هەولێر-KDP.info- سەبارەت بە سەردانی (سەرۆك بارزانی) بۆ دەوڵەتی ئوردن، (سەعدی ئەحمەد پیرە) دەڵێ، سەردانێکی گرینگ و باشە، لە هەموو كۆبوونەوەكانیشدا ئاڵای كوردستان بەرچاو دەكەوت، ئەمەیش بەڵگەی ناساندنی كوردە و هەنگاوێكی باشە بۆ قۆناخەكانی داهاتوو و گەییشتنی كورد بە مافە ڕەواكانی.
ئەندامی مەكتەبی سیاسیی یەكێتیی نیشتمانیی كوردستان (سەعدی ئەحمەد پیرە)، بە ماڵپەڕی فەرمیی پارتیی دیموكراتی كوردستانی گوت، سەردانی سەرۆكی هەرێم بۆ وڵاتی ئوردن و بەشداریكردن لە كۆڕبەندی ئابووریی جیهانی و كۆبوونەوەی لەگەڵ (شاعەبدوڵڵا) و سەرۆكی وڵاتانی دیكەی عەرەبی، سەردانێكی گرینگ و باشە، كە لە هەموو كۆبوونەوەكاندا ئاڵای كوردستان بەرچاو دەكەوت، ئەمەیش بەڵگەی ناساندنی كوردە و هەنگاوێكی باشە بۆ قۆناخەكانی داهاتوو و گەییشتنی كورد بە مافە ڕەواكانی.
(سەعدی پیرە) دەیشڵێت: "رەنگە دانانی ئاڵای كوردستان لە وڵاتێكی دیكەی ناعەرەبی ئەوەندە گرینگیی بۆ كورد نەبێت، بەڵام لە وڵاتێكی وەك ئوردن كە وڵاتێكی گرینگە لە رۆژهەڵاتی ناویندا، بایەخی خۆی هەیە و وەڵامدانەوەیەكی زۆر باشە بۆ ئەوانەی كە هەوڵی پڕوپاگەندە دەدەن لەسەر كورد؛ بۆیە رۆژ بە رۆژ هەرێمی كوردستان بەرەو پێشەوە دەچێت، ئەو بەرەوپێشچوونەیش قۆناخ و هەناگاوی گرینگی بە دواوە دەبێت، هەروەها دەبێت ئێمە هەموومان پێكەوە هەنگاوی باش بنێین بۆ ئەوەی كورد لە باكووری كوردستان دەنگێكی باش بهێنێت، بۆ ئەوەی زیاتر ئاشتی بەرقەرار بێت، بە دڵنیاییشەوە سەركردایەتیی سیاسیی كوردستان پشتگیری لەو هەنگاوە دەكات".
ئەو ئەندامەی مەكتەبی سیاسیی یەكێتیی نیشتمانیی كوردستان ئاماژەیشی دا، ئوردن گرینگی بە هەرێمی كوردستان دەدات، لەبەر ئەوەی ئێمە لە بارێكی ئەمنیی تەواوداین، لەبیرمان نەچێت، نزیكەی 150 هەزار ئاوارەی ئەنبار چوونە بەغدا و باری نائاسایی راگەیاندرا، كەچی زیاتر لە ملیۆن و نیوێك ئاوارە هاتوونەتە هەرێمی كوردستان و باری نائاساییمان رانەگەیاندووە، ئەوە بەڵگەی باشی و سەقامگیریی باری ئەمنیی هەرێمی كوردستانە، بۆ چارەكردنی كێشەكان، لە هەرێمی كوردستاندا بەو ئیمكانییەتە كەمە و بە چەكی كۆن، بە پشتیوانییەكی كەمی كۆمەڵگەی نێودەوڵەتی، توانیومانە هەرێمی كوردستان بپارێزین و هەموو ئەو ناوچانەی مەبەستمانە پاكیان بكەینەوە، كە ئەوە خۆی لە خۆیدا ئەستێرەی كوردستانی لە دنیای دەرەوەدا گەشتر كردووە.
ڕابین شێروانی