ئاریان فەرەج
یەكیان (پەنجاو یەك بە چل و نۆ)یەكەی ئەوكات لە یاد دەكات و( چل و پێنج بە بیست و یەك)ەكەی ئێستاش نابینێ و دەڵێ: لە یەكەم هەڵبژاردنیشدا نە پارتی و نە یەكێتی دەنگی پێویستیان نەهێنا، بۆیە سیستمی فیفتی فیفتی پەیڕەوكرا. یەكی دیكەیان دەڵێ: ئێمە پێگە و چەك و جوگرافیامان هەیە، یەك كورسیشمان هەبێ، نیوەمان هەر دەوێت، مونەزیرێكیشیان دەڵێ: باشترین عیلاج دابەشكردنی دۆسییەكانی دارایی و ئەمنیەتە بە جۆرێك نیوەی لای یەكێتی بێت و نیوەی لای پارتی، خەڵكیش دەڵێن: جا ئەگەر پێوەر پێگە و چەك و جوگرافیا بوو، نەك دەنگی ئێمە، ئەگەر ئەنجام دابەشكردنی جومگەكانی حوكمڕانییە، نەك یەكخستنیان، ئەدی هەڵبژاردن بۆ كرا! .
راستیت دەوێ دیموكراسی بێ ئەحزابی دیموكراسخواز، هەڵبژاردن بێ قبوڵكردنی ئەنجام و رێزگرتنی ئیرادەی دەنگدەران، حكومەتداری بە شەراكەتی كیانێكی فرە باڵ كە لە جێی پرنسیپ و كارنامەی حوكمەت، خەمی هەوەڵ و ئەخیری پشك وپۆست بێ بۆ رازیكردنی ئەو هەموو باڵە پۆستخوازەی، بێ هودەیە.
یەكێتی گومانی بۆ كەس نەهێشتەوە كە لە حزبێكی خاوەن بەرنامەی سیاسی و حوكمەتدارییەوە، بۆتە قەوارەیەك كە هەموو هەوڵ و تەقەللای بەدەستهێنانی زۆرترین پۆست و بەرژەوەندی تاكەكەسییە بێ ئەوەی مەعلوم بێت ئەو پۆستە زیادانە دەبنە مایەی پێكهاتنی نێوخۆییان یان ناكۆكی زیاتریان تێدەخات.
نوسەرێك لە سلێمانییەوە نوسیبووی: سەبر و ئارامگرتن و خۆمەحرومكردنی پارتی، سەبری ئەیوبی تێپەڕاندووە، سەرسڕمانی خۆی دەربڕیبوو لەوەی دەنگدەرانی پارتی چۆن بەو هەموو داشكاندنەی سەركردایەتییەكەیان لە حەقبەشی پارتییەكان، رازین، لە كۆتاییشدا نوسیبووی: ئەم خەسڵەتەیە پارتی و پارتییەكان لە ئەحزابی دیكە جیا دەكاتەوە.
پێداگیری یەكێتی لەسەر پۆست و پشكی ناڕەوا، قۆستنەوەی هەلو مەرجەكە و قۆڵبادانی پارتی بۆ پچڕینی بەركەوتی زیاتر، تا ئێستا پشكی زۆری بۆ تەئمین كردوون، رەنگە بشبێتە مایەی رازیكردنی هەموو باڵەكانیان، خۆ ئەگەر بەردەوام بن لە پێداگیری، مەعلوم نییە زیاتر دەبێ یان ئەوەی بەدەستهاتووە، لەدەستی دەدەن.
بەڵام لە هەموو حاڵەتێكدا، تێكۆشەرانی ناو یەكێتی دەبێ لە جێیەكدا هەڵوەستەیەك بكەن و لەخۆ بپرسن: ئەوەی حزبێك لە كایەی سیاسیدا بە زیندوویی و كاریگەری دەهێلێتەوە و ئایندەی مسۆگەر دەكات، پشك و پۆستە یان پرنسیپ و بەرنامەی سیاسی و حوكمداری! حزبی سیاسی خڕبونەوەی كەسانێكە لە دەوری بەرنامەیەكی سیاسی یان رێكەوتنیانە لەسەر دابەشكردنی پلە و پایە و بەرژەوەندی؟.