هەولێر-KDP.info- پسپۆڕێكی سیاسی دەڵێ، ئەمەریكا وەك هاوبەشێكی ستراتیژی لە هەرێمی كوردستان دەڕوانێ بۆ یەكلاییكردنەوەی كێشەكانی لە ناوچەكە.
پرۆفیسۆر د. خەلیل ئیسماعیل، پسپۆڕی جوگرافیای سیاسی, بە ماڵپەڕی فەرمیی پارتی دیموكراتی كوردستانی ڕاگەیاند: "دوای ڕیفراندۆمەكەی هەرێمی كوردستان و ڕووداوەكانی 16ی ئۆكتۆبەر، زۆرێك پێیان وابوو كە هەرێمی كوردستان لە پەیوەندییەكانیدا بەرەو دوواوە هەنگاو دەنێت و لاواز دەبێت، بەڵام بەپێچەوانەوە دەرچوو. چونكە ژمارەیەکی زۆری سەركردە باڵاكانی جیهان سەردانی هەرێمی كوردستانیان کردەوە و دواهەمینیشیان مایك پۆمپیۆ، وەزیری دەرەوەی ئەمەریكا بوو كە لە كۆبوونەوەی لەگەڵ سەرۆك بارزانی كۆمەڵێك پرسی گرینگی تاوتوو كرد."
ئەو پسپۆڕەی بواری جوگرافیای سیاسی ڕوونیشی كردەوە: "هەرێمی كوردستان ئیسپاتی وجودی خۆی كردووە لەمەڕ پرسە سیاسییەكانی عێراق و وڵاتانی ناوچەكە. پەیوەندییەكانی هەرێمی كوردستان و ئەمەریكا لە ئایندەدا زیاتر پتەو دەبێت, بەتایبەت دوای بڕیاری كشانەوەی هێزەكانی ئەمەریكا لە سوریاوە بۆ هەرێمی كوردستان، بەم دوواییەش لە ناوچەی كەیوەنی شاری كەركووك سوپای ئەمەریكا هێزەكانی عێراق و حەشدی ئاگادار كردووەتەوە كە لە ناوچەكە بكشێنەوە. ئەمانەش دەرخەری ئەو ڕاستییەن كە ناوچەكە لە ڕووی سەربازی و سیاسییەوە لە گۆڕاندایە و، هەرێمی كوردستان بە پێچەوانەوە زۆر لە سەردەمی پێش ڕیفراندۆم بەهێزترە و لە سیاسەتی ئەمەریكادا گرنگییەكی زۆری لە یەكلاییكردنەوەی كێشەكان لەسەر ئاستی عێراق و ناوچەكەدا هەیە."
د. خەلیل ئیسماعیل ئاماژەیشی دا: "ئەمەریكا وەك هاوبەشێكی ستراتیژی لە هەرێمی كوردستان دەڕوانێت بۆ یەكلاییكردنەوەی كێشەكانی ناوچەكە."
دوێنێ، چوارشەممە، مایك پۆمپیۆ سەردانی هەرێمی كوردستانی كرد و لەگەڵ سەرۆك بارزانی و نیچیرڤان بارزانی، سەرۆكی حكوومەتی هەرێم و مەسروور بارزانی، ڕاوێژکاری ئەنجومەنی ئاسایشی هەرێمی كوردستان كۆ بووەوە.
سەرباز واحد