Kurdî  ■  كوردی  ■  عربي
SUN, 22 APR 2018 02:01 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

یڵدرم: ناوچه‌كه‌ له‌به‌رده‌م گۆڕانكاریدایه‌.. جه‌خت له‌ پته‌وكردنی هه‌ماهه‌نگی نێوان هه‌ولێر و ئانكارا كرایه‌وه‌
| KDP.info


هه‌ولێر-KDP.info-  سه‌رۆكوه‌زیرانی توركیا، ڕۆڵی (سەرۆک بارزانی) و (نێچیرڤان بارزانی) له‌ ڕەخساندنی زەمینەی سەردانی شاندی تورکیا بۆ بەغدا به‌رز نرخاند و، ئاماژە به‌ هه‌بوونی پێوه‌ندیی دێرین له‌ نێوان هه‌ولێر و ئانكارادا، (یڵدرم) گوتی، پێشبینی دەکرێت ناوچەکە بەرەوڕووی گۆڕانکاریی ببێتەوە و، پێویستە هەردوولا هەماهەنگی زیاتریان هەبێت بۆ هەر پێشهات و ئەگەرێک.

ئه‌مڕۆ یەکشەممە 8ـی1ـی2017، لە هەولێر، (مەسعوود بارزانی) سەرۆکی هەریمی کوردستان، پێشوازی لە (بینالی یڵدرم) سەرۆكوەزیرانی توركیا و شاندێكی یاوەری كرد كە لە ژمارەیەك لە وەزیران و بەرپرسانی باڵای كۆماری توركیا پێكهاتبوو.


لە سەرەتای کۆبوونەوەکەدا سەرۆکوەزیرانی تورکیا، خۆشحاڵیی خۆی بە سەردانی هەرێمی کوردستان و دیداری (سەرۆک بارزانی) ڕاگەیاند و سوپاسگوزاریی خۆی بەو پێشوازییە گەرمە دەربڕی و، سوپاسی (سەرۆک بارزانی) و (نێچیرڤان بارزانی) کرد کە هاوکار بوون بۆ ڕەخساندنی زەمینەی سەردانی شاندی تورکیا بۆ بەغدا کە پێویستە وەک دوو وڵاتی دراوسێ پەیوەندییەکی ئاساییان هەبێت. ئاماژەی بەوەیش دا کە لەبارەی بنکەی مەشقی باشیک، لەگەڵ بەغدا لێکتێگەیشتنیان هەیە.
سەبارەت بە پەیوەندییەکانی هەرێمی کوردستان و تورکیا، سەرۆکوەزیرانی تورکیا ئاماژەی بەوەدا ''پەیوەندییەکی دێرینمان هەیە و پێویستە پەرە بەو پەیوەندییە بدرێت بەتایبەتی لە بارودۆخی ئێستادا کە پێشبینی دەکرێت ناوچەکە بەرەوڕووی گۆڕانکاریی ببێتەوە و، پێویستە هەردوولا هەماهەنگی زیاتریان هەبێت بۆ هەر پێشهات و ئەگەرێک.''
(بیناڵی یەڵدرم) هاوكات ئاماژەی بە پەیوەندییەکانی ئابووری و بازرگانی و کۆمەڵایەتی و پەروەردە و تەندروستی کرد کە تورکیا دەتوانێت هاوکاری کوردستان بێت و بۆ ئەو مەبەستەیش ئەو کۆمسیۆنە کارا دەکرێتەوە کە ئەرکی پەرەپێدانی ئەو هاوکارییانەیە.

لە بەرانبەردا (سەرۆک بارزانی) وێڕای بەخێرهێنانی سەرۆکوەزیرانی تورکیا و شاندی یاوەری، سەردانەکەیانی بەرز نرخاند و سوپاسی گەل و حکوومەتی تورکیای کرد کە لە ڕابردوودا هاوکاری حکوومەت و خەڵکی کوردستان بوونە و داوای کرد هاوکاری و هەماهەنگیی هەردوولا بەردەوام بن و پەرەیان پێ بدرێت.
(سەرۆک بارزانی) کورتەیەکی لەبارەی ڕەوشی سیاسی و ئابووریی هەرێمی کوردستان خستەڕوو، هەروەها ئاماژەی بە ئۆپەراسیۆنی ئازادکردنی مووسڵ و هەماهەنگیی نێوان هێزی پێشمەرگە و سوپای عێراق و ئەو پشتیوانییە کرد کە لەلایەن هەرێمی کوردستانەوە بۆ حکوومەتی عێراق خراوەتەڕوو تا ئۆپەراسیۆنەکە بە سەرکەوتوویی بەڕێوە بچێت و، ئاسایش و سەقامگیریی دەستەبەر بکرێت.


لە بەشێکی دیکەی دیدارەکەدا تەئکید کرایەوە کە ئاسایش و سەقامگیریی هەرێمی کوردستان و تورکیا پێکەوە بەستراوە و نابێ ڕێگە بدرێت ئەو سەقامگیرییە بکەوێتە بەر هەڕەشە.
دوای کۆبوونەوەکە، سەرۆکی هەرێمی کوردستان و سەرۆکوەزیرانی تورکیا بەشداری پڕێسكۆنفڕانسێك بوون و ناوەڕۆكی كۆبوونەوە و ئامانجی سەردانەكەیان بۆ ڕاگەیاندنەكان باس كرد.
لە کۆنگرە ڕۆژنامەوانییەکەدا (سەرۆک بارزانی)، سەردانی (بیناڵی یەڵدرم) و شاندی یاوەری بۆ هەرێمی کوردستان بەرز نرخاند و بە پشتیوانیکردنی گەل و دەوڵەتی تورکیا بۆ هەرێمی کوردستان لەقەڵەمی دا. لە بەرانبەریشدا سەرۆکوەزیرانی تورکیا باسی سەردانەکەی بۆ بەغدا کرد و بە سەرکەوتووی نرخاند و جەختیشی لە پەرەپیدانی پەیوەندییەکانی نێوان هەرێمی کوردستان و تورکیا کردەوە و باسی تەحەدییاتی ئەمنی و ئابووری کرد و ڕایگەیاند کە بۆ پەرەپێدانی پەیوەندییە ئابوورییەکانی نێوان هەرێم و تورکیا و چارەسەرکردنی کێشە ئابوورییەکانی هەرێم، لیژنەیەکی هاوبەش پێکدەهێندرێت.
دواتریش نیوەڕۆخوانێک بۆ شاندی میوان ڕێک خرا کە تیایدا (نێچیرڤان بارزانی) سەرۆکی حکوومەتی هەرێمی کوردستان و (قوباد تاڵەبانی) جێگری سەرۆکی حکوومەت و (مەسروور بارزانی) ڕاوێژکاری ئەنجوومەنی ئاسایشی هەرێمی کوردستان و (دکتۆر فواد حوسێن) سەرۆکی دیوانی سەرۆکایەتیی هەرێمی کوردستان و ژمارەیەك لە وەزیر و بەرپرسانی حكوومەتی هەرێم ئامادەی بوون.


دوای نیوەڕۆ، (سەرۆک بارزانی) و شاندی یاوەری، بە هاوڕێیەتی (مەسروور بارزانی) ڕاوێژکاری ئەنجوومەنی ئاسایشی هەرێمی کوردستان، (کەریم شنگالی) وەزیری پێشمەرگە بە وەکالەت و ژمارەیەک لە فەرماندەکانی پێشمەرگە، سەنگەرەکانی پێشمەرگەیان لە چیای زەرتک بەسەر کردەوە و لەلایەن (فەریق جەمال محەممەد) سوپاسالاری وەزارەتی پێشمەرگەوە قۆناغەکانی تێکشکاندنی تیرۆریستانی داعش لەلایەن هێزی پێشمەرگە لەو میحوەرە کە بووە هۆی ڕێگا خۆشکردن بۆ دەستپێکردنی ئۆپەراسیۆنی ئازادکردنی مووسڵ و پێشڕەویی هێزەکانی سوپای عێراق بۆ ناو شاری مووسڵ، خرایە ڕوو.
دواتریش سەرۆکوەزیرانی تورکیا و شاندی یاوەری كۆتایییان بە سەردانەكەیان بۆ هەرێمی كوردستان هێنا و لە فڕگەی نێودەوڵەتیی هەولێر، لە لایەن (سەرۆك بارزانی) و ژمارەیەك لە بەرپرسانی حكوومیی هەرێمی كوردستان بەڕێ كران.

لێرە دەقی کۆنگرە ڕۆژنامەوانییەکەی (سەرۆک بارزانی) و سەرۆکوەزیرانی تورکیا، ببینە.




دوایین هەواڵەکان

كاندیدێکی پارتی: گوشار دەخەینە سەر بەغدا بۆ دەستەبەرکردنی مافە دەستوورییەکانی هەرێم

SATURDAY, 21 APRIL 2018 16:04:41

سلێمانی-KDP.info-  یاساناسێك ده‌ڵێت: ئه‌گه‌ر به‌غدا پێشلی ده‌ستووری نه‌كردایه‌، كورد مافی ڕه‌وای خۆی وه‌رگرتبوو، به‌ڵام كاتێك حكوومه‌تی عێراق هێزی چه‌كداری بنیات نایه‌وه‌، بە ته‌واوه‌تی پشتی له‌ ده‌ستوور و یاسا كرد به‌رامبه‌ر به‌ كورد. كاندیدێكی لیستی ژماره‌ 184ی پارتی له‌ سنووری پارێزگای سلێمانی ده‌ڵێت: به‌ پێی یاسا و ده‌ستوور ته‌واوی ئه‌و مافانه‌ی كوردستان پێشێل كراون له‌ لایەن حكوومه‌تی عێراقەوە، بۆ گه‌له‌كه‌مانی وه‌رده‌گرینه‌وه‌.

 
مەکتەبی سەرۆک ساڵیادی گۆڤاری گوڵان پیرۆز دەکات

SATURDAY, 21 APRIL 2018 16:04:28

هەولێر-KDP.info-  مەکتەبی سەرۆک، بەبۆنەی بیست و چوارەمین ساڵیادی دەرچوونی گۆڤاری گوڵان پەیامێکی پیرۆزبایی ئاراستەی سەرنووسەر و ستافی گۆڤارەکە کرد کە ئەمە دەقەکەیەتی:

 
پارتی ٢٤ ساڵەی گۆڤاری گوڵان پیرۆز دەکات

SATURDAY, 21 APRIL 2018 16:04:56

هەولێر-KDP.info-  مەکتەبی سیاسی پارتی دیموکراتی کوردستان و دەزگای رۆشنبیری و راگەیاندنی پارتی، لە دوو پەیامی جوودادا ٢٤ ساڵەی گۆڤاری گوڵان پیرۆز دەکەن کە ئەمە دەقەکانیەتی:

 
راگەیاندنی پارتی، ١٢٠ ساڵەی رۆژنامەگەری کوردی پیرۆز دەکات

SATURDAY, 21 APRIL 2018 16:04:35

هەولێر-KDP.info- دەزگای رۆشنبیریی وراگەیاندنی پارتی دیموكراتی كوردستان بۆ(120)یەمین ساڵیادی رۆژنامەگەریی كوردی پەیامێکی پیرۆزبایی راگەیاند کە ئەمە دەقەکەیەتی:

 
"بەغدا ڕێگرە لە دانی قەرزی ژاپۆن بە ھەرێمی کوردستان"

SATURDAY, 21 APRIL 2018 16:04:35

هەولێر-KDP.info-  وڵاتی ژاپۆن چەند پڕۆژەیەکی کەرتی کارەبا لە ھەرێمی کوردستان جێبەجێ دەکات و گوتەبێژی وەزارەتی کارەبای حکوومەتی ھەرێمی کوردستانیش دەڵێ، ئەو قەرزەی ژاپۆن بە عێراقی داوە بەشی ھەرێمی کوردستانی تێدایە بۆ جێبەجێکردنی  پڕۆژەی دیکە، بەڵام تا ئێستا بەغدا ڕازی نەبووە بە خەرجکردنی بەشی ھەرێمی کوردستان.

 


 
© 2018 Kurdistan Democratic Party, KDP