Kurdî  ■  كوردی  ■  عربي
TUE, 20 NOV 2018 19:25 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

داستانی پردێ، سەرکەوتن بوو بە سەر خیانەتی ١٦ی ئۆکتۆبەر و وانەیەك بوو کە هەرگیز داگیرکەران و خیانەتکاران لە یادیان ناچێت
| KDP.info


*دکتۆر کەمال کەرکووکی

پێش یەك ساڵ وەکو ئیمڕۆ کات ژمێری (١١،٣) یازدەو و سێ خولەكی پێش نیوەرۆ ، بۆ یەکەم جار لە مێژووی تانکی ئێم یەکی ئابرامزی ئەمریکی بەدەستی پێشمەرگە سەربەرزەکانی پارتی دیموکراتی کوردستان لە میحوەری ڕۆژئاوای کەرکوك لە نەبەردی پردێ تێكشکێندرا. 
 
ساڵێك لەمەوبەر لە ٢٠/١٠/٢٠١٧دا،  پێشمەرگە سەربەرزەکانی کوردستان، لە میحوەری رۆژاوای کەرکووک/ جبهەی پردێ/ سەربەرز و مەردانە، هەڵۆئاسا پەلاماری داگیرکەرانیان تێکشکاندو راویان نان و وانەیەکیان پێدان کە هەرگیز لە یادیان ناچێت.
کاتێ کە لە ئاکامی گەلەکۆمەیەکی ناوخۆیی و دەرەکی، بە پیلانگێڕی و جووڵاندنی هێز و بە چاوساخی و هاوکاری خوێناوی گرووپە" کاڵفام" وبە خەیانەت گۆشکراوە ناسراوەکەی ناو یەکێتی نیشتمانی کوردستان کە ، دووز و خانەقین و کەرکووکی دڵی کوردستان رادەستی داگیرکەران کران، زۆر ماڵی هاوڵاتیانی رەسەنی ناوچەکە بەر تاڵان و سووتان کەوتن و زیاتر لە ٢٠٠ هاووڵاتیش شەهید کران ،  لە ئاکامی ئەو رووداوانەدا ، تراژیدیایەکی نەتەوەیی خوڵقاو و تاسان و نیگەرانی و نائۆمێدی باڵی بە سەر گشت کوردستاندا کێشا. لەو کات و ساتە هەستیارانەشدا  میدیاکانی تیمی خیانەتکاری ١٦ – ئوکتۆبەر پڕوپاگەندەی چەواشە کاریان دەکرد و دەیان ووت پێشمەرگە هیچیان پێ ناکرێت و حشد گەیشتنە هەوڵێر.!!!! لەو تەمو و مژە سیاسییەدا چارەنووسی باشووری کوردستان و هەرێم و حکومەتەکەی کەوتنە بەر پرسیاری ناوخۆ وهەرێمی و جیهانی. 
لەوەها دۆخێکی سیاسی و سەربازی و سایکۆلۆژی دا بوو کە بەرەبەیانی رۆژی ٢٠ی ئۆکتوبەر، فەرماندەکانی ئەو هێزە داگیرکەر و پەلاماردەرانە کە بۆنی نەوتی کەرکووک مەست و کەڕ و لاڵ و کوێری کرد بوون، بە ئامانجی داگیرکردنی پایتەختی کوردستان، بەرەو تێپەڕین لە شارۆچکەی " پردێ" فەرمانی جووڵەیان دەرکرد.
ریز بوونی لەشکرێکی هەزاران کەسیی ئیقلیمی، تەیار بە سەدان چەک و ئالیاتی جەنگیی پێشکەوتووی وەک: دەبابەی ئابرامز و هامەر و باجەر و دۆشکە و مودەرعەی ئەمریکی و تۆپی دوورهاوێژ و کاتیۆشا و سارۆخی کۆرنێت لە بەرەی دوژمن و لەبەرانبەریشدا، دامەزرانی بەرپرس و فەرماندە و پێشمەرگەکانی بەر فەرمانی میحوەری رۆژاوای کەرکووک کە بۆ رێگرتن لە پێشڕەویی داگیرکەران بەرەو هەولێر،هەولێری پایتەختی هەرێمی کوردستان ، پەیمانی بەرپرس و فەرماندەو پێشمەرگەکان سەرکەوتن یان کۆتایی ژیان بوون لەو سەنگەرانەیان بەستبوو ، تابڵۆیەک لە جەنگێکی مێژوویی و چارەنووس سازی نێوان کورد و داگیرکەرانی ، نەخشاند بوو. ئەو رۆژە چاو و دڵ و هەست و هیوای هەموو کوردستان لە سەر پردێ بوو کە پێشمەرگە وەک هێزی رۆژی تەنگانە و رۆژە سەختەکان، گەل و نیشتمان و پایتەختەکەی لە داگیرکەران بپارێزی.
سوپای کوردستان و سوپای داگیرکەران ئاوقای یەکتر بوون و بە توندی بە گژ یەکدا چوون. گرمەی تۆپ و شریقەی گولە و بڵێسەی ئاگر و دووکەڵی بارووت و تۆزی هاون و زڕەی زنجیری دەبابەی دوژمن، ئاسمانی پردێ و ناوچەکەی داگرتبوو. پێشمەرگە وەک چیاکان چەقیبوون و وەک داربەڕووەکان وەها خۆیان داکوتابوو کە سینگیان ببووە قەڵغانی پاراستنی نیشتمان و بەها بەرزەکانی. سەرەنجام بە هەموو ئەو ناهاوسەنگییەی کە لە رووی سیاسی و سەربازی و دیپلۆماسییەوە لە نێوان بەرەی وڵاتپارێزانی کورد و دوژمنانی داگیرکەر و خاکفرۆشان لە ئارادا بوو؛ پاش زیاترلە ٨ سەعات شەڕی بێ پسانەوە و بەردەوام و(٢) دوو کات ژمێریش شەڕی پچڕ پچڕ ، دوژمن نەک هەر نەیتوانی بەرەو ئامانجە دیاری کراوەکەی پێشڕەوی بکات، بەڵکوو تێکشکا و هەموو ئەو غروور و لە خۆبایی بوونەی بە هۆی پشتوانی دەرەکی وخیانەتەکەی تاقمەکەی ١٦ی ئۆکتۆبەرەوە، کەڵەکەی سەر لەش و رۆحیان ببوو، پووکایەوە. 
بەو حاڵەشەوە گرینگی و جێگای نەبەردی پردێ تەنیا بەو دیمەن و رەهەندانەوە شرۆڤە ناکرێت. هەر جەنگ و نەبەردێک بە ئاکام و کارییگەرییە سیاسی و سەربازییەکانی و دەسکەوت و دۆڕانەکانییەوە هەڵدەسەنگێندرێت. نەبەردی " پردێ"، هاوکێشە ئاراییەکانی نێوان ١٦ تا ٢٠ی ئۆکتوبەری گۆڕی و هەمووئەوانەی دەست و رۆڵیان لەو پیلانگریی و لەشکرکێشیەدا هەبوو و ئەوانەش کە وا چاوەڕێی ئاکامی ئەو هێرشانە و بەلادا کەوتنی تەوازنی هێز بوون، لە ئێوارەی ئەو رۆژەدا بە حیساباتی خۆیاندا چوونەوە.
نەبەردی پردێ، نەبەردی پاراستن و مانەوەی هەولێر و حوکمڕانی کوردستان بوو. راسان لە ڕووی پیلانی دەرەکی و خەیانەت و نیشتمان فرۆشی و نائۆمێدی دا بوو. هەڵمەتی نیشتمانپەروەران و دەرکەوتن و درەوشانەوەی سەربەرزانەی هێز و لایەنی دڵسۆز بە گەل و خاکی کوردستان بوو. هەروەها بە هێز بوونی زیاتری سیاسی و سەربازیی و دیپلۆماسیی هەرێمی کوردستان بوو. ئەو نەبەردە مێژووییە هەر لە ئاستی شان و شکۆی بەرزی پێشمەرگە دەوەشایەوە و پووچەڵ کردنەوەی پیلانی هاوبەشی داگیرکەران بوو. هەر لەو کاتەشدا مایەپووچ کردنی خاکفرۆشانی بەرەی خەیانەت بوو. 
حەماسەی پڕ لە شانازیی پردێ، لە نەبەردەکانی سحێلا و مەحموودییە و زمار وتلسقۆف و مەخموورو دووپات بوونەوە و ئێستا هەموو بەرەکانی بەرگری لە کوردستان، پردێ وسحێلا و مەحموودییە وتلسقۆف و زومار و مەخموورن.
لە یادی ئەو حەماسە مێژووییەدا کە بە خوێنی پۆلێک لە رۆڵەکانی نیشتمان تۆمار کرا، هەزاران سڵاو پێشکەشی شەهیدانی ئەو نەبەردە دەکەین و سەری رێز لە بەرانبەر شکۆ و گەورەییاندا دادەنەوێنین. سڵاوی ئەمەک و وەفاداریی پێشکەشی ئەو فەرماندە و پێشمەرگانە دەکەین کە ئامادە بوون بمرن بەڵام، شکۆی نەتەوە ونیشتمانەکەیان پارێزراو بێت.
ئێمەش زۆر سەربەرزین  بەوەی کە پلانداڕێژی ئەو بەرگرییە بوین و تێدا سەرکەوتین و ئەو نەبەردە بوو بە بەشێك لە نەبەردە درەوشاوە پڕ شانازییەکانی کوردستان بۆ هەتا هەتا.
 

*سەرۆکی ئەنجوومەنی سەرکردایەتیی کەرکوك - گەرمیان
٢٠-١٠-٢٠١٨




دوایین هەواڵەکان

حەشد و ھێزە عێراقییەكان سەرقاڵی بازرگانیكردنن.. ئاگایان لە دۆخی ئەمنیی مووسڵ نەماوە

TUESDAY, 20 NOVEMBER 2018 10:11:52

مووسڵ-KDP.info- بەرپرسێكی پارتی دەڵێ، دۆخی ئەمنیی مووسڵ زۆر خراپە و خەڵكی ھەست بە مەترسییەكی زۆر دەكەن، چونكە داعش جارێكی دیكە سەری ھەڵداوەتەوە و حەشدی شەعبی و ھێزە عێراقییەكانیش لەبەر كاری بازرگانی، ئاگایان لە دۆخی ئەمنیی شارەكە نەماوە.

 
هەولێر و بەغدا ڕێككەوتنێكی ٢٨خاڵییان واژۆ كرد

TUESDAY, 20 NOVEMBER 2018 10:11:36

ھەولێر-KDP.info- بەڕێوەبەری گشتیی وەزارەتی بازرگانیی حكوومەتی ھەرێمی كوردستان گوتی، لە دوای سەردانی شاندی بەغدا بۆ ھەرێمی كوردستان، سەبارەت بە خاڵە گومرگییەكان رێككەوتنێكی ٢٨خاڵییان واژۆ كردووە، كە گرینگترینیان لادانی خاڵە گومرگییە نایاساییەكانن.

 
نێچیرڤان بارزانی: وێڕاى سه‌ختییه‌كان، ئامانجه‌كانى پلانی‌ ستراتیژیی حكوومه‌تى هه‌رێم‌ دێنه‌ دى

MONDAY, 19 NOVEMBER 2018 23:11:32

هه‌ولێر-KDP.info-  نێچیرڤان بارزانی سەرۆکوەزیرانی هەرێمی کوردستان ده‌ڵێ، سەرەڕای گوشارەکانی حکوومەتی عێراق، بەربەستە دەرەکییەکان و هەروەها بارودۆخی شەڕی داعش، پلانە بەردەوامەکەی حکوومەت سەرکەوتوو بوو و ڕۆڵی بەرچاوی هەبوو لە بەرەوپێشبردنی کوردستان لە سەرجەم كه‌رته‌كان، هاوكات ‏وه‌به‌رهێنانی له‌ بوارى وزه‌ و سه‌رچاوه‌ سروشتییه‌كانى بە ڕێگەپێدراو و مافێکی دەستووری دانا.

 
سه‌رۆک بارزانی یادی له‌دایکبوونی پێغه‌مبه‌ری موسڵمانان پیرۆز ده‌کات

MONDAY, 19 NOVEMBER 2018 22:11:31

بسم الله الرحمن الرحیم

به‌بۆنه‌ی یادی له‌ دایکبوونی پێغه‌مبه‌ری مه‌زنمان محه‌مه‌دولمسته‌فا ( سڵاوی خوای له‌سه‌ر بێت) پیرۆزبایی له‌ سه‌رجه‌م موسڵمانانی جیهان و عێراق و موسڵمانانی کوردستان به‌تایبه‌تی ده‌که‌م.
هیوادارین ئه‌م بۆنه‌ پیرۆزه‌ هۆکارێکی دیکه‌ی پته‌وبوونی په‌یامی ئاشتی و برایه‌تی و پێکه‌وه‌ژیان و لێبورده‌یی بێت.

بروسكەی سەرەخۆشیی سەرۆك بارزانی بۆ دكتۆر ڕۆژ نوری شاوەیس

MONDAY, 19 NOVEMBER 2018 22:11:35

برای بەڕێزم كاك د. ڕۆژ نووری شاوەیس

بە داخێكی زۆرەوە هەواڵی كۆچی دوایی مامی بەڕێزتان خوالێخۆشبوو كاك جەوهەر شاوەیسم بیست. بەم بۆنە خەمناكەوە سەرەخۆشی لە ئێوە و خانەوادە شۆڕشگێر و تێكۆشەرەكەتان و تەواوی دۆست و كەسوكار و ئاشنایانتان دەكەم و خۆم بە هاوبەشی خەمتان دەزانم و خۆتان خۆش بن.



 
© 2018 Kurdistan Democratic Party, KDP