هەولێر-KDP.info-  سەرۆك بارزانی پێشوازی لە نێردەی تایبەتی سەرۆكی ئەمەریكا لە هاوپەیمانێتیی دژی داعش کرد و لە دیدارەکەدا، بیروڕا لەبارەی دوایین پێشهاتە سیاسییەكانی ناوچەكە و گۆڕانكارییە مەیدانییەكانی شەڕی دژی داعش لە سووریا و ڕۆژئاوای عێراق ئاڵوگۆڕ كرا.

ڕۆژی دووشەممە 20ـی 8ـی 2018 لە سەلاحەددین سەرۆك مەسعوود بارزانی پێشوازی لە نێردەی تایبەتی سەرۆكی ئەمەریكا لە هاوپەیمانێتیی دژی داعش و شاندێكی یاەری كرد كە پێكهاتبوو لە دۆگڵاس سڵیمان باڵیۆزی ئەمەریكا لە عێراق  و ستیڤ فاگین كونسووڵی ئەمەریكا لە هەولێر.

لە دیدارەكەدا بیروڕا لەبارەی دوایین پێشهاتە سیاسییەكانی ناوچەكە و گۆڕانكارییە مەیدانییەكانی شەڕی دژی داعش لە سووریا و ڕۆژئاوای عێراق ئاڵوگۆڕ كرا.
هەر لەو كۆبوونەوەیە ڕۆشنایی خرایە سەر دوایین هەوڵەكان بۆ پێكهێنانی حكوومەتی نوێی عێراق و هاوكێشە تازەكانی نێو پڕۆسەی سیاسیی عێراق. پەیوەست بە پێكهێنانی حكوومەتی تازەی عێراق سەرۆك بارزانی جەختی لەوە كردەوە كە ئەوەی بەلای لایەنە كوردستانییەكان ئەولەوییەتی هەیە ڕەچاوكردن و پابەندبوونی لایەنە عێراقییەكانە بە پڕەنسیپی شەراكەتی حەقیقی لە بەڕێوەبردنی وڵاتدا و هەروەها بوونی گەرەنتی و میكانیزمی ڕوون بۆ جێبەجێكردنی شەراكەت و ڕێككەوتنەكان.