دهۆک-KDP.info- ئەندامەکێ پەرلەمانێ کوردستانێ سەر ب لیستا پارتى دیموکراتى کوردستان راگەهاند، ل پەرلەمانێ کوردستانێ دێ هەمى بزاڤا بۆ باشترکرن و خوشکرنا ژیان و ژیارا موچەخور و کەسێن بێ موچە کەین و دێ ب رژدى کار لسەر پەسەندکرنا پروژێ چاکسازیێ ل پەرلەمانێ کوردستانێ کەین، داکو گهورین لسەر سیستەمێ موچەیاندا بهێت و دبەرژەوەندیا گشتیدا بیت.
نیزیکى چوار سالێن قەیرانا دارایى ل هەرێما کوردستانێ و لاوازیا رەوشا ئابۆرى، نوکە رەوش بەرەڤ باشتر چوویە و پەرلەمانى کوردستانێ دەست بکارێ خۆ کریە، ژبۆ ڤێ مەرەمێ محسن دوسکى، ئەندامێ پەرلەمانێ کوردستانێ سەر ب لیستا پارتى دیموکراتى کوردستان بۆ مالپەرێ فەرمیێ پارتى دیموکراتى کوردستان گوت:" گرنگە پەرلەمان کار بۆ باشترکرنا ژیارا موچەخور و کەسێن بێ مووچە بکەت، جونکى بۆ ماوەیێ چەند سالا بوویە هەرێما کوردستانێ د قەیرانا دارایى دا دبورى و خەلکى خوراگر بوویە، بەلێ نوکە رەوشا ئابۆرى ل هەرێمێ بەرەڤ باشتر چوویە، ژبەر هندێ پێدڤیە لگور داهاتێ هەیڤانە موچەیێن فەرمانبەرا بهێنە رێکخستن و بەلاڤکرن".
محسن دوسکى خویاکر:" ئەگەر داهاتێ حوکمەتا هەرێما کوردستانێ بۆ دابینکرنا موچەیێن فەرمانبەرا یێ کێم بیت، گرنگە موچەیێ پلەیێن تایبەت بهێنە کێمکرن و ب هەمى رەنگا دێ کار کەین ژبۆ نەهێلانا خانەنشینکرناپەرلەمانتارا، کۆ پشتى ئەرکێ پەرلەمانتارى ب دووماهیک دئێت بزڤریتە دناڤ پارتا خو و لسەر وێ کارى بهێتە خانەنشینکرن یێ بەرى کارێ پەرلەمانتاریێ".
ئەندام پەرلەمانێ کوردستانێ زەلالکر:" دڤێ خولا پەرلەمانیدا دێ برژدى کار لسەر پەسەندکرنا پروژێ چاکسازیێ ل پەرلەمانێ کوردستانێ کەین، داکو گهورین لسەر سیستەمێ موچەیاندا بهێت و دبەرژەوەندیا گشتیدا بیت".
هەلز عەلى سەلیم