هەولێر-KDP.info- لە راگەیێندراوی کۆبوونەوەی مەکتەبی سیاسی پارتی دیموکراتی کوردستان هاتووە "لە رێككەوتنی نێوان بزووتنەوەی گۆڕان و یەكێتی نیشتمانی كوردستان رەچاوی هەوڵێك دەكرێت بۆ فراوانكردنی ناكۆكییە ناوخۆییەكان كە خزمەتی چارەسەركردنی كێشە و گرفتە چەقبەستووەكان ناكات، بەڵكو بەرەو دۆخە نەخوازراوەكانی جارانمان دەباتەوە، لەهەمان كاتدا رێگرتنە لە یەكێتی نیشتمانی بۆ هەبوونی هەڵوێستێكی جیاواز لە بزووتنەوەی گۆڕان كە بەرەو ئاڵۆزی و توندڕۆیی زیاتر دەچێت".
دەقی راگەیێندراوی کۆبوونەوەی مەکتەبی سیاسی پارتی دیموکراتی کوردستان:
پارتی دیموكراتی كوردستان هەمیشە راوبۆچوونی وا بووە كە رێككەوتن لەنێوان لایەنە سیاسیەكان كارێكی ئاساییە، نەخاسمە ئەگەر لەپێناو بەرژەوەندیی گەلی كوردستان و یەكڕیزیی هێزەكانی و نەهێشتنی ناكۆكیەكان بێت، نەك بۆ دژایەتیی لایەنێكی تر و، گەورەتركردنی ئەو كەلێنانەبێ كە هەن. لە هەمان كاتیشدا بنەما و خاڵەكانی هیچ رێككەوتننامەیەك لەنێوان دوو حزب، بگرە زیاتر لە دوو حزبیش لەلایەن پارتییەوە بە بنەمای بەڕێوەبردنی پرۆسەی سیاسی و یاسایی و ئیداریی لە هەرێمی كوردستان دانانرێن.
لە رێككەوتنی نێوان بزووتنەوەی گۆڕان و یەكێتی نیشتمانی كوردستان رەچاوی هەوڵێك دەكرێت بۆ فراوانكردنی ناكۆكییە ناوخۆییەكان كە خزمەتی چارەسەركردنی كێشە و گرفتە چەقبەستووەكان ناكات، بەڵكو بەرەو دۆخە نەخوازراوەكانی جارانمان دەباتەوە، لەهەمان كاتدا رێگرتنە لە یەكێتی نیشتمانی بۆ هەبوونی هەڵوێستێكی جیاواز لە بزووتنەوەی گۆڕان كە بەرەو ئاڵۆزی و توندڕۆیی زیاتر دەچێت.
یەكێتی نیشتمانی بەبێ هیچ جۆرە رەچاوكردنێكی هاوپەیمانیی و رێككەوتنی ستراتیژی و هاوبەشیی لە بەڕێوەبردنی كوردستاندا لەگەڵ پارتی دیموكراتی كوردستان و بەبێ هیچ جۆرە گفتوگۆ و ئاگاداركردنەوەیەكی پارتی، خۆی خستە رێككەوتنێك لەگەڵ لایەنێكدا كە كێشەیەكی سیاسیی لەگەڵ پارتی دیموكراتی كوردستاندا دروست كردووە و، خۆی گەیاندە لێواری بوونەبەشێكی ئەو كێشەیە، ئەویش بە پێچەوانەی ماوەی رابردوو كە یەكێتی لەگەڵ پارتیدا هاوكاربوون بۆ چارەسەری كێشەكان.
پارتی جگە لە ئیرادەی گەل هیچ ئیرادەیەكی تر قبوڵ ناكات و ئەزموونی رابردووش دەریخست كە بەبێ پارتی ئیدارەی هەرێم ئەستەمە.
پارتی دیموكراتی كوردستان بە هەستیارییەوە لەبارودۆخی ئێستای كوردستان دەڕوانێت و بەهیچ شێوەیەك رێگا بەهەر هەوڵێك نادات بۆ تێكدانی سەقامگیریی ئیداری و سیاسی و ئاسایش و لاوازكردنی ئیرادە و خۆڕاگریی پێشمەرگە كە وا لە شەڕێكی سەخت دایە لەگەڵ دڕندەترین دوژمنی مرۆڤایەتی و ئازادی و، هێشتاش شەڕی گەورەترمان لەبەر دەمدا ماوە. هەروەها پارتی دیموكراتی كوردستان سوورە لەسەر ئەوەی كە خوێنی پێشمەرگە لەپێناو ئازادیدا نابێ بەفیڕۆ بدرێت و دەبێ گەلی كوردستان لە رێگەیەكی رەوا و یاسایی وەك ریفراندۆم ئیرادەكەی پیشانی هەموو جیهان بدات.
لەگەڵ ئەوەیش كە كوردستان لە تەنیشت دڕندەترین هێزی تیرۆریستی و لە ناوچەیەكی شڵەژاودایە، سوپاس بۆ خوا لە سەقامگیرییەكی گەورە دایە، لەبەر ئەوە پارتی دیموكراتی كوردستان باوەڕی وایە كە دەبێ هەموو هەوڵەكان لەپێناو ئەو سەقامگیریە و چارەسەری كێشەكان و پاراستنی دەسكەوتەكاندابن لەپێش هەر شتێكی تر.
مەکتەبی سیاسی پارتی دیموکراتی کوردستان