Kurdî  ■  كوردی  ■  عربي
SAT, 21 SEP 2019 08:48 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

هاتوچۆ: بێسەروبەری بوونی نییە.. رۆژنامەنووسێك: هاتوچۆ بە ئەركی خۆیان هەڵناستن
| KDP.info


هەولێر-KDP.info- سەرباری ئەوەی شەقامەكانی نێوشاری هەولێر پان و بەرین و رێكن رۆژنامەنووسێك دەڵێ، پۆلیسی هاتوچۆ بە ئەركی خۆیان هەڵناستن و لە ئاست سەرپێچیی شۆفێراندا چاو دەپۆشن، گوتەبێژی پۆلیسی هاتوچۆی هەولێریش رەتی دەكاتەوە كەمتەرخەم بن و هەندێ لە كێشەكانیش دەخاتە ئەستۆی شارەوانیی هەولێر.

سەرباری ئەوەی شەقامەكانی نێوشاری هەولێر پان و بەرین و رێكن، بەڵام بێسەروبەرییەك لە هاژوشتنی ئوتۆمبێل لە لایەن شۆفێرانەوە دەبیندرێت، سەرباز ساڵحی رۆژنامەنووس، لە لێدوانێكدا بۆ ماڵپەڕی فەرمیی پارتی دیموكراتی كوردستان، بێزاریی خۆی نەشاردەوە و ئاماژەی بەوەدا، كە پۆلیسی هاتوچۆ لە شاری هەولێر بە ئەركی خۆیان هەڵناستن و بە كەمتەرخەم ناوی بردن، بەو پێیەی گەر گەڕانێكی نێو شارەكە بكەیت، لە هەموو كوچە و كۆڵان و شەقامێكدا سەرپێچی دەبینی، وێڕای بوونی پۆلیسی هاتوچۆش، بەڵام چاوپۆشی دەكەن.

رائید فازڵ حاجی، گوتەبێژی پۆلیسی هاتوچۆی هەولێر، لە لێدوانێكیدا بۆ ماڵپەڕی فەرمیی پارتی دیموكراتی كوردستان، وێڕای رەتكردنەوەی كەمتەرخەمبوونی پۆلیسی هاتوچۆی هەولێر، جەختیش لە بە باشی جێبەجێكردنی ئەركەكانیان دەكاتەوە.

ئەو رۆژنامەنووسە، نموونە بە وەستانی ئوتۆمبێل لە شوێنی نایاسایی دێنێتەوە، كە هەندێ شەقامی شاری هەولێر، سێ ساید، یانیش لە هەردوو بەری شەقامەكە ئوتۆمبێل دەوەستن، یا لای راستی ترافیك دەگرن، یا لە شوێنی پێچكردنەوەی شەقامەكان بۆ سایدی پێچەوانە پێنج پێنج ئوتۆمبێل دەسووڕێنەوە و دەبنە هۆی قەرەباڵغیی شەقامەكە. بەڵام گوتەبێژەكەی پۆلیسی هاتوچۆی هەولێر ئەوەش رەت دەكاتەوە، بەو پێیەی كە پۆلیسی هاتوچۆ لە ترافیكەكاندا داندراون ناهێڵن ئۆتۆمبێل لای راستی ترافیك بگرن.

هاوكات سەرباز بە سەرسوڕمانەوە باسی لە هاوكاریی پۆلیس كرد، كە شۆفێرێك دوو ساید رایدەگرێت لەبری سزادانیان، پۆلیسی هاتوچۆ بۆیان رێك دەخات،  نموونەیشی بە شوێنی ساردەمەنی و خواردنگەكان هێنایەوە، كە شەقامی بەردەمیان سێ ساید ئۆتۆمبێل رادەوەستێ و پۆلیسی هاتوچۆش هیچ كاردانەوەیەكیان نییە، ئەو دیاردەیەشی لە هەولێردا بە بەربڵاو و كەلتوورێكی نەشیاو وێنا كرد، كە دەبێتە هۆی دروستكردنی قەرەباڵغیی شەقامەكان و بە ئاسانی ناتوانی پێیدا تێپەڕی، گوتیشی: "یاسا بە سۆز و ئامۆژگاری جێبەجێ ناكرێ، بەڵكوو دەبێ سزای توند بەرانبەر سەرپێچیكاران هەبێ، كەسێ بازرگانە و شوێنێكی كردووەتەوە و كڕیارانی زۆرن با گەراج دابین بكات، نەك لەسەر حسابی خەڵكی شەقام بگرێت، ئەگەرنا با پۆلیسی هاتوچۆ یاسا جێبەجێ بكات و نەهێڵێ شۆفێر بە نایاسایی بوەستێ، یاسا رەحم و پیاوەتی تێدا نییە، ئەو نموونانەش لەسەر تێكڕای شەقامەكانی هەولێردا بوونی هەیە".

فازڵ حاجی، هۆكاری ئەو قەرەباڵغی و راوەستانی چەند سایدی ئۆتۆمبێل لە بەردەم خواردنگە و ساردەمەنییەكان، بۆ شارەوانیی هەولێر دەگێڕێتەوە، بەو پێیەی ئەوان رێیان داوە لەو شوێنانە ساردەمەنی و خواردنگەكان بكرێنەوە، كە بوونەتە هۆی دروستبوونی قەرەباڵغی، ناوبراو رێكخستنی راوەستانی دوو ساید و سێ سایدی ئوتۆمبێل لە بەردەم ئەو شوێنانە لەلایەن پۆلیسی هاتوچۆشەوە بە كارێكی باش دەزانێت.

ئەو رۆژنامەنووسە وەكخۆی ئاماژەی پێكرد، سەردانی ٢١ وڵاتی جیهانی كردووە، جەختی لەوە كردەوە لە هیچ كام شارێكی ئەو وڵاتانەدا شەقامی پان و باشی وەك هەولێر بوونی نییە، بەڵام لەبەر ئەوەی لەوێ یاسا جێبەجێ دەكرێ و پۆلیس كەمتەرخەم نییە، ئەو قەرەباڵغی و بێسەروبەرییە نابیندرێ، ئوتۆمبێل لەسەر شەقام دوو ساید، یا سێ ساید، هەروەها لەسەر شۆستە و هەموو شوێنێك وەستاون و بواری هەناسەدانیشیان نەهێشتووەتەوە.

رائید فازڵ جەخت دەكاتەوە، كە لە نێوشاری هەولێردا بێسەروبەری هاتوچۆ بوونی نییە و وەكخۆی گوتی: "خۆ بە قسەی شۆفێرێك و هاووڵاتییەك نییە". ئەو پاساو بەوەش دێنێتەوە، كە تەنیا ژمارەی ئوتۆمبێلی تۆماركراو لە شاری هەولێر، بە قەد تۆماری دانیشتووانی هەردوو پارێزگای دهۆك و سلێمانییە، "هەر هاووڵاتییەكی هەولێر دوو ئۆتۆمبێلی بەر دەكەوێت".

 

خێڵان بەختیار




دوایین هەواڵەکان

مەکتەبی سیاسی پارتی سەرەخۆشی له‌ به‌ڕێز مه‌حمود عیسا جاف ده‌كات

SATURDAY, 21 SEPTEMBER 2019 00:09:15

ھەڤاڵی به‌ڕێز مه‌حمود عیسا جاف 

 
سەرۆکی حکومەتی هەرێمی کوردستان ئیدانەی تەقینەوەکەی شاری کەربەلا دەکات .

FRIDAY, 20 SEPTEMBER 2019 23:09:58

هەولێر-KDP.info- مەسروور بارزانی سەرۆکی حکومەتی هەرێمی کوردستان لە پەیامێکدا بە تووندی ئیدانەی ئەو تەقینەوەیەی کرد کە ئێوارەی ئەمڕۆ هەینی 2019/9/20 بە هۆی بۆمبێکی چێنراو بە ئوتومبێلێکی گواستنەوەی گشتی لە دەروازەی شاری کەربەلا ئەنجامدرا و بووە هۆی گیان لەدەستدانی دوازدە هاووڵاتی و برینداربوونی پێنجی دیکەش .

 
نێچیرڤان بارزانی: بەهێزترین سه‌رچاوه‌ی سرووشتی، بیركردنه‌وه‌یه‌

THURSDAY, 19 SEPTEMBER 2019 22:09:01

دهۆك -KDP.info- ئێواره‌ی ئه‌مڕۆ پێنجشه‌ممه‌ 19/9/2019 به‌ ئاماده‌بوونی به‌ڕێز نێچیرڤان بارزانی سه‌رۆكی هه‌رێمی كوردستان، هه‌روه‌ها به‌ڕێزان محه‌مه‌د حه‌لبووسی سه‌رۆكی ئه‌نجومه‌نی نوێنه‌رانی عێراق، مه‌سروور بارزانی سه‌رۆكی حكوومه‌تی هه‌رێمی كوردستان، دكتۆر به‌شیر حه‌داد جێگری سه‌رۆكی ئه‌نجومه‌نی نوێنه‌رانی عێراق، ماتیوو تیوولەر بالیۆزی ئه‌مه‌ریكا له‌ عێراق، په‌رله‌مانتارانی كوردستان و عێراق و به‌رپرسانی سیاسی و ئیداری و نوێنه‌ر و كونسولی وڵاتانی بیانی له‌ هه‌رێمی كوردستان، ڕێوڕه‌سمی ده‌رچووانی یه‌كه‌م خولی قوتابیانی زانكۆی ئه‌مه‌ریكی كوردستان له‌ پارێزگای دهۆك به‌ڕێوه‌چوو.

 
سه‌رۆكی حكومه‌تی هه‌رێمی كوردستان له‌گه‌ڵ سه‌رۆكی ئه‌نجومه‌نی نوێنه‌رانی عێراق كۆبووه‌وه‌

THURSDAY, 19 SEPTEMBER 2019 22:09:52

دهۆك-KDP.info- مه‌سروور بارزانی، سه‌رۆكی حكومه‌تی هه‌رێمی كوردستان، ئه‌مڕۆ پێنجشه‌ممه‌، 19ی ئه‌یلوولی 2019، له‌ په‌راوێزی ئاهه‌نگی یه‌كه‌م خولی ده‌رچووانی زانكۆی ئه‌مه‌ریكی كوردستان له‌ دهۆك، له‌گه‌ڵ محه‌مه‌د حه‌لبووسی، سه‌رۆكی ئه‌نجومه‌نی نوێنه‌رانی عێراق كۆبووه‌وه‌.

 
مەسروور بارزانی: ئێک ژ کارنامەیێن کابینا ٩ـێ گرنگیدانە ب خوێندن و پەروەردێ

THURSDAY, 19 SEPTEMBER 2019 19:09:29

دهۆک-KDP.info-سەرۆکێ حکومەتا هەرێما کوردستانێ د رێورسمێن دەرچوویێن گەرا ئێکی یا زانکۆیا ئەمریکی یا کوردستانێ ل دهۆکێ پەیڤەک پێشکێشکر.

 


 
© 2018 Kurdistan Democratic Party, KDP