفته‌كانى هێزه‌ سیاسییه‌كانى پارچه‌كانى دیكه‌ى كوردستان و ڕێزگرتن له‌ سه‌روه‌ریى یاسا و ده‌ستوه‌رنه‌دان له‌ كاروبارى یه‌كتر.

سێیه‌م: چۆنیه‌تیى چاره‌كردنى قه‌یرانى دارایى كه‌ به‌رۆكى خه‌ڵكى كوردستان به‌گشتىی و مووچه‌خۆرانى به‌تایبه‌تى گرتووه‌، بۆیه‌ هه‌ردوولا پاڵپشت و هاوكار بین بۆ حكوومه‌تى هه‌رێم و ده‌زگا په‌یوه‌ندیداره‌كان له‌ دۆزینه‌وه‌ى ڕێگاى چاره‌كردن و ئه‌نجامدانى چاكسازى له‌و بوارانه‌ى پێویستن كه‌ ببێته‌ مایه‌ى دابینكردنى بژێویى كۆمه‌ڵانى خه‌ڵك و دابینكردنى مووچه‌ بۆ مووچه‌خۆران و گرنگیدان به‌ بوارى نه‌وت و گاز و دابینكردنى شه‌فافیه‌تى زیاتر و پێویست.

چواره‌م: دانانى ڕێوشوێنى گونجاو بۆ چاره‌سه‌ریى كێشه‌ بنه‌ڕه‌تییه‌كانى هه‌رێمى كوردستان له‌پێش هه‌موویانه‌وه‌ كاراكردنه‌وه‌ى په‌رله‌مانى كوردستان.

پێنجه‌م: دانانى كۆمیته‌یه‌كى هاوبه‌ش كه‌ نوێنه‌رایه‌تیى لایه‌نه‌ سیاسییه‌كانى كوردستان و پێكهاته‌ نه‌ته‌وه‌ییه‌كان له‌خۆ بگرێت، به‌مه‌به‌ستى گفتوگۆكردن له‌گه‌ڵ حكوومه‌تى عیراق و هه‌ر لایه‌نێكى په‌یوه‌ندار بۆ یه‌كلاكردنه‌وه‌ى پرسى ناوچه‌كانى مادده‌ى140 له‌ ئاینده‌یه‌كى دیاریكراودا، ئینجا ڕیفراندۆم و سه‌ربه‌خۆییى كوردستان.

شه‌شه‌م: كۆبوونه‌وه‌كانى نێوان هه‌ردوولا به‌رده‌وام ده‌بن بۆ ئه‌وه‌ى به‌ زوویى بگه‌ینه‌ ڕێككه‌وتنێك كه‌ سه‌ره‌نجام بتوانین كۆى كێشه‌كان چاره‌سه‌رى گونجاوى بۆ دابنێین.

مه‌كته‌بى سیاسیى یه‌كێتیى نێشتمانیى كوردستان.
مه‌كته‌بى سیاسیى پارتى دیموكراتى كوردستان. ‌
11/1/2017
 




دوایین هەواڵەکان

مه‌له‌كردن له‌گه‌ڵ قڕش

WEDNESDAY, 01 MARCH 2017 22:03:49

كه‌ریم قادر

مه‌له‌كردن له‌گه‌ڵ قڕش بۆ كه‌س نه‌چۆته‌ سه‌ر تا بۆ ئه‌و ده‌سه‌ڵاتانه‌ بچێته‌ سه‌ر، كه‌ شاتی و باتی به‌ ئاسایشی ناوچه‌كه‌ ده‌كه‌ن و، هاوسه‌نگیی سیاسی تێكده‌ده‌ن و ئاسته‌نگ له‌به‌رده‌م سه‌قامگیربوونه‌وه و یه‌كسانیی‌ نێوان گه‌لان دروست ده‌كه‌ن.

به‌ وێنه‌؛ ساڵیادی کۆچی مستەفا بارزانیی نه‌مر لە ڕۆژئاوای كوردستان بەرز راگیرا

WEDNESDAY, 01 MARCH 2017 20:03:00

ڕۆژئاوای كوردستان-KDP.info-  لە یادی کۆچی دوای ژەنەراڵ (مستەفا بارزانیی نەمر)دا، ڕۆژئاوای کوردستانیش یادەکەی بەرز ڕاگرت و بە چالاکیی جۆراوجۆر پەیمانی نوێبوونەوە بۆ قوتابخانەی (بارزانی) گوترایەوە. چالاوانێکی ڕۆژئاوای کوردستانیش دەڵێت، وێرای گوشاری په‌یەدە، توانرا یادەکە بەرز راگیرێت.

 
ئەنجوومەنی پارێزگای نەینەوا: بەغدا نەیتوانیوە ئەمنیەتی ناوچە ئازادکراوەکان بپاریزێت

WEDNESDAY, 01 MARCH 2017 19:03:48

هه‌ولێر-KDP.info-  ڕۆژنامەی شەرقولئەوسەتی لەندەنی ئاماژە بەوە دەکات، سەرەرای ئەوەی چوار مانگ بەسەر ئازادکردنی لای چەپی شاری مووسڵدا تێپەڕیوە، تا ئێستا ناوچە ئازادکراوەکان بەدەست بێ ئاسایشی و خزمەگۆزاریدا دەناڵێنن، ئەمەش بووەتە ئاستەنگ لەبەردەم گەڕانەوەی ئاوارەکان بۆ شوێنەکانیان.

 
قودسی عه‌ره‌بی: گرووپێکی حەشدی شەعبی داوای دامەزراندنی کۆماری ئیسلامیی عێراق دەکات

WEDNESDAY, 01 MARCH 2017 19:03:43

هه‌ولێر-KDP.info-  لێدوانه‌كانی (قه‌یس ئه‌لخه‌زعه‌لی) سكرتێری گشتیی بزووتنه‌وه‌ی (عصائب اهل الحق) له‌باره‌ی مانه‌وه‌ی حه‌شدی شه‌عبی دوای شه‌ڕه‌كانی دژ به‌ داعش، ترس و دڵه‌ڕاوكێی له‌ شه‌قامی عێراقیدا دروست كردووە.

 
لە دژی ئێران، ئیسرائیل داوای هاوپەیمانی لەگەڵ سعوودیە دەکات

WEDNESDAY, 01 MARCH 2017 19:03:49

هه‌ولێر-KDP.info-  بەرپرسێکی باڵای ئیسرائیل داوای هاوپەیمانی لەگەڵ سعوودیە دەکات لە دژی ئێران. بەپێی ڕاپۆرتێکی ئاژانسی مێهری ئێرانی، وەزیری بەرگریی ئیسرائیل پێشنیازی بە بەرپرسانی حکوومەتی سعوودیە کردووە هاوپەیمانی بێت لە دژی سیاسەتەکانی ئێران.

 


 
© 2017 Kurdistan Democratic Party, KDP