Kurdî  ■  كوردی  ■  عربي
WED, 26 JUN 2019 22:03 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

رێوڕەسمی سوێندخواردنی نێچیرڤان بارزانی بە "سەرۆكی دەوڵەت" دەچوو
| KDP.info


په‌روێز ره‌حیم قادر

لە ڕووی پرۆتۆكۆڵییەوە، رێوڕەسمی سوێندخواردنی نێچیرڤان بارزانی لە ١٠-٦-٢٠١٩ وەكوو سەرۆكی ھەرێمی كوردستان بە ئامادەبوونی چەندین كەسایەتی و سەركردە و باڵیۆز و نوێنەری دەوڵەت و لایەنە سیاسییەكان، زیاتر لە رێوڕەسمی فەرمیی سوێندخواردنی "سەرۆكی دەوڵەت" دەچوو، ئەمەش بۆ ھەرێمی كوردستان گرنگیی تایبەتی ھەیە.

لەلایەكی تریشەوە، بەشداریی لایەن و دەوڵەتانی پێكناكۆك وەكوو (ئێران و سعوودیە و تەنانەت توركیا) لەم رێوڕەسمەدا، نیشاندەری گرنگیی پێگەی ھەرێمی كوردستان و متمانە و دڵنیاییە بە نێچیرڤان بارزانی، كە ھەر ئەمەش وادەكات ھیوا بە چارەسەركردنی كێشە و ململانێیە ناوخۆییەكان (كوردستان و عێراقی) و پەیڕەوكردنی ستراتیژیی بێلایەنی لەنێو بارودۆخی ئاڵۆزی ناوچەیی و نێودەوڵەتی بەرزتر ببێتەوە، بۆیە ئەم مەراسیمە بە قۆناغی ھەستانەوەی ناوخۆیی و دەرەكی بۆ ھەرێمی كوردستان بە تایبەتی لەرووی دیپلۆماسییەوە دادەندرێت.

وتاری كورتی جەنابی سەرۆك مەسعوود بارزانی، جگە لە دەربڕینی پشتیوانی بۆ بەڕێز نێچیرڤان بارزانی، پەیامیك بوو بۆ لایەنە سیاسییەكانی كوردستانی و لەمەش گرنگتر ھۆشدارییەك بوو بۆ لایەنە عێراقییەكان لە بەغدا، كە ھەوڵ بدەن لەگەڵ ھەرێمی كوردستان بە رێككەوتن و جێبەجێكردنی دەستوور ئاسەوارەكانی ١٦ی ئۆكتۆبەر بسڕدرێنەوە، بە تایبەتی لە ناوچە كوردستانییەكانی دەرەوەی ئیدارەی ھەرێمی كوردستاندا.

لە روانگەیەكی تریشەوە، ئەم رێوڕەسمە و وتاری میوانەكان، سێ خاڵی سەرەكیی بەرجەستە كرد: ١- داننان بە دیموكراسی و دەستاودەستكردنی ئاشتیانەی دەسەڵات بە میكانیزمی ھەڵبژاردن و ئیرادەی خەڵكی كوردستان و سندووقەكانی دەنگدان لە ھەرێمی كوردستان. ٢- ستایشكردنی پێشكەوتن و پەرەسەندنە جۆراوجۆرەكانی ھەرێمی كوردستان. ٣-  كەلتووری پێكەوەژیان و لێبووردەیی لە ھەرێمی كوردستان. ئەمانەش ھەموویان پێگە و ھێزی ھەرێمی كوردستان بەرزتر دەكەنەوە. جگە لەمانەش، وەبیرھێنانەوەی قوربانی و خەباتی كورد و رۆڵی پێشمەرگە و ھەروەھا  ھاوخەباتی و دۆستایەتیی ڕابردووی نێوان سەركردەكانی ئێستای عێراق و  سەركردە كوردەكان، ھەوڵدانێك بوو بۆ سڕینەوەی بارگرژییەكان و چاككردنەوەی ھەڵەكانی ١٦ی ئۆكتۆبەر و دڵنەوایی و دڵنیاییدانەوە بە كورد و ھەرێمی كوردستان بوو. كۆی ئەمانەش، واتایەیەكی گرنگی ھەبوو، ئەویش ئەوە بوو كە ھەموویان (ویستراو و نەویستراو) دانیان بەوەدا نا كە ئەم ئەزموونەی ئێستای ھەریمی كوردستان لە ئەنجامی بەرگری و خەبات و قوربانیی كورد خۆی، بەدەست ھاتووە، نەك لەلایەن ئەوان/بەغداوە ئەو ماف و ئازادییەی ئێستای ھەرێمی كوردستان پێان درابێت.

گوتەكانی بەڕێز نێچرڤان بارزانیش ھەم بۆ ئاستی ناوخۆیی ھەرێمی كوردستان بۆ ھەردوو لایەنی ھاووڵاتیان و لایەنە سیاسییەكان، دڵنیاكەرەوە بوو و ھەمیش بۆ بەغدا و وڵاتانی ھەرێمی و ھاوپەیمانە نێودەوڵەتییەكان بە تایبەتی ئەمەریكا، چونكە پێداگریی بەڕێزیان لەسەر ئاستی ناوخۆ لە ھەوڵدانی سەرۆكی ھەرێمی كوردستان بۆ چەسپاندن و دەستەبەركردنی پێكەوەژیانی ئاشتیانە و یەكڕیزی و تەبایی و كاری ھاوبەش، سەرەڕای بوونی روانگە و جیاوازییە ئەتنی و ئایینییەكان و بیروبۆچوونە سیاسییەكان. ھەروەھا پەیامێك بوو بۆ بەغدا كە عێراقی نوێ بەپێی دەستوور پێویستە پابەند بێت بە جێبەجێكردنی بنەماكانی ئەو پێكەوەژیانە بۆ چارەسەركردنی كێشە و گرفتەكان، ھەر بۆیە چارەنووسی جەنگ و ستەمكاری رژێمی بەعسی لە ھەمبەر گەلی كورد و گەلانی ناوچەكە و تەنانەت عێراق وەبیر بەشداربووان ھێنایەوە بە مەبەستی نیشاندانی بێسوودبوونی سەركوت و ستەمكاری لە ھەمبەر كورد لەلایەن حكوومەتە جۆراوجۆرەكانەوە و پێچەوانەبوونەوەی دەرئەنجام و ئاكام و لێكەوتەكانی لە بەرژەوەندیی خودی عێراق و عێراقییەكان. لەلایەكی تریشەوە بەڕێز نێچیرڤان بارزانی بە پێداگری لەسەر بەرژەوەندیی ھاوبەش و ئایندە و چارەنووسی ھاوبەش، دەرگای بۆ كاری پێكەوەی ھەموو لایەنە سیاسییەكان كردەوە. پێناسەكردنی "پاراستنی ژیان و پێكەوەژیان" بە كرۆكی سەرمایەی عێراق، دیوێكی تری ئەو وتارەیە كە پەیامی روون و ئاشكرای بۆ دەسەڵاتدارانی عێراقی ھەڵگرتبوو. ھەروەھا بەرجەستەكرنەوەی پێوستی و گرنگی بوونی پەیوەندیی بەھێزی ھەرێمی و نێودەوڵەتی بۆ ھەرێمی كوردستان لەسەر بنەمای لێكتێگەیشتن و رێزگرتن و بەرژەوەندی و لە چوارچێوەی یاسای نێودەوڵەتی و داب و دەستووری دیپلۆماسی و سەروەریی ھەر وڵاتێك و پێكھاتە دەستوورییەكان، پەیامێكی ڕوون و ئاشكرای دیپلۆماسی بوو بۆ عێراق (كە پشتیوانیی ھەرێمی و نێودەوڵەتیمان ھەیە) و وڵاتانی دراوسێ (كە ئیمە نابینە مەترسی بۆ ئێوە و ئێوەش پابەند بن بە بنەمای بەرژەوەندیی ھاوبەش و دەستێوەرنەدان لە كاروباری ناوخۆیی ئێمەوە) و دەوڵەتە سەروو ھەرێمییەكان (كە ئێمە لە جەنگی داعش لەبری ھەموو جیھان پارێزەری ئاشتی بووین و لەداھاتووشدا دەبین و بەرژەوەندیی سیاسی و ئابووری و ئاسایشی ھاوبەشمان ھەیە). بۆیە وتاری بەڕێز نێچیرڤان بارزانی بە وتارێكی گشتگیر و فرەڕەھەند لە چوار ئاستی  ناوخۆیی و عێراقی و ھەرێمی و نێودەوڵەتی دادەنرێت.

 ھەروەھا وتەكانی سەرككۆماری عێراق دكتۆر بەرھەم ساڵح و بەرجەستەكردنەوەی رۆڵ و پێگە و كەسایەتیی جەنابی سەرۆك بارزانی وەكوو ھەوڵدان بۆ ھەڵدانەوەی لاپەڕەیەكی نوێ و تەنانەت فەرامۆشكردن و تێپەڕاندنی نیگەرانییەكان لە چۆنیەتیی ھەڵبژاردنیان بە سەرۆككۆمار بە بێ رەزامەندیی پارتی دیموكراتی كوردستان و تەنانەت گرفت لە پەیوەندییەكانی ئەم دواییەی یەكێتیی نشتیمانیی كوردستان لەگەڵ پارتی دیموكراتی كوردستان دەبیندرێت. لێرەوەیە كە ناوەڕۆكی بابەتەكە زیاتر دەسەلمێندرێت كە بەڕێوەچوونی ئەم رێوڕەسمە، ھەڵگری چەندین واتا و پەیام و لێكەوتەی ئەرێنییە بۆ ھەرێمی كوردستان و پێگەی سەرۆكایەتیی ھەرێمی كوردستان بۆ پتەوكردنی پەیوەندییە كوردستانی و عێراقی و ھەرێمی و نێودەوڵەتییەكان.

لە كۆتاییدا دەكرێت ئەم ڕێوڕەسمە پاڵپشتییەكی ناوخۆیی و عێراقی و ھەرێمی و تەنانەت نێودەوڵەتی بێت بۆ كابینەی سەرۆكی حكوومەتی ھەرێمی كوردستان بەڕێز مەسروور بارزانی، كە بڕیار وایە لەلایەن سەرۆكی ھەرێمەوە بۆ پێكهێنانی حكوومەت ڕابسپێردرێت.

 

 




دوایین هەواڵەکان

وه‌زاره‌تی ته‌ندروستی: حكوومه‌ت به‌رده‌وامه‌ له‌ یه‌كخستن و چاودێریكردنی نرخی ده‌رمان

WEDNESDAY, 26 JUNE 2019 19:06:19

هەولێر-KDP.info-  گوته‌بێژی وه‌زاره‌تی ته‌ندروستیی حكوومه‌تی هه‌رێمی كوردستان ڕایگەیاند: له‌ ڕێگای لێژنه‌ تایبه‌تمه‌نده‌كانه‌وه‌ به‌ردوامین له‌ یه‌كخستن و چاودێریكردنی نرخی ده‌رمان و له‌ناوبردنی ده‌رمانی بێكواڵێتی.

 

مەزارگەکانی ئێزدییان ئاوەدان کرانەوە

WEDNESDAY, 26 JUNE 2019 19:06:19

دەشتی نەینەوا-KDP.info- نەک هەر شنگال، بگرە ناوچە ئێزدینشینەکانی دەشتی نەینەواش کەوتنە بەر پەلاماری ڕێکخراوی تیرۆریستیی داعش و ناوچاکانیان کاول کرد. ئێزدییەکانی دەشتی نەینەوا لە هی شنگال جیاواز بوون، هیچیان نەکەوتنە دەست داعش، بەڵام هاوشێوەی شنگال ناوچەکانیان خاپوور کرا و هەموو مەزارگە و نیشانگە ئایینییەکانیان لەناو بران.

 

قوتابییانی کورد لە فیستیڤاڵێکی نێودەوڵەتیدا کەلتووری کوردیان ناساند

WEDNESDAY, 26 JUNE 2019 17:06:52

هەولێر-KDP.info- لە مانگی حوزەیرانی ئەمساڵدا لە زانکۆی زانستە مرۆڤایەتییەکان و کۆمەڵناسیی SWPS، کە یەکێکە لە کۆنترین و بەناوبانگترین زانکۆ تایبەتەکانی وارشۆی پایتەختی پۆڵۆنیا، ”فیستیڤاڵی نێودەوڵەتیی کەلتووری زانکۆ" بەڕێوە چوو. ئامانج لە بەڕێوەچوونی ئەم جۆرە فیستیڤاڵە ڕەخساندنی زەمینەیەکی لەبارە بۆ لێکتێگەیشتنی قوتابییانی بیانی لە وڵاتانی جیهان و ناساندنی کەلتووری جیاوازە بە یەکتری.

 

سەرۆك بارزانی پێشوازی لە کونسوڵی گشتیی بریتانیا لە هەرێمی کوردستان دەكات

WEDNESDAY, 26 JUNE 2019 17:06:05

هەولێر-KDP.info-  ڕۆژی چوارشەممە 26ـی 6ـی 2019 لە سەلاحەددین سەرۆك مەسعود بارزانی پێشوازی لە مارتین وار كونسوڵی گشتیی بریتانیا لە هەرێمی کوردستان كرد.

"لە ھەرێمی کوردستان ٧٠٠ ھەزار کەس پێوەری ئاویان داناوە"

WEDNESDAY, 26 JUNE 2019 16:06:05

هەولێر-KDP.info- بەڕێوەبەری گشتیی ئاو لە وەزارەتی شارەوانی و گەشتوگوزار ئاشکرای کرد، کێشەی ھاتنەوەی پارەیەکی زۆر بۆ ھەندێ بەشداربووی ئاو چارەسەر دەکرێت و دەشڵێت، لەمەودووا ڕێگەی بەفیڕۆدانی ئاو نادەن و پێویستە ھاووڵاتییان وەک وڵاتانی پێشکەوتوو دەست بە ئاوی خورادنەوەوە بگرن.

 



 
© 2018 Kurdistan Democratic Party, KDP