بەلجیكا-KDP.info- نوێنەری حكوومەتی هەرێمی كوردستان لە یەكێتیی ئەورووپا دەڵێ، لە ئێستادا سەردانەكان تەنیا لە ئاستی وەزیرانی دەرەوەن، بەڵام دوای پێكھێنانی حكوومەت، سەردانەكان زیاتر دەبن. دەشڵێ، لە ماوەیەكی نزیكدا ئەنجامی ئەو سەردانانە دەردەكەون.

ھەرێمی كوردستان لە یەكێتیی ئەورووپا تەواو ناسراوە و دنیای دەرەوەیش لەوە تێگەیشتوون، وەك نوێنەری حكوومەتی ھەرێمیش دەڵێ، حكوومەت پێكبێت، سەردانەكان زیاتر دەبن، چونكە ھەرێمی كوردستان پێگەی تایبەتی لە كۆمەڵگای نێودەوڵەتیدا ھەیە.

دلاوەر خالید ئاژگەیی، نوێنەری حكوومەتی ھەرێمی كوردستان لە یەكێتیی ئەورووپا، بە ماڵپەڕی فەرمیی پارتی دیموكراتی كوردستانی ڕاگەیاند: "بۆ ھەموو لایەك دەركەوتووە، كە پێگەی ھەرێمی كوردستان و پەیوەندییەكانی لەگەڵ وڵاتان زۆر قووڵ و لەمێژینەن، بە تایبەت لەگەڵ یەكێتیی ئەورووپا".

بۆ بیرھێنانەوە، ئەو كاتەی وەزیری بەرگریی ئەڵمانیا و وەزیری بەرگریی بەلجیكا ویستیان سەردانی كوردستان بكەن، بڕیار بوو بچنە بەغدا و دواتر سەردانی كوردستان بكەن، بەڵام حكوومەتی عێراق ڕێگەی نەدا بێنە كوردستان، بۆیە وەزیری بەرگریی بەلجیكا و ئەڵمانیا وەك پشتگیرییەك لە كوردستان، سەرلەبەری سەردانەكەیان بۆ بەغدا ھەڵوەشاندەوە.

لە ئێستادا تیرۆریستانی داعش ئەو هێزەیان نەماوە و شەڕیش دژیان كەمی كردووە و وڵاتانی جیهانیش لە ئاستی باڵادا سەردانی هەرێمی كوردستان دەكەن، ئەمەش بە لای ئاژگەییەوە، ئەوە دەگەیەنێت، كە زۆرێك لە وڵاتانی دەرەوە و وڵاتانی ئیقلیمییش، پێیان وابوو، ئەو سەردانانەی لە كاتی شەڕی دژ بە تیرۆریستانی داعشدا بۆ هەرێم دەكرێن، تەنیا بۆ مەبەستی نەھێشتنی تیرۆریستانی داعشە، وەك خۆی ئاماژەی بۆ كرد، وا دەرنەچوو، بەڵكوو دەركەوت كە ھەرێمی كوردستان فاكتەرێكی گرینگە، هاوكات بۆ جیھانی نێودەوڵەتییش ڕوون بووەتەوە، كە كوردستان سەقامگیرە و خاوەنی پێگەیەكی تایبەتە.

نوێنەرەكەی حكوومەتی هەرێمی كوردستان، بابەتی داعشیش بە یەكێك لە خاڵەكان دەزانێت، بەڵام بابەتی سیاسی و ئابوورییش، ئامانجی سەردانیكردنی وەزیرانی وڵاتانی جیھانە، بەو پێیەی ھەرێمی كوردستان لە ڕۆژھەڵاتی ناوەڕاستدا پێگەیەكی تایبەتی خۆی ھەیە.

دوای ھەڵبژاردنەكانی ھەرێمی كوردستان، لە لێدوانێكی فەرمیی یەكێتیی ئەورووپادا، وێڕای دەستخۆشی لە ھەرێمی كوردستان، ئاماژەیان بەوەش دا، كە ھەرێمی كوردستان زۆر گرینگە و لە ئێستا و داھاتوویشدا پشتگیری دەكەن، هاوكات نزیكبوونەوەی هەولێر و بەغدایان لە یەكتر بە گرینگ ناو برد و راشیانگەیاند، كە لە قازانجی ھەردوولا دەبێت.

بە بڕوای دلاوەر، لە دوای پێكھێنانی حكوومەتی نوێ، سەردانی وەزیران و پەرلەمانتارانی دیكەی وڵاتان بۆ ھەرێمی كوردستان زیاتر دەبێت، چونكە لە ئێستادا سەردانەكان تەنیا لە ئاستی وەزیرانی دەرەوەن، بەڵام دوای پێكھێنانی حكوومەت، لە ڕووی ئابووری، بازرگانی و پەیوەندیی نێوان پەرلەمانی كوردستان و پەرلەمانەكانی دیكە، سەردانەكان زیاتر دەبن.

ناوبراو جەختی لە بوونی كۆمەڵێك پڕۆگرام كردەوە، كە لە ماوەیەكی نزیكدا ئەنجامی ئەو سەردانانە دەردەكەون، هاوكات بە ھەمان شێوە، شاندەكانی ھەرێمی كوردستانیش سەردانی وڵاتانی دیكەی جیهان دەكەن.

فایزە كۆیی