پەیاما لیستا پارتی دیمۆكراتی كوردستان
ژمارە (١٨٣)
بۆ هەلبژارتنێن خولا پێنجێ یا پەرلەمانێ كوردستانێ – ٢٠١٨
ب ناڤێ خودایێ مەزن ودلۆڤان
پارتی دیمۆكراتی كوردستان ب سەر بلندی وباوەری وهشیاریا مللەتی، ب سەركردایەتیەكا ب هێز وئێكگرتی، ب پشتەڤانیا جەماوەرێ خوەیێ ب وەفا و دلسۆز، ب چاندكەكا پری هەلۆیستێن نەتەوەیی و نیشتیمانی، ب بەرنامە ودیتنەكا زەلال و نوو بۆ پاشەرۆژێ، ب لیستەكا پێكهاتی ژ سەركردە و كادرێن ژێهاتی و دلسۆز، د ڤان هەلبژارتنان دا پشكدار دبیت، ژ هاوەلاتیان ژی چاڤەرێ دكەت كو وەكو ئەرك وماف ب بەرفرەهی پشكداریێ تێدا بكەن.
پێنج سالێن بوری، سالێن بەرەڤانیێ ژ كوردستانێ و بەرسینكگرتنا وان هەموو پیلان وهەرەشێن پر كێشە بوو، كو ژ نافخوە و دەرڤە گەف بوون ل سەر كوردستانێ وقەوارێ وێ یێ سیاسی وكاروانێ گەشەپێدان وپێشكەفتنا وێ راگرت. پارتیا مە وەكو بەرسڤ بوو وان گەفان وەك هەرجار پشكا مەزن بەركەفت، وب پشتەڤانیا خوینا گەشا شەهیدان وپێشمەرگێن قەهرەمان و دلسۆزێن گەل، بەرهنگاریا شەرخوازی وپیلانان بوو، زێدەباری رەوشا نە هاریكار وچاڤپۆشیا نافخویی، پارتی خوە بەرامبەر ڤان گێشان نە چەماند، هەتا كو كوردستان وقەوارێ وێ یێ دەستۆری و دۆز و داخازیێن گەلێ كوردستانێ یێن رەوا ب زیندی هێلایین و پیلانێن شەرخوازی و خیانتەكاری شكەستن ئینای.
ل پێنج سالێن رابوری دا ، پارتی ب پشتەڤانیا نیشتمان پەروەران بەرامبەر ڤی نەهجێ دەستۆر شكێنێ بەغدا راوەستیا، كو بنەمایێ تەوافق و شەراكەت و هەڤسەنگی شێلاند و بۆدجە وشایستێن دارایی و مافێن دەستۆریێن خەلكێ كوردستانێ زەبتكربوون. ب هاریكاریا دلسوزێن مللەتی و ب زەند وباسیكێن پێشمەكە وخوینا هزاران شەهیدان، سەركردایەتیا پارتی شەرێ پاراستنا كوردستانێ كر و ئەفسانەیا داعش تێكشكاند. ب دارشتنا بنەمایێن سەربخوەیا ئابۆری رووبرووی شەرێ برسیكرنێ بوو، زێدەباری دابەزینا بهایێ پەترۆلێ و هاتنا پێلێن ئاواران ومەزختیێن بەرەیێ هزار كیلۆمەتری یێ شەرێ داعش، شیا كارەكێ هوسا بكەت كو كو كوردستان خوە ل بەر سیاسەتا نانبرینێ بگریت و نەشكێت. پارتی شیا ب رێبەریا سەرۆك بارزانی بۆ جارا ئێكێ د مێژۆیێ دا د ریفراندۆمەكا سەرانسەری دا هەموو گەلێ كوردستانێ ل سەر ئێك ئامانج كۆمڤە بكەت، سەرباری هەرەشە و رێگریان شیا بریار و خاستا سەربخوەیا كوردی سەربێخیت. پشتی سەركەفتنا ریفراندۆمێ ژی شیا كوردستانێ ژ هێرشێن سەربازی وسیاسی وئابۆری ب پارێزیت. د وەختەكی دا كو لەشكركێشی بەرەف كوردستانێ دهات پارتی ب گیانێ عەزیزێن خوە بەرگری ژ شەرەف وشكۆیا كورد كوردستانێ كر، و خەوانا وان ژناڤبر كو د ڤیان ب چاڤشۆریا خاكفرشان كوردستانێ داگیر بكەن و داویێ ب قەوارێ وێ یێ سیاسی بینن. د وەختەكێ پیڤانەیی دا شیا هاڤكێشا دژی كوردستانێ ب قازانجا كوردستانێ ڤاژی ب كەت. دۆرپێچ وسزاریان هەلۆەشینیت وتێكەلیێن كوردستانێ ل گەل جیهانێ گرێدەتەڤە و ب دیبوماسیەت وحیكمەتا سیاسی پێگەه و ئیعتبارێ ل دەڤەرێ و جیهانێ بۆ كوردستانێ ڤەگەرینیت.
ل ڤان چەند سالێن پری قەیران پارتی سەرباری هەموو ئاستەنگ و گرفتان، وەكو ساخلەتا وێ یا بەردەوام ملێ خوە دا بەر بەرپرسیاریێ و رووبرووی قەیرانان بوو و ب هەموو شیانێن خوە ئەركێ خوە د حوكمەتێ دا برێڤەبر، و بەرگریا رۆژگارێن سەخت كر و چۆك نە دانا هەتا ئاسهێن چارەسەریا قەیرانان ئاشكرا بووین.
ئەڤرۆ، كو بەرەف هەلبژارتنان دچین، روویێ رۆژێن سەخت یێ بەرف داویێ دچن و ئەم یێ گاڤان بۆ قۆناغەكا نوو د هاڤێژین، كو ب پشتەڤانیا گەل دێ قۆناغا دوبارە درێژكرنا كاروانێ كەشەپێدان وپێشڤەبرنا كوردستانێ بیت. بۆ ڤێ قۆناغێ پارتی بەرنامە و رەوانگەهەكا هەموو لایەنی و نوو یا ئامادەكری، كو ب كووراتیا مێژۆ وخەباتا خوە دڤێت ب رێیا پەرلەمان و حوكمەتا هەرێما كوردستانێ بۆ خەلكێ كوردستانێ ب جهبینیت.
پارتی، سەرای وان هەموو ئەركێن سەر ملێ وێ ژ ب جهئینان بەلێنێن خوە كەمتر خەم نەبوویە، هەر د وی وەختی دا ب چاڤەكێ واقعیانە ل كێموكوورتیان دنێریت كو د پرۆسێسا سیاسی وحوكمرانیێ و ئابۆری دا هەنە و چارەسەركرنا وان ل قۆناغا داهاتی ب ئەركێ خوەیێ هەمیشەیی دزانیت.
لیستا (١٨٣) یا پارتیا مە د رێیا ڤی بەرنامەی دا ل بن درووشمێ ( ئاڤاكرنا كوردستانەكا ب هێز) نەخشەرێیا چاكسازیەكا سەرانسەری و ب دەستڤەئینانا عەدالەتا جڤاكی وپەیداكرنا دەلیڤێن كاری ب وەكهەڤی و بهێزكرنا ژێرخانێ وپێشڤەبرنا هەموو سێكتەرێن ژیانێ وخوەشگوزەرانی دارێتیە. ئەڤە هەموو د كوردستانەكا سەر بلند كو پارتی هەرتم خەباتێ بۆ دكەت و دێ بەردەوامبیت بۆ بجهئینان وسەلماندنا مافێن نەتەوەیی ونیشتمانی.