به‌ختیار شاخی
قسەكانی وەزیری بەرگریی عێراق، لەبارەی شەڕی ئازادكردنەوە مووسڵ و ڕێككەوتننامەی 12ـــی7ـــی2016 لەنێوان كوردستان و ئەمه‌ریكادا، هەروەها ڕوونكردنەوەكەی وەزارەتی بەرگریی عێراق، لای خەڵكی كوردستان بووه‌تە جێی پرسیار. میدیای كوردستانییش، خۆی ماندوو ناكات قسەی بەرپرسانی كوردستان وەربگرێت.
ئایا عوبێدی شتێكی پێچەوانەی ڕێككەوتنەكەی گوتووە؟
بۆ ئەوەی میدیای چەواشەكار ڕاستییەكە نەشێوێنێت، دەبێ هۆكاری ئەو دوو خاڵەی كە عوبێدی گوتوویەتی ڕوون بكرێتەوە:
1ـــ گوایە عوبێدی گوتوویەتی: ڕێگە نادەین پێشمەرگە بەشداریی كۆنتڕۆڵكردنەوەی مووسڵ بكات.
ئەوە مەرجی عێراق نییە و لە بنەڕەتدا كوردستان نایەوێ پێشمەرگە بچێتە ناو شاری مووسڵه‌وه. بەوەیش خۆی لە شەڕی ناوشار دەپارێزێت، بەتایبەتی لە ئەگەری بەشداریكردنی حەشدی شیعەیشدا دوور نییە شەڕەكە ببێتە شەڕێكی مەزهەبی. بەڵام ناوچە كوردستانییەكانی دەوری مووسڵ لەلایەن پێشمەرگەوە كۆنتڕۆڵ دەكرێنەوە.
2ـــ گوایە عوبێدی گوتوویەتی دەبێ پێشمەرگە لەو شوێنانە بكشێتەوە كه كۆنتڕۆڵ دەكرێن.
بەپێی ڕێككەوتنەكەی كوردستان و ئەمه‌ریكا كە عێراقیش پەسندی كردووە، شەڕی ئازادكردنی مووسڵ بە هەماهەنگیی هەرسێ لا دەبێت. ئەو ناوچانەی ئازادیش دەكرێن بە هەماهەنگیی هەرسێ لا بەڕێوە دەبرێن. ئەم خاڵە بۆ ئەو ناوچانەیە كە لەمەودوا ئازاد دەكرێن. عوبێدییش باسی ڕابردوو ناكات. ئەو ناوچانەی پێشتر پێشمەرگە ئازادی كردوون، لە دەرەوەی ڕێككەوتنەكەن و پێشتریش كوردستان ڕایگەیاندووە كە خەڵكی ئەو ناوچانە لە ڕاپرسییەكدا بڕیار لە چارەنووسی خۆیان دەدەن.
عوبێدی ویستوویەتی یاری بە وشە بكات تا عێراق وەك دەوڵەتێكی بەهێز پێشان بدات، شتێك كە خۆیشی باوەڕی پێی نییە و دەزانێ ئەگەر ئێستا پێشمەرگە دەست لە پشتیوانیكردنی سوپاكەی هەڵگرێت، هێزەكەی وەك باڵۆنێكی كون، پووچ دەبێتەوە. بەڵام ئەو وەزیری بەرگریی عێراقە نەك كوردستان و بەو سیفەتەیش چووەتە كۆنگرەی بەرەوڕووبوونەوەی داعش و ناچارە وا قسە بكات. تەنانەت ئەو كە پێشتر دەیگووت نابێ حەشدی شەعبی بەشداریی شەڕی مووسڵ بكات، ئێستا گوتوویەتی كە ئەوە لەدەست سەرۆكوەزیراندایە. واتە، ئەگەر عەبادی بڵێ بەشدار دەبن، عوبێدی بێ ناڕەزایی دەڵێ بەخێر بێن!
لێرەدایە كە زیاتر لە گرینگیی ئەوە تێدەگەین كە تا زووتر لەژێر باری قورسی ئەو دەوڵەتە نەخۆشە دەربچین، زووتر لەكۆڵ شەڕی دەروونی و جەستەیی دەبینەوە. تا سەربەخۆ نەبین، ئیمتیازی ئازایەتی و گیانفیداییشمان دەچێتە گیرفانی دەوڵەتی تێكشكاوی عێراقی عەرەبی. چونكە یاساكانی ئێستای جیهان، بۆ دەوڵەتەكان داڕێژراون، نەك نەتەوە بەشخوراوەكان.